मत्ती 6

दान गै बारे में

1 “चोकस रेओ। जे थे लोग कोई आच्छा काम दूसरा लोगां नै दिखाण खातर करो तो पिता परमेसर थानै कोई फळ कोनी दय। 2 जद थे लोगां नै दान दयो तो बिंगो रोळो ना मचाओ जिंया चालाक लोग सतसंग घरा में अर गळियां में केवंता फिरै। मैं थानै केऊं कै जे ऐ लोग इंया करेगा तो बानै इंगो फळ मिल चुकयो। 3 पण जद तू एक हात ऊं दान दय तो तेरै दूसरै हात नै ठा ना लागणो चाइयै। 4 तूं झिको दान लुकगे दियो है तो तेरो पिता परमेसर झिको लुकगे देखे बो तनै फळ देवैगो।

पराथना गै बारे में

(लूका 11:2-4)

5 जद तू पराथना करै तो चालाक लोगां तरियां ना करी क्यूंकै बे लोगां नै सड़का गै मोड़ा पर खड़या होगे पराथना करणी आच्छी लागै। मैं थानै साची केऊं बे लोग आपगो फळ पेला ई ले चुक्या है। 6 पण जद तू पराथना करै तो बंद कोठड़ी में करी। जद तेरो पिता झिको दिख्यो कोनी बो तनै लुकगे देखेगो तो इंगो फळ तनै देवैगो। 7 जद थे पराथना करो तो गेर यहुदी लोगां गी तरियां जादा ना बोलो क्यूंकै बे लोग इंया सोचे है कै म्हारै बोळै बोलण ऊं म्हारी पराथना सुण लेसी। 8 ईंखातर थे बांगै बरगा ना बणो। थारो पिता थारै मांगणूं पेला ईं जाणै है थानै के चईयै? 9 ईंखातर इंया पराथना करै करो, हे पिता परमेसर तू झिको सुरग में रेवै है थारो नाम पवितर मानिजै। 10 थारो राज आवै जिंया थारी इच्छा सुरग में पूरी होवै बिंया धरती पर बी होवै। 11 आज गै दिन गी रोटी मनै दे। 12 अर जिंया म्हे म्हारै दुसमणा नै माफ करां हा बिंया तू बी म्हानै माफ कर। 13 म्हानै परीक्सा में ना लेई अर बुराई ऊं बचाई। 14 अर झिका थारै पर अपराध करै अर थे बा लोगां नै माफ करोगा तो थारो पिता थानै बी माफ करेगो। 15 जे थे लोगां नै ना माफ करया तो पिता परमेसर थानै बी माफी कोनी देवैगो।

बरत गै बारे में

16 जद तू बरत राखै तो चालाक लोगां तरियां मू लटकागे ना बैठी क्यूंकै बे दूसरै लोगां नै ओ दिखाणो चावै कै म्हारो आज बरत है। मैं थानै साची केऊं कै बानै इंगो फळ पेला ई मिल चुक्यो है। 17 जद तू बरत राखै तो देखण आळा नै जियां तू रोटी खाण आळा टेम दिखै बिंया देखणो चईयै। 18 झिका ऊं लोगा नै ओ ठा ना लागेगो इंगो बरत है। झिको पिता थानै लुकगे देखे बो थानै फळ देय्गो।

सुरग गै धन गै बारे में

(लूका 12:33, 34)

19 आप खातर धरती पर धन भेळो ना कर। क्यूंकै अठै इनै कीड़ा अर जंगाळ लागज्यगो अर चोर बी ले जा सकै। 20 सुरग में धन भेळो कर। बठै ना कोई कीड़ा ना कोई जंगाळ अर ना चोर चोरी कर सकै। 21 अर याद राखो जठै थारो धन हो'सी बठै थारो मन बी लागग्यो रेसी।

सरीर गो चानणो

(लूका 11:34-36)

22 सरीर गो दियो तो आंख है। जे तेरी आंख ठीक है तो तेरो सारो सरीर ई चानणै में रेवेगो। 23 जे तेरी आंख बुरी हो'ज्य तो तेरो सारो सरीर अंधेरे में हो जावैगो। ईंखातर झिको चानणो तेरै मां है बो जे अंधेरो होज्यो तो तू आप अंधेरे में रेवेगो।

24 कोई आदमी एक सागै दो मालिकां गी सेवा कोनी कर सकै। क्यूंकै बो एक ऊं प्रेम अर दूसरै ऊं बैर राखसी। थे परमेसर अर धन दोनां गी एक सागै सेवा कोनी कर सको।

परमेसर अर धन

(लूका 16:13; 12:22-31)

25 मैं थानै केऊं खाण पीण गी चिंता छोड दयो। आपगै सरीर खातर कपडां गी चिंता छोड दयो। थारो जीवन रोटी अर सरीर गै कपडा ऊं भोत मेंगो है। 26 आ आकास गै उडण आळै जानवारां नै देखो झिका ना तो बीजै अर ना बाडे अर ना भेळो करै। पण फेर ई परमेसर बांगो पेट भरै है। थे तो आऊं भोत जादा किमती हो। 27 थारै मूं कोई हिस्यो है कै झिको चिंता कर'गे आपगै जीवन गो एक पल बी बधा सकै। 28 अर थे आपगै गाबा गी क्यामी सोचो। खेतां गै फूलां गै बारे में सोचो, बे किता सुणा होवै। बे ना कोई काम करै अर ना कोई कपडा बणावै। 29 मैं थानै केऊं कै आपगै राज पाट में राजा सुलेमान बी बा फूलां बरगो कोनी बण सक्यो। 30 ईंखातर झिका खेतां गा फूल आज है, दिनगे बानै आग में बाळिजैगा। परमेसर आ फूलां नै इता सुणा बणावै तो थे झिका कमजोर बिस्वासियों थानै बो आऊं सुणा गाबा क्यूं कोनी पिंरासी? 31 ईंखातर चिंता कर'गे ओ ना केओ के खास्या अर के पीस्या अर के पेरस्या? 32 संसार गा लोग आं चिजां गै लारै भाजै पण सुरग में रेण आळो पिता परमेसर जाणै है थानै आ चिजां गी लोड है। 33 थे सारा ऊं पेला परमेसर गै राज अर बिंगी धारमिकता गी खोज करोगा तो ऐ सारी चिजां थानै मिलज्येगी। 34 तड़कै गी चिंता ना करो क्यूंकै दिन गो आपगी चिंता आप ई कर लेवेगो। हर एक दिन गी आपगी आपणी ब्यादि होवै।”