मरकुस गो लिखेड़ो सुब समाचार
यूहना बतिस्मो देण आळो गो परचार
1
1 परमेसर गै बेटै यीसू मसी गो सुब समाचार इयां सरू होवै।
2 जियां परमेसर गै दास यसयाह परमेसर गी बात बताण आळै लिखयो कै,
“परमेसर यीसू मसी नै केयो देख मैं आपगै दूत नै तेरै आ'गे भेजूं।
झिको तेरै खातर रा तैयार करसी।”
3 बो बन उजाड में खडयो होगे जोर-जोर ऊं हेलो मारगे केण लागरया है कै,
“प्रभु गो रा तैयार करो
अर बिंगी सडका सीदी करो क्यूंकै बो आण आळो है।”
4 ईं परमेसर गी बात गै हिसाब ऊं बाद यूहना बतिस्मो देण आळो आयो झिको लोगा नै आपगो पाप ऊं माफी लेण खातर आपगै मन परमेसर कानी फेर गै बतिस्मो लेण गो परचार करतो।
5 जद सारा यहुदियां गा अर यरुसलेम गा लोग आपगै पापा गी माफी खातर बिऊं बतिस्मो लिओ।
6 यूहना ऊंट गै ऊन गा बणेड़ा गाबा पेरतो अर आपगी कडतू गै चामडै गी पेटी बांदै राखतो अर टिडी अर सेत खाणतो।
7 अर लोगा नै ओ केणतो कै मेरूं बाद झिको आण आळो है बो मेरूं ईं सकतीसाली ताकताळो है। अर मैं बांगै बुंटा गो फितो खोलण ई काबिल कोनी।
8 मैं तो थानै पाणी में बतिस्मो देऊं पण बो थानै पवितर आत्मा ऊं बतिस्मो देसी।
यीसू गो बतिस्मो अर परीक्सा
9 फेर एक दिन यीसू गलील प्रदेस गै नासरत गाम ऊं आ'गे यरदन नदी में यूहना ऊं बतिस्मो लिओ।
10 अर जद यीसू बतिस्मो लेगे पाणी ऊं उपर आया तो बा आकास नै खुलता देखयो अर पवितर आत्मा नै आपगै उपर कबूतर गी तरियां उतरती देखी।
11 अर आकास ऊं बाणी होयी कै, “तूं मेरो लाड़लो बेटो है अर मैं तेरू भोत खुस हूं।”
12 इंगै बाद में पवितर आत्मा यीसू नै गाम ऊं दूर बन उजाड में घाल दिओ।
13 अर यीसू चालीस दिन तांई बठै ई रेया अर सैतान बानै परखतो हो। बठै जंगली जानवर रेंता अर सुरगदूत आ'गे बांगी सेवा करता।
यीसू गी सेवा करण गी सरुवात
14 जद यूहना नै राजा हेरोदेस जेळ में बंद कर दिओ बिंगै बाद यीसू गलील प्रदेस में आ'गे परमेसर गै राज गो सुब समाचार गो परचार करयो।
15 अर आ'गे केण लागग्या कै अब परमेसर गो राज आ'ग्यो है बे अब थारा राजा बणण आळा ई है ईंखातर आपगै पापा नै छोड़गे बांगी बाता पर बिस्वास करो।
16 एकर बाद में यीसू गलील झील गै किनारै-किनारै जाण लागरया जद बा सीमोन अर अनद्रयास नै देखया। बे मछली पकड़ण आळा हा अर झील में जाल फेंकण लागरया।
17 यीसू बानै केयो, “मेरै लारै आओ मैं थानै परमेसर खातर आदमी पकड़ण आळा बणाऊंगा।”
18 बे बि टेम ई जाल छोड़गे बांगै लारै चाल पड़या।
19 बठू थोड़ी सी दूर जाणै गै बाद में बा जब्दी गै बेटै याकूब अर यूहना नै किसती पर जाल सांवटता देखया।
20 बा बानै देखताई बांगै कनै बुलाया अर आपगै पिता नै मजदूरा सागै किसती पर छोड़गे बांगै लारै चाल पड़या।
ओपरी बड़ेडो आदमी नै ठीक करणो
21 जद बे कफरनहूम प्रदेस में आया अर जद सब्त गो दिन आयो तो यीसू सत्संग घर में जा'गे उपदेस करण लागग्या।
22 बांगो उपदेस सुणन आळा हेरान होण लागरया क्यूंकै बे यहुदी लोगा गै धर्म गुरुआ गी तरियां उपदेस कोनी करां पण बे अधिकार गै सागै बताण लागरया।
23 बि टेम ई बठै एक आदमी हो झिकै में ओपरी बडे़ड़ी ही।
24 बो एकदम ई चिलागे बोल्यो, “हे नासरत गाम गा यीसू थारो मेरो के मेळ है? क्यू तूं मनै खत्म करण आयो है? मैं जाणू तूं पवितर जन अर परमेसर कानी ऊं आयो है।”
25 यीसू बिनै ललकारयो कै, “चुप होज्या अर इमूं निकळज्या।”
26 जद ओपरी जोर ऊं कूकगे बिनै मरोडी देगे निकळगी।
27 ओ देखगे लोग हेरान होगे केण लागग्या कै आ के बात है? ओ तो अधिकार गै सागै सीख दय। झिकै ऊं ओपरियां बी आंगो केणो मानै।
28 यीसू झिको चमत्कार करयो बिंगी खबर गलील प्रदेस गै भोत सै गामा में फेलगी।
भोत सारा बीमारा नै ठीक करणो
29 फेर बे सत्सग घर ऊं चाल गै सीधा याकूब अर यूहना गै सागै सीमोन अर अन्द्रियास गै घरै गेया।
30 बठै सीमोन गी सासू बुखार में सुती पड़ी। अर घर आळा दबादब बिंगै बारै में यीसू नै बतायो।
31 जद यीसू बिंगै कनै आ'गे बिनै आपगै हात ऊं खडी करी अर बिंगो बुखार उतर ग्यो अर बा लुगाई बांगी सेवा में लागगी।
32 आथण पेर गी जद सूरज डूब गयो बि टेम लोग झिका बीमारा हा अर झिका में ओपरियां गी कसर ही बानै यीसू कनै ल्यावण लागग्या।
33 अर बठै गा भोत सारा लोग बारनै कनै भेळा हो'ग्या।
34 अर यीसू भोत जणा नै बीमारियां ऊं ठीक करया झिका न्यारी न्यारी बीमारियां ऊं दुखी हा। अर भोत जणा मूं ओपरियां काड़ी। बा ओपरियां गा मू ई बंद कर दिया। क्यूंकै बे जाणै ही कै यीसू कुण।
यीसू गी एकलै गी पराथना
35 दूसरै दिन बे दिनगे दिनगे उठगे घर ऊं दूर सुनसान जिगया में जा'गे पराथना करण लागग्या।
36 जद सीमोन अर बिंगा साथी बानै ड़ूंडण गेया।
37 जद बे बानै मिल गया तो केण लागग्या कै थानै सारा जणा डूंड़ण लागरया।
38 जद बा केयो, “आज्यो आपां नेडै़ नेडै़ गी बस्तिया में चालगे परचार करां। ईंखातर ई मैं अठै आयो हूं।”
39 अर बे सारै गलील प्रदेस गै सतसंग घरां में परचार करण लागग्या अर लोगा मूं ओपरियां बी काड़तां रेया।
कोढी नै ठीक करणो
40 यीसू कनै एक कोढ होयड़ो आदमी आयो अर झुकगे बाऊं बिनती करण लागग्यो कै जे थे चाओ तो मनै ठीक कर सको।
41 यीसू नै बि पर दया आ'गी अर आपगो हात बिंगै लगागे केयो, “मैं तनै ठीक करणो चाऊं तूं ठीक होज्या।”
42 अर बो हातो हात ई ठीक हो'ग्यो।
43-44 अर बिनै सखताई ऊं जाणतै टेम केयो, “मैं झिको कीं करयो बिंगै बारे में किंगैई ना बता अर जा'गे मिन्दर गै याजक नै आपणै आप जांच करणो चईयै झिकै ऊं बिनै आ लागै तूं ठीक हो'ग्यो है।”
45 पण बण जा'गे सारा नै बता दिओ अर बांगी बात सारै फेलगी। ई कारण ऊं यीसू गाम में जा कोनी सकया क्यूंकै लोगा गी भीड़ लाग जावंती। ईंखातर बे गाम ऊं दूर सुनसान जिग्यां में रेण लागग्या। फेर ई चारू पासै गा लोग बांगै कनै आंता रेया।