पेलै चेले नै बुलाणो
5
1 एक दिन यीसू गनसरेत नाम गी झील गै किनारै पर परमेसर गो बचन सुणावै हा तो बिंगै च्यारूंमेर भोत सारा लोग भेळा हो'ग्या।
2 बि टेम बण बठै दो किस्ती खड़ी देखी अर बांगै कनै मछुआरा जाळ साफ कर'गे पळेटण लागरया।
3 बामूं एक किस्ती समौन नाम गै आदमी गी ही, बि पर चढ'गे यीसू केयो, “किस्ती थोड़ी सी दूर डूंगै पाणी में कर ले।” फेर बो लोगां नै आपगा परबचन सुणाण लागग्यो।
4 जद यीसू आपगा परबचन सुणा दिया तो समौनa नै केयो, “किस्ती नै ओर डूंगै पाणी में ले जा'गे मछली पकड़ण खातर जाळ गेर।”
5 जद समौन केयो, “हे गुरूजी, म्हे सारी रात गा मेनत करण लागरया हां, अजे तांई एक ई मछली कोनी पकड़ी, थे केवो तो एक बारी ओर जाळ गेरूं।”
6 जद बां जाळ गेरयो तो इती मछलियां फसगी कै बांगो जाळ टूटण लाग गयो।
7 तो बां दूसरी किस्ती पर बैठया आपगै साथियां नै हेलो मारयो कै म्हारी मदद करो। बे भाजगे आया बां दोनूं किस्तियां इती भरली कै बे मछलियां गै भार ऊं डूबण लागगी।
8-10 इती मछलियां नै देखगे बिंगा साथी जब्दी गो बेटो याकूब, यूहना अर सारा साथियां नै भोत हेरानी होई। जद समौन पतरस यीसू गै पगां पड़'गे बोल्यो, “हे प्रभु, तूं अठुं उड़ज्या, क्यूंकै मैं एक पापी आदमी हूं अर थारै लायक कोनी।” यीसू बिनै केयो, “डर ना आज ऊं तूं लोगां नै परमेसर गो बचन सुणागे भगती गै रा पर ल्यासी।”
11 फेर बे आपगी किस्ती किनारै पर ल्याया अर सारो कीं छोड़गे यीसू गै लारै हो'ग्या।
कोढ गै रोगी नै ठीक करणो
12 जद यीसू किसई गामै गेयो तो बठै बानै देखगे एक कोढ गो रोगीb आयो अर पगां पड़'गे बिनती करण लागग्यो कै, “हे प्रभु थे चाओ तो मनै ठीक कर सको।”
13 बण बिंगै हात लगागे केयो, “मैं चाऊं तूं ठीक होज्या” अर बो बि घड़ी ठीक हो'ग्यो।
14 अर यीसू बिनै केयो, “आ बात किनैई ना बताई” अर मूसा गै बणाएड़ा नेम विधान गै हिसाब ऊं याजक नै दिखा अर भेंट चढा। जिंऊं लोगां नै पतो चालै कै तूं सच्च में ठीक हो'ग्यो है।
15 पण यीसू गी चरचा सारै फेलगी अर लोग बीमारियां ऊं ठीक होण खातर बिंगै कनै भेळा होण लागग्या।
16 पण बो रेगिस्तान में जा'गे पराथना करतो हो।
लकवै गै रोगी नै ठीक करणो
17 इंया होयो कै एक दिन यीसू किंगैई घर में परबचन करण लागरयो अर बो लोगां नै बीमारियां ऊं ठीक करण खातर प्रभु गै सामरथ में पूर्ण हो। बठै लोगां गी मोटी भीड़ में फरीसी अर यहुदी धरम सासतरी लोगc बी बैठया हा, झिका गलील अर यहुदियां गै हर गाम ऊं अर यरुसलेम ऊं आएड़ा हा।
18 बि टेम कई आदमी लकवै गै एक रोगी नै मांची पर सुणागे ल्याया बे बिनै यीसू गै कनै ले जाण खातर कोई चारो ढूंढै हा। क्यूंकै मां बारै भोत भीड़ ही।
19 पण बे बोळी भीड़ गै कारण मां कोनी जा सक्या, ईंखातर बे बिनै छत पर लेग्या अर खपरेल हटागै सणै माची बिनै यीसू गै सांमै नीचे उतार दियो।
20 बण बां लोगां गो बिस्वास देख गै रोगी नै केयो, “जा बेटा, तेरा पाप माफ हो'ग्या।”
21 जद यहुदी सासतरी अर फरीसी आपसरी में गुसर फूसर करण लाग'गया कै “ओ कुण है झिको परमेसर गी निंदा करै? परमेसर गै बिना ओर कुण है झिको पाप माफ कर सकै?”
22 यीसू बांगै मन गी बात जाणग्यो अर केयो, “थे आपगै मन में इंया क्यामी सोचो?
23 सोरो है के, इंया केणो कै तेरा पाप माफ हो'ग्या या इंया केणो कै उठ अर आपगी मांची चक'गे चाल।
24 थे ओ जाणल्यो कै मिनख गै बेटै नै धरती पर पाप माफ करण गो बी अधिकार है।” बण केयो, “मैं तनै केऊं कै खड़यो हो, अर आपगी मांची चक'गे घरै चाल।”
25 बो दबादब उठयो अर आपगी मांची चक'गे परमेसर गी बडाई करतो आपगै घर कानी चाल पड़यो।
26 जद सारा देखगे हेरान हो'ग्या अर परमेसर गी बडाई करण लागग्या। बां डरता केयो, “म्हे आज अनोखी बात देखी है।”
लेवी चेले नै बुलाणो
27 इंगै बाद में यीसू नगर ऊं बारै आयो तो बण लेवी dनाम गो आदमी झिको चुंगी लेंतो, बिनै चुंगी गी चोकी पर बैठयो देख्यो अर बिनै केयो, “मेरै लारै आ'ज्या अर मेरो चेलो बण ज्या।”
28 बो सारो कीं छोड़गे बिंगै लारै हो'ग्यो।
29 फेर लेवी यीसू गै खातर आपगै घरै मोटो भोज राख्यो, झिकै में चुंगी लेण आळा गी अर दूसरै लोगां गी मोटी भीड़ बिंगै सागै भोजन करण लागरी ही।
30 जद फरीसी अर बांगा सासतरी बिंगै चेला पर रीस बळण लागग्या कै “थे चुंगी लेण आळा अर पापी लोगांe सागै क्यूं खाओ पीयो हो?”
31 यीसू बानै जबाब दियो, “चंगा-भलां नै बेद गी जरूरत कोनी होवै, रोगियां नै होवै है।
32 मैं पापियां गो मन बदळण खातर आयो हूं धरमियां गो कोनी।”
बरत गै बारै में
33 बां बिनै केयो, “यूहना अर फरीसियां गा चेला तो बरत राखै अर पराथनाf करै है पण थारा चेला तो हरदम खांता-पींता रेवै है।”
34 यीसू बानै केयो, “थे बीन गै सागै होवंता बरातियां नै बरत रखा सको के?
35 पण बि दिन जद बीन नै बिंगै दुसमण बरातियां ऊं न्यारो कर देसी तो जद बे बरत राखैगा।”
36 बण बानै एक मिसाल बताई, “कोई आदमी नूंअ कपडै़ गी कारी पाड़गे, पुराणै कपड़ै पर कोनी लगावै, क्यूंकै नूंओ कपड़ो भेळो होगे पाट ज्यगो अर पुराणै कपड़ै सागै मेळ कोनी खावैगो।
37 अर कोई नूंओ दाख गो रसg पुराणै चमड़ै गी दीवड़ी में कोनी घालै, जे घाल सी तो दाख गो रस चमड़ै गी दीवड़ी नै पाड़ देसी अर ढूळज्गो अर सागै चमड़ै गी दीवड़ी बी खतम हो'ज्यगी।
38 ईंखातर नूंओ दाख गो रस नूंई चमड़ै गी दीवड़ी में ई घालणो चईयै।
39 कोई आदमी पुराणो दाख गो रस पीगे नूंओ कोनी मांगै, क्यूंकै बो केसी पुराणो ई ठीक है।”