यीसू नै परखणो
4
1 फेर पवितर आत्मा यीसू नै बन उजाड में लेगी कै सैतान बिंगी परख कर सकै।
2 अर यीसू गो चालीस दिन अर रात गो बरत राखेड़ो जद बिनै भोत तकड़ी भूख लागी।
3 जद परखण आळो बिंगै कनै आयो अर केयो, “जे तू परमेसर गो बेटो है तो आ पथरां नै के रोटी बणज्य।”
4 यीसू केयो, “आदमी रोटी ऊं जींवतो कोनी रेवै, पण परमेसर गै मू ऊं निकळेडे बचन ऊं जींवतो रेवै।”a
5 फेर सैतान बिनै यरुसलेम गै पवितर नगर में ले जा'गे मिन्दर गै गुमंट पर खडयो कर'गे केयो।
6 “जे तू परमेसर गो बेटो है तो नीचे छाळ मारज्या।” क्यूंकै पवितर सासतर में इंया लिखेड़ो है,
“बो तनै संभाळण खातर सुरगदूतां नै घालेगो
कै तेरै पगां गै पथर गी लागी तो कोनी कै
अर बे तनै हातो हात चक लेवेगो।”b
7 यीसू उतर दियो कै, “पवितर सासतर में इंया बी लिखेड़ो है कै तू आपगै प्रभु परमेसर गी परख ना करी।”c
8 फेर सैतान बिनै ऊंचै प्हाड पर ले जा'गे सारो संसार दिखायो कै देख कितो सुणो अर मोटो है।
9 जे तू मेरै आ'गे झुकगे मेरूं प्रणाम करै तो ओ सारो संसार नै तनै दे देऊंगा।
10 यीसू बोल्यो, “सैतान दूर होज्या मेरूं।” पवितर सासतर केवै, “तू आपगै प्रभु परमेसर गी सेवा अर आराधना कर।”d
11 ओ सुणगे सैतान बठूं उडग्यो अर सुरगदूत आगै बिंगी देखभाल करण लागग्या।
यीसू गी सेवा करण गी सरुवात
12 यीसू नै जद ठा लागग्यो कै यूहना पकड़िज ग्यो तो पाछो गलील प्रदेस आ'ग्यो।
13 अर बो नासरत छोडगे कफरनहूम में आ'ग्यो। झिको झील गै किनारै जबलून अर नफताली गै देस में है।
14 ओ इंया होयो कै परमेसर गी बात बताण आळो यसयाह गै द्वारा केयेड़ो बो बचन पूरो करयो।
15 “जबुलून अर नफताली गै देस,
झील गै रा ऊं यरदन नेर गै पार,
गेर यहुदियां गै देस गलील में।
16 झिका लोग अंधेरे में जीया हा
बा एक म्हान जोती देखी।
अर मोत होण आळी जिग्या में रेण आळा लोगां पर
चानणो होयो।”e
17 बि टेम ई यीसू मसी परचार करणो सुरू करयो कै मन बदळो क्यूंकै सुरग गो राज कनै है।
यीसू गै द्वारा पेला चेला नै चुण्यो जाणो
18 जद यीसू गलील झील कनूं जाण लागरया तो बो दो भाईयां समौन झिको पतरस कुवावंतो अर बिंगो भाई अंद्रियास नै झील में जाळ फेंकता देख्यो। बे मछली पकड़ण आळा हा।
19 यीसू बानै केयो, “मेरै लारै होज्यो। मैं थानै आदमियां नै किंया इकट्टा करणा है मैं थानै सिखाऊंगा।”
20 बे हातो हात जाळ छोडगे बिंगै लारै चाल पडया।
21 फेर बो आ'गे चाल पड़यो अर बण देख्यो कै जबदी गो बेटो याकूब अर बिंगो भाई यूहना आपगै पिता सागै जाळ ठीक करै हा। यीसू बानै बी हेलो मारयो
22 अर बे बि टेम ई आपगी किस्ती अर आपगै पिता नै छोडगे बिंगै लारै चाल पडग्या।
यीसू द्वारा लोगां गी बीमारियां दूर करणी
23 यीसू सारै गलील प्रदेस गै सतसंग घरां में सुब समाचार गो परचार करतो अर बीमार लोगां नै ठीक करतो फिरतो हो।
24 अर सारै सिरिया प्रदेस में बिंगी बडाई होण लागी अर लोग सारै बीमार लोगा नै झिका हरेक तरियां गी बीमारी ऊं अर ओपरी आत्मा ऊं दुखी हा अर लकवै गै मारेडा अर दोरा गा मरीज हा बानै बिंगै कनै ल्याण लागग्या अर यीसू बानै ठीक कर देवंतो हो।
25 ईंखातर गलील अर दिखापोलियाf, यरुसलेम अर यहुदिया अर यरदन नदी गै पार ऊं लोगा गी मोटी भीड़ बिंगै लारै होगी।