<<    <     लूका     12     >    >> 
पाखंड गै खिलाफ चेतावनी
12
1 अर फेर जद बठै हजारां लोगां गी भीड़ भेळी हो'गी अर बे आपसरी में उपर थळी होण लाग्या। जद यीसू सारा ऊं पेलां आपगै चेला नै केयो, “फरीसियां ऊं चोकस रेईयो झिका ढोंगी है।”
2 बो टेम आ'ग्यो कै सारी बातां लोगां गै सांमणै परगट हो'सी अर झिको कीं लुकेड़ो है बो लोगां नै बताईजैगो।
3 झिकी बातां थे अंधेरे में करी है बे बातां चानणै में सुणाईजैगी, अर झिकी बातां थे मांइली साळ में करी है बे बातां छत गै उपर जोर गी आवाज में सुणाईजैगी।
परमेसर ऊं डरो
4 झिका मेरा बेली है बानै केऊं कै झिका लोग थारै सरीर नै मारै इऊं अलावा ओर कीं कोनी कर सकै हिस्या लोगां ऊं थे कदी ना डरो।
5 मैं थानै चेतो कराऊं कै थानै किऊं डरणो चाईजै, मरणै गै बाद झिकै नै नरक में घालणै गो अधिकार है थे सिरफ बि परमेसर ऊं डरो।
6 मैं थानै बताऊं थोड़ा पीसा में पांच चिड़ियां मोल मिलज्य। बे इती ससती है पण परमेसर फेर बी बामूं एक नै बी कदी कोनी भूले अर बांगी संभाळ करै।
7 देखो, थारै सिर गा बाळ तांई गिणेड़ा है ईंखातर डरो ना, परमेसर गै खातर थे चिड़ियां गी डार ऊं बी जादा किमती हो।
यीसू नै लोगां सांमै मानो
8 मैं थानै केऊं कै जे कोई मनै संसार में माणसां गै सांमै मानल्यगो तो मैं मिनख गो बेटो बिनै परमेसर गै सुरगदूतां सांमै मानल्यूंगा।
9 पण झिको मनै संसार गै माणसां गै सांमै कोनी मानै बिनै में न्याय गै दिन परमेसर गै सुरगदूतां सांमै कोनी मानूंगा।
10 अर बि आदमी नै माफी मिल सकैगी झिको मिनख गै बेटै गै बिरोध में बोलै पण झिको पवितर आत्मा गै कामां गै बिरोध में बोलै है तो बिनै कदी बी माफी कोनी मिलैगी।
11 मेरै कारण जद लोग थानै पकड़गे पंचायता अर अधिकारियां कनै ले जावै तो थे डरियो ना, कै आपगो बचाव किंया करांगा अर बानै जबाब के देवांगा?
12 क्यूंकै बि टेम ई पवितर आत्मा थानै आपी बता देसी कै जबाब के देणो है।
धनवान मूरख गी मिसाल
13 बि टेम बामूं कोई बोल्यो, “हे गुरू, मेरै भाई नै के'दे कै बो म्हारै बाप गी जमीन-जेदाद गी पांती कर ल्य।”
14 यीसू बिनै केयो, “मनै कुण थारै धन गी पांती करण खातर चुण्यो है?”
15 अर बानै समझायो कै अपणै आपनै बचाण खातर हर तरियां गै लोभ लालच ऊं बच्या रेवो अर चोकस रेवो क्यूंकै मिनख गो जीवन बिंगै धन गो गुलाम कोनी होवै।
16 आ बात समझाण खातर बानै एक मिसाल बताई: एक अमीर आदमी गै खेत में भोत फसल होई।
17 जद बो आपगै मन में बिचार करण लागग्यो कै, “अब मैं के करूं? मेरै कनै तो इती फसल रखण गी जिग्यां ई कोनी।”
18 बण केयो, “मैं इंया करूंगा कै छोटी बखारियां नै फोड़'गे मोटी बणवाऊंगा अर सारी फसल अर धन बिमै रखूंगा।
19 अर आपगै प्राण नै केऊंगा, ‘आपणो कई सालां गो कोटो पूरो हो'ग्यो अब खा-पी अर सुख-चेन ऊं रेगे ऐंस कर अर मोज मार।’”
20 पण परमेसर बिनै केयो, “हे मूरख आदमी, आज रात नै तेरा प्राण खतम हो'ज्यगा। अर ओ सारो भेळो करेड़ो धन किंगो हो'सी? अर तेरै कोई काम कोनी आवै।”
21 फेर यीसू केयो, “हिस्यो ई बो आदमी है झिको आप खातर धरती पर धन भेळो करै। पण परमेसर गी नजरां में बो कंगाल ई है।”
परमेसर पर भरोसो राखो
22 फेर आपगै चेला नै केयो, “थे प्राणां गी चिंता ना करै करो कै, के खावांगा अर ना सरीर गी चिंता करै करो कै के पेरां'गा?
23 क्यूंकै भोजन ऊं प्राण गो अर कपड़ा ऊं थारै सरीर गो मोल जादा है।”
24 फेर केयो, “आं चीड़ी, कागलां नै देखो, ऐ ना तो बीजण जावै अर ना'ई बाडण जावै अर ना आं खातर कोई बखारियां भरेड़ी है फेर ई परमेसर आंगो पेट भरै अर संभाळै है। परमेसर गै खातर थारो मोल आं पंछियां ऊं भोत जादा है।
25 थारै में हिस्यो कुण है झिको चिंता कर'गे आपगी उंमर नै एक घड़ी भदा सकै?
26 जे आ चिंता इतो छोटो काम ई कोनी कर सकै तो दूसरै मोटै कामां गी चिंता करण ऊं के लाभ है?
27 आं जंगळी फूलां गै बुंटा नै देखो, ऐ किंया बदै, ऐ ना तो कीं कातै अर ना'ई कीं काम करै। पण फेर ई राजा सुलेमान गै कनै सारो कीं होंता होयांई बो आं फूलां बरगो कदी कोनी सज धज सक्यो।
28 ईंखातर मैदान गी घास नै झिकी आज है काल आग में बाळीज्यगी परमेसर बिनै ई इती सुणी बणावै है तो, हे कचा बिस्वासियो, बो थानै क्यूं कोनी पिरावैगो, जरूर पिरावैगो।
29 अर थे आं बातां गै लारै ना लाग्या रेवो कै म्हे के खावांगा अर के पिवांगा अर ना'ई कोई चिंता करो।
30 क्यूंकै संसार में परमेसर नै कोनी जानणै आळा लोग आं चिजां गै लारै ई लाग्या रेवै। पण थारो पिता परमेसर जाणै है कै थानै आं चिजां गी जरूरत है।
31 जे थे परमेसर गै राज गी इच्छा करोगा तो ऐ सारी चिजां थानै आपी मिलजीसी।”
सुरग गो धन
32 ईंखातर हे मेरा प्यारा चेलो, “थे घबराओ ना, क्यूंकै थानै सुरग गै राज गै प्रजा गो हक देणै में पिता परमेसर नै भोत आनंद होवै।
33 थे आपगो सारो कीं बेचगे कंगालां नै बांट देवो अर आप खातर हिस्या बटुआ बणाओ झिका कदी बी पाटणाळो ना होवै। यानी कै सुरग में धन भेळो करो झिको ना कदी घटै अर ना कदी बिनै कोई चोर सकै अर ना कोई किड़ो दीमक लागै।
34 क्यूंकै जठै थारो धन होवैगो बठै थारो मन बी लागग्यो रेवेगो।”
जागता रेवो
35 थे परमेसर गै काम गै खातर हरदम तैयार रेवो अर रात नै बी दिया जगागे तैयार रेवो। यानी हरदम तैयार रेवो।
36 थे बि दास बरगा बणो झिको रात नै ब्या में गैईड़ै आपगै मालिक नै अडीकतो होवै। कै कद मेरो मालिक आवैगो। अर बिंगै बारनो बजावंता ई दबादब खोलूं।
37 अर बो मालिक बि दास नै जागतो देखे धन्य है बे दास झिकां गो मालिक आ'गे देखेगो कै बे जागता है। मैं थानै साची केऊं बि टेम बो मालिक खुद कपड़ा बदळगे आपगै नोकर नै खाणो खुहावैगो अर बिंगी सेवा करेगो
38 जे बो मालिक आदी रात नै आवै या दिन उगण ऊं पेली आवै पण बिंगो दास बिनै जागतो मिलै तो बो दास नै धन्य मानै।
39 पण थे आ जाणल्यो कै जे घर गै मालिक नै ठा होवै कै चोर कद आसी तो बो कदी आपगै घर में चोरी कोनी होण देवै।
40 ईंखातर तैयार रेवो, क्यूंकै बि घड़ी जद थे सोच्यो ईं कोनी हो'सी बि घड़ी मिनख गो बेटो आसी।
बिस्वास गै लाइक दास या बेईमान दास
41 जद पतरस बोल्यो, “हे प्रभु, आ मिसाल सिरफ म्हारै खातर बताई है या सगळा लोगां खातर।”
42 प्रभु बिनै उतर दियो, “मैं हिस्यै एक बिस्वास लाइक अर बुद्धिमान दास गै बारै में बताण लागरयो हूं। झिकै नै बिंगो मालिक घर गी देखभाल अर नोकरां नै खुवावण प्यावण गी जिमेदारी दे दी अर आप कठैई दूसरै काम ऊड़ज्यै।”
43 पण धन्य है बो दास झिको बिंगै मालिक नै पाछो आंतै टेम ढंग ऊं काम करतो मिलै।
44 मैं थानै साची केऊं, “बो मालिक बिंगै बिस्वास गै कारण बिनै आपगी सारी जाएदाद संभालण गी जुमेबारी सोंप देवैगो।”
45 पण जे बिंगो दास ओ सोच लेंतो कै मेरो मालिक केई दिना गै बाद ई पाछो आसी अर बो दूसरै नोकरां गै सागै बुरो सलूक करण लागज्य अर इतो खावै पीवै गै नसो चड़ जावै
46 जद बिंगो मालिक एकदम ई आ'ज्य अर बि दास नै ध्यान ना लागै कै कद आ'ग्यो। जद बिंगो मालिक बिनै भोत मोटी सजा देवैगो अर बिंगी बेईमानां में गिणती करेगो।
47 बो दास झिको आपगै मालिक नै आच्छी तरियां जाणै है फेर बी बिंगै केय पर कोनी चालै तो बो भोत मार खावैगो।
48 अर झिका आपगै मालिक गै बारै में कीं ना जाणै अर बाऊं कोई भूल में गळती हो'ज्य तो बांगै थोड़ी मार पड़ैगी। ईंखातर झिकै मालिक आपगै दास नै कीं जादा दियो बिंऊं भोत जादा मांगै'गो अर झिकै नै भोत सूंपेड़ो है बिऊं भोत पाछो लेसी।
यीसू गै आणै गो फळ
49 मैं धरती पर रेण आळा लोगां नै न्यारा-न्यारा करण आळी आग लगाण आयो हूं। अर मैं चाऊं बा आग अब तांई लाग जाणी।
50 मेरो दुख उठाणो अर मरणो एक बतिस्मै गी तरियां है अर जद तांई ऐ बातां ना हो'ज्य, बि दिन तांई मैं भोत उदास रेऊंगा।
51 थे के सोचो, मैं धरती पर मिलाप कराण आयो हूं? ना, मैं थानै केऊं, मैं सारा नै न्यारा न्यारा करण आयो हूं।
52 अब ऊं जे किसैई घर में पांच जणा होवैगा तो बे आपसरी में खिंडज्यगा, तीन जणा दो ऊं न्यारा रेवैगा अर दो जणा तीनां ऊं न्यायरा रेवैगा।
53 बाप बेटै गै अर बेटो बाप गै खिलाफ रेवेगो, मां बेटी गै अर बेटी मांगै खिलाफ अर सासू बहु गै अर बहु सासू गै खिलाफ में रेवैगी।
ठीक के है?
54 फेर यीसू लोगां गी भीड़ नै केयो, “थे बादळा नै छिपतै कानी ऊं निकळतो देखो तो केवो मेह आवैगो अर मेह आ'ज्य।
55 अर दिखणादी हवा चालज्य तो केवो गरमी होवैगी अर हो'ज्य।
56 हे ढोंगी, थे धरती अर आकास गै रंग रूप गो तो भेद कर सको पण ईं टेम परमेसर के करै, इंगो थानै क्यूं कोनी ठा लागै।”
राजीनामो कर ल्यो
57 के ठीक है के गळत है इंगो फेंसलो थे खुद क्यूं कोनी कर सको?
58 पण थारै उपर दोस लगाण आळै थानै धोखो करण आळ गै सांमणै लेगे जाण लागरयो है। जद तूं बिऊं रा में छूटण गो समझोतो कर ले। कठैई इंया ना होवै कै तनै न्यायी कनै ले जा'गे सजा दिरा दैय अर जेळ में बंद करा दय।
59 मैं तनै केऊं हूं जद तांई एक एक पीसा गो हिसाब कोनी चुकावैगो जद तांई जेळ ऊं बारै कोनी आवैगो।