दूसरा पर दोस ना लगाणो
7
1 “दूसरा पर दोस लगाण गी आदत ना बणावो। इंया करोगा तो परमेसर थारै पर बी दोस कोनी लगावेगो।
2 क्यूंकै थारो न्याय थारै फैसले पर ई होवैगो। अर जे थे दूसरा गै सागै सई न्याय करेगो तो परमेसर तेरो बी सई न्याय करसी। जे तू गळत न्याय करेगो तो तेरै सागै बी इंया हो'सी।
3 तू आपगै भाई गी आंख में छोटो फूसको क्यामी देखे? पण तू आपगी आंख में पडे़ड़ो मोटो फूसको देख।
4 जद तेरी खुद गी आंख में मोटो फूसको पड़यो है तो तू दूसरै भाई नै किंया के सकै कै मैं तेरी आंख ऊं फूसको काड़ दयूं।
5 हे पाखण्डी, पेला आपगी आंख मूं मोटो फूसको काड़, फेर दूसरै गो छोटो फूसको काड़ी।
6 कुता नै पवितर चीज ना दयो अर सूरा आ'गे मोती ना रेडो। बे आंगो मोल कोनी जाणै। सूर मोतियां नै पगा में रुळा दय अर कुता तनै'ई फाड खावेगा।
मांगस्यो तो मिलैगो
7 परमेसर ऊं झिको कीं मांगोगा बो थानै मिलैगो। डूंडोगा तो लादैगो अर बारनो खडकाओगा तो बो थारै खातर खोलैगो।
8 क्यूंकै झिको कोई मांगै बिनै बो दय, झिको डूंडै बिनै बो मिलै अर झिको खटकावै तो बि खातर खोलै।
9 थारै मूं हिस्यो बाप है झिकै गो बेटो रोटी मांगै अर बो बिनै दगड झला देयै।
10 अर मछी मांगै तो बिनै सांप झला देयै। इंया कोई बाप आपगै बेटै सागै कोनी करै।
11 थे चायै किता बी माड़ा हो फेर बी आपगी उळाद नै आच्छी चीज देणी चावो तो थारो पिता परमेसर थारै मांगण पर थानै आच्छी चीज क्यूं कोनी देसी?
12 जे थे दूसरै लोगा ऊं आपगै सागै आच्छो बरताव चावो तो थे बी बांगै सागै आच्छो बरताव करो। नेम विधान अर परमेसर गी बात बताण आळा गै द्वारा आ'ई सीख देऐडी है।
भीड़ो रा
13 परमेसर गै राज में भीड़ै रा ऊं प्रवेस करो। पण चोडो रा अर खुलो रा बिनास कानी जावै। भोत सारा लोग ईं पर चालण लागरया है।
14 पण झिको भीड़ो रा है बिमै चालणो ओखो है। बो रा अनन्त जीवन तांई जावै है। बिमै थोड़ा ई लोग जावै है।
जिस्यो दरखत जिस्यो ई फळ
15 झूठी बात बताण आळा ऊं बच गै रेओ। बे सुद्धी भेड़ बरगा है पण बे खाण आळै भेड़ियां बरगा है।
16 थे बानै बांगै करमा ऊं पिछाण ल्योगा। झाडका गै कदी अंगूर कोनी लागै, ना कांटा गै दरखत कदी अंजीर लागै।
17 इंया ई आच्छै दरखत गै आच्छा अर माडे गै माड़ा फळ लागै।
18 एक आच्छो दरखत कदी माडो फळ कोनी ल्यावै अर ना'ई माडो दरखत कदी आच्छो फळ ल्यावै।
19 बे सारा दरखत झिका आच्छा फळ कोनी ल्यावै बानै बाडगे आग में बाळ देसी।
20 ईं तरियां थे लोग बा झूठी बात बताण आळा नै बांगै कामा ऊं पिछाणोगा।
21 प्रभु प्रभु केण आळा हरेक आदमी सुरग में कोनी जावेगा। पण झिको मेरै पिता गी इच्छा पर चालै बो ईं जावैगो।
22 बि न्याय गै दिन में भोत सारा लोग मेरूं पूछेगा। प्रभु मैं थारै नाम ऊं परमेसर गी बात करी, मैं थारै नाम ऊं ओपरी काड़ी अर मैं थारै नाम ऊं चमत्कार करया।
23 जद मैं बानै केऊंगा, मैं थानै कोनी जाणूं, बुरा काम करण आळा लोगों मेरै कनूं भाज जाओ।
दो तरियां गी नीम
24 झिको कोई मेरी आ बाता नै सुणगे आ पर चालेगो बो बि बुद्धिमान आदमी बरगो होवैगो झिकै आपगो घर तकड़ी नीम पर बणायो।
25 मेह बरस्यो, बाड आयी अर आंधी चाली पण बिंगो कीं कोनी बिगड़यो क्यूंकै बिंगी नीम तकड़ी ही।
26 पण झिको मेरी बातां सुणगे बा पर चालै कोनी बो बि मूरख आदमी बरगो है झिकै आपगो घर रेत गै उपर बणायो है।
27 जद मेह बरस्या, बाड आयी अर आंधी चालगे घरूं टकराई तो घर पडगे खत्म हो'ग्यो।”
28 जद यीसू ऐ बातां करण लागरयो तो लोगां नै बिंगी बात पर भोत हेरानी होयी।
29 क्यूंकै बो बानै नेम विधान सिखाण आळां गै तरियां कोनी समझावंतो पण बो बानै एक हकदार गी तरियां समझावंतो।