लकवै गै रोगी नै ठीक करणो
2
1 केई दिना गै बाद में यीसू पाछा कफरनहूम प्रदेस में आया अर लोगा नै लागग्यो कै बे किंगैई घरै आयेड़ा है।
2 फेर इता लोग भेळा हो'ग्या कै बारनै कनै पग राखण नै ई जिग्या कोनी बची अर यीसू बानै बचन सुणाण लागरया।
3 बि टेम चार आदमी एक लकवै गै रोगी नै चक'गे बांगै कनै ल्याया।
4 पण जद बे बोळी भीड़ गै कारण बांगै कनै कोनी जा सक्या तो झिकै मकान में यीसू बैठया बि मकान गी छत नै अधेड़ गै सणै माची बि आदमी नै बांगै सामै उतार दियो।
5 यीसू बां लोगा गो बिस्वास देख गै बि लकवै गै रोगी नै केयो, “बेटा तेरा पाप माफ होया।”
6 बि टेम बठै केई सासतरी बैठया हा। बे आप आपगै मन में सोचण लाग्या कै,
7 ओ आदमी इयां क्यामी केण लागरयो है परमेसर गै अलावा दूसरो कोई पाप माफ कर ई कोनी सकै ओ तो परमेसर गी निंदा करण लागरयो।
8 यीसू जद ई आत्मा में जाणग्या कै ऐ आपगै मन में इंया सोचण लागरया है जद बां बानै केयो, “के थे थारै मन में हिस्यो क्यूं सोचण लागरया हो?”
9 थे जाणो हो कै ईं आदमी ओ केणो सोरो है कै, “जा तेरा पाप माफ होया,” पण ओ केणो सोरो कोनी कै, “उठ, खड़यो हो अर आपगी मांची चक'गे उड़ज्या।”
10 पण अब थे जाणल्यो कै मिनख गै बेटै नै धरती पर पाप माफ करण गो अधिकार है बां बि लकवै गै रोगी नै केयो कै,
11 मैं तनै केऊं, “तेरी मांची चकले अर आपगै घरै उड़ज्या।”
12 जद बो खड़यो होयो अर सारा गै सामणै आपगी मांची चक'गे घरै उड़ग्यो। ओ देख गै सारा हेरान हो'ग्या अर परमेसर गी बड़ाई करण लागग्यो कै इयां पेलां कदी कोनी देखयो।
लेवी नै बुलाणो
13 एकर यीसू कफरनहूम ऊं चाल गै गलील झील गै किनारै पर गेया। बठै लोगा गी भीड़ भेळी होण लागगी अर यीसू बानै बचन सुणाण लागग्या।
14 इंगै बाद में यीसू बठूं जाण लागरया तो बा रा में हलफई गै बेटै लेवी नै चुंगी गी चोकी पर चुंगी लेंतो देखयो। यीसू बिनै केयो, “मेरै लारै आ'ज्या।” लेवी दबादब उठगे बांगै लारै चाल पड़यो।
15 एक दिन यीसू आपगै चेला गै सागै लेवी गै घरै रोटी जीमण लागरया अर बांगै सागै केई ओर चुंगी लेण आळा रोटी जीमण लागरया झिका नै यहुदी धर्म गा नेता पापी मानता हिस्या केई लोग यीसू गै लारै चालता।
16 बठै फरीसी गुट गा केई लोग हा झिका यहुदी नेम सिखाणता। यीसू बांगै सागै रोटी जीमता देख्या झिका नै बे पापी लोग मानता। जद बे यीसू गै चेला नै पूछण लाग्या, “थारो गुरू चुंगी लेण आळा अर पापी लोगा सागै खाणो पीणो क्यामी करै?”
17 यीसू ओ सुण गै बानै समझायो कै, “चंगा भले लोगा नै डाक्टर गी लोड़ कोनी पडै़ पण बीमार लोगा नै पडै़। मैं धरमी लोगा नै कोनी पण पापी लोगा नै सुधारण आयो हूं।”
बरत गो सवाल
18 एकर यूहना गै चेला अर फरीसी गुट गै लोगा बरत राख्यो। केई लोग यीसू नै आ'गे पूछयो कै यूहना गा चेला अर फरीसी गुट गा लोग बरत राखै पण थारा चेला क्यूं कोनी राखै?
19 यीसू बानै केयो, “जद तांई बीन बरातीया गै सागै होवै बे बरत कोनी रख सकै।”
20 पण बो दिन आवैगो जद बीन आऊं न्यारो होज्य'गो बि टेम ऐ बरत राखैगा।
21 कोई आदमी पुराणै कपडै़ पर नुए कपडै़ गी कारी कोनी लगावै। इयां करेगो तो बा कारी भेळी होगे पुराणै कपडै़ नै पाड़ दयगी।
22 इंया ई कोई आदमी नूंओ दाखरस नै पुराणै चामडै़ गै झोलै में कोनी भरै। क्यूंकै इंया करण ऊं नुओ दाखरस फूल गै चामडै़ गै झोलै नै पाड़ दयगो। नूंओ दाखरस नै तो नूंओ झोलै में ई भरिजै।
सबत गो प्रभु
23 एकर सबत गै दिन यीसू अर बिंगो चेला खेता माखर जाण लागरया तो चालता चालता बे चेला कणक गी बालां नै तोड़ गै भोर भोर गै खाण लागग्या।
24 फरीसी गुट गा केई लोग ओ देख गै यीसू नै पूछयो, “तेरा चेला आज गै दिन हिस्यो काम क्यामी करण लागरया?”
25 यीसू बानै केयो, “थे पढयो कोनी कै जद दाऊद अर बिंगा चेला नै भूख लागी तो बा के करयो?
26 बां सारा ऊं मोटो याजक अबियातर गै दिना में परमेसर गै भवन में जा'गे मिन्दर में जा'गे चढाईडी रोटी खाई झिकी नै याजक गै सिवाय ओर कोई कोनी खा सकै हो। क्यूंकै ओ नेम रखेड़ो हो।”