मत्ती 8

यीसू कोढ गै रोगी नै ठीक करणो

(मरकुस 1:40; लूका 5:12-16)

1 यीसू जद प्हाड़ ऊं उतरगे चाल्यो तो लोगां गी मोटी भीड़ बिंगै लारै चाल पड़ी। 2 बि भीड़ गै मां एक कोढी बी हो। बो यीसू कनै आ'गे पगां पड़ग्यो अर केण लागग्यो, हे प्रभु, तू चावै तो मैं ठीक हो सकूं। 3 जद यीसू बिंगै सिर पर हात रखगे केयो, “मैं साची चाऊं, तू ठीक होज्यै।” अर बो जद ई ठीक हो'ग्यो। 4 फेर बण बिनै केयो, “इंगै बारे में किनैई कीं ना केई अर जा'गे मिन्दर गै याजक नै दिखाई। अर मूसा गै आदेस ऊं बठै भेंट चढाई झिका ऊं लोगा नै तेरै ठीक होण गो ठा लागज्यै।”

5 फेर यीसू कफरनहूम में गेयो तो बठै एक रोमी सेनापती आयो अर बिऊं मदद खातर बिनती करी। 6 हे प्रभु मेरो एक दास लकवै ऊं बीमार पड़यो है। बिंगै भोत पीड होण लागरी है। 7 जद यीसू बिनै केयो, “मैं आ'गे बिनै ठीक करूंगा।” 8 सेनापती बोल्यो, “प्रभु मैं ई लायक कोनी कै थे मेरै घरै आओ। ईंखातर अठुं ई एक बात के'दे तो मेरो दास ठीक होज्येसी। 9 मेरै उपर बी केई अधिकारी है अर मेरै नीचे बी केई सिपाई काम करै है। जद मैं मेरै सिपाई नै आण जाण गो केऊं तो बो बिंया ई करै। अर मैं मेरै दास नै कोई काम केऊं तो बो मेरो केणो मानै।” 10 ओ सुणगे यीसू लोगां गी भीड़ नै केयो, “मैं साची केऊं, मैं इतो मोटो बिस्वास इसराएल में किंगैई मां कोनी देख्यो। 11 मैं थानै केऊं भोत सारा आथूणा ऊं अर आगुणे ऊं आवैगा अर बे सुरग राज गै भोज में अबरहाम, इसहाक अर याकूब सागै बैठेगा। 12 पण इसराएली लोग झिका इंया सोचै है कै म्हानै परमेसर गै राज में जाण गो हक है तो बे बारै अंधेरे में काड़ी ज्येगा अर बे बठै चीखता अर दांत पीसता रेवैगा।” 13 जद यीसू सेनापती नै केयो, “जा तेरो जिसो बिस्वास है बिंया ई होवै अर जद बिंगो दास ठीक हो'ग्यो।”

पतरस गी सासू नै ठीक करणी

(मरकुस 1:29; लूका 4:38-41)

14 यीसू जद पतरस गै घरै गयो तो बिंगी सासू बुखार में सुती पडी देखी। 15 तो यीसू बिंगै हात गै आपगो हात लगायो अर बा ठीक होगी अर बा यीसू गी सेवा करण लागी।

16 जद आथण होयी तो लोग ओपरी बडेडा लोगां नै ल्याण लागग्या। बण आपगै हुकम ऊं ओपरियां नै काड़ दी अर बानै ठीक करया। 17 आ चमत्कारां ऊं आ बात साबित होगी झिकी परमेसर गी बात बताण आळै यसयाह गी किताब में लिखेड़ी ही कै “बण आपणै रोगां नै ले लिया अर आपणै दुखा नै ओड लिया।”

18 यीसू जद आपगै च्यारूंमेर लोगां गी भीड़ देखी तो बण आपगै चेलां नै झील गै परलै पासै जाण खातर केयो। 19 जद एक नेम विधान सिखाण आळो आ'गे बोल्यो, “गुरूजी थे जठै बी जाओगा मैं थारै सागै चालूंगा।” 20 जद यीसू बिनै केयो, “लोंबड़ियां गी घुरी होवै अर पंछियां गो आलणा होवै पण मिनख गै बेटै कनै रेण खातर आपगो सिर ढकण नै ई जिग्या कोनी।” 21 फेर एक चेले केयो, “प्रभु मेरो बाप गुजर गयो, पेला मनै माटी देण गी आग्या दयो।” 22 यीसू केयो, “तू मेरै लारै चालतो रे अर मरेड़ा नै आपगा मुरदा दाबण दे।”

यीसू आंधी नै रोकणी

(मरकुस 4:35-41; लूका 8:22-25)

23 जद यीसू आपगै चेलां सागै किस्ती पर चड गै बैठग्यो। 24 बि टेम झील में मोटो तूफान आ'ग्यो अर लेहरा किस्ती गै ऊपराकर जावैई। पण यीसू बि टेम सुत्यो पड्यो। 25 जद चेला आ'गे जगाण लाग्या अर केयो, “प्रभु म्हानै बचा, म्हे मरण लागरया हा।” 26 जद यीसू बानै केयो, “हे कमजोर बिस्वासियों, थे इता डरेडा क्यामी हो?” जद यीसू खड़यो होगे तूफान अर लेहरा नै ललकारी अर बे रुकगी। 27 ओ देखगे बे लोग हेरान हो'ग्या अर आपसरी में केण लाग्या, ओ कुण आदमी है झिकै गो केणो तूफान अर समुन्दर बी मानै।

ओपरी बड़ेडा आदमी नै ठीक करणो

(मरकुस 5:1-20; लूका 8:26-39)

28 जद बे झील गै दूसरै पासै गदरेनिया गै देस में पूगग्या तो बानै मूसाणा में दो आदमी दिख्या। बा दोनां में ओपरी बडेडी। बे इता खतरनाक हा कै बठकर कोई टपतो कोनी। 29 बा किलकारी मारी, “हे परमेसर गा बेटा, तूं म्हारूं के चावै? तू म्हानै म्हारै टेम ऊं पेला ई सजा देण आयो है।” 30 सारै ई एक सूरां गो रेवड चरै हो। 31 जद ओपरियां बिनती करी तू म्हानै बारै काड़णो चावै तो बा सूरां में घाल दे। 32 जद यीसू हुकम दियो कै जाओ। बे निकळ गै सूरां में पडगी अर सूरां गो रेवडो रूडतो रूडतो झील में जा पड्यो अर सारा सूर मर गया। 33 जद सूरां गै गुआळियों ओ देखगे गाम कानी भाज्यो अर सारी घटना अर बा ओपरी बडेडे आदमियां गो हाल गाम गा लोगां नै बतायो। 34 जद गाम गा लोग यीसू ऊं बात करण आया अर यीसू नै देखगे बिनती करी कै म्हारो इलाको छोडगे उड़जा।