सुकेड़ै हात गै आदमी नै ठीक करणो
3
1 फेर यीसू एकर सबत गै दिन सत्संग घर में गेया बठै एक आदमी हो झिकै गै हात गै लकवो होयड़ो।
2 जद केई लोग यीसू पर दोस लगाण गी ताक में बैठया कै देखा आपां ओ आज गै दिन इनै ठीक करै, कै कोनी?
3 यीसू बि लकवै होयडै़ आदमी नै सारा गै सामी खडयो होण खातर केयो।
4 जद यीसू बा दोस लगाण आळै आदमिया नै पूछयो कै नेम विधान गै अनुसार सबत गै दिन आच्छो काम करणो चईयै या बुरो? किंगी जान बचाणी चईयै या ना बचाणी चईयै? पण आ बाता गो बा कनै कोई जबाब कोनी हो।
5 जद यीसू चारू मेर खड़यै बा लोगा नै गुसे ऊं देख्या। अर बि लकवै गै आदमी नै केयो तेरो हात आगै कर अर बण आपगो हात आगै करयो अर बो जदी ठीक हो'ग्यो।
6 जद फरीसी लोग बारै आ'गे यीसू नै मारण गी योजना बणाण लागग्या।
भीड़ गो यीसू गै लारै होणो
7 इंगै बाद में यीसू आपगै चेला सागै गलील झील गै किनारै उड़ग्या। अर लोगा गी मोटी भीड़ बा कानी चाल पड़ी।
8 झिकी गलील अर यहुदियां प्रांत गै गांवा ऊं, यरुसलेम ऊं, इदूमिया प्रांत गांवा ऊं, यरदन नदी गै दूसरी ओर गै गांवा ऊं, सूर अर सेदा प्रांत गांवा ऊं ओयेड़ी। ऐ सारा यीसू गै चमत्कारा नै सुण गै बा कनै आया।
9 भीड़ बोळी होण गै कारण यीसू आपगै चेला नै केयो कै मेरै खातर एक किसती तैयार राखो। जिऊं ऐ लोग मनै दबा ना सकै।
10 क्यूंकै बा भोत सै लोगा नै ठीक करया ईंखातर भोतसा लोग बांगै हात लगाणो चावा झिका रोगी हा।
11 अर झिकै लोगा में ओपरियां गी कसर बा लोगा गी ओपरियां यीसू नै देख आ'गे लीटण लाग ज्यावंती अर चिलागे केवंती कै तूं परमेसर गो बेटो है के?
12 पण यीसू ओपरियां नै खबरदार करेड़ी कै बे ना बतावै कै यीसू कुण है।
बारा खास चेला नै पक्का करणा
13 फेर यीसू एक पहाड़ पर चढ'ग्या अर झिका नै बे चावा बानै कनै बुलाया।
14-15 जद बा बामूं आपगा बारा जणा नै आपगै सागै रेण खातर अर लोगा में परचार करण खातर, अर लोगा मूं ओपरी काड़ण गो अधिकार देगे बानै चुण लिया।
16-19 झिकै बारा लोगा नै बण चुणया बे ऐ है समौन झिकै नै यीसू पतरस नाम दिओ, जब्दी गो बेटो याकूब, यूहना, अन्द्रियास, फिलिप्पुस, बरतुलमे, मत्ती, थोमा, हलफई गो बेटो याकूब, तदाई, सीमोन झिको देस भगत हो, अर यहूदा इसकरोती झिकै यीसू नै दुसमणा गै हात पकड़ायो हो।
यीसू अर बेलजबूल
20 फेर यीसू एक घर आया तो बठै लोगा गी भीड़ इती भेळी होगी कै रोटी जीमण नै ई सांस कोनी मिल्यो।
21 जद यीसू गै घराणै ओ ठा लागग्यो कै बिनै रोटी जीमण ई टेम कोनी मिल्यो तो बां बानै केयो, “इंगो दिमाक खराब हो'ग्यो। अर बे बानै लेण खातर गेया।”
22 बठै यरुसलेम ऊं आयेड़ा यहुदी धर्म गा लोग केण लाग्या, “इंगै मां सैतान गो प्रधान बेलजबूल है अर ओ बिंगी मदद ऊं ओपरिया नै बारै काडै़ है।”
23 यीसू बानै कनै बुला'गे उदारण ऊं समझाण लाग्या कै, “सैतान गो प्रधान आपगै सैतान नै किंया भगा सकै अर काड़ सकै।
24 जे एक राजा गै राज आपस में फूट पड़ज्य तो बिंगो राज किता दिन चालै।
25 जे एक घर में फूट पड़ज्य तो बो घर किंया बदंयो रे सकै।
26 अर सैतान जे आपगै भूता नै काड़ण लागज्यगो तो बिंगो सारो राज खत्म होज्य'गो।
27 जे कोई आदमी एक तकडे़ आदमी गै घर नै लूटणो चावै तो पेलां बि तकडे़ आदमी नै बांधणो पडे़गो। बिंगै बाद में ई बिंगै घर नै लूट सकैगो।
28 मैं थानै एक पक्की बात बताऊं कै परमेसर हर प्रकार गै पाप अर निंदा नै माफ कर दयगा।
29 जे कोई पवितर आत्मा गी निंदा करेगो तो बिनै कदी माफ कोनी करेगा। पण बो नरका गो भागी बणेगो।
30 यीसू आ बात ईंखातर केई कै लोग केवा कै यीसू में ओपरी गो निवास है।”
यीसू गी मा अर भाई
31 इंगै बाद में बठै यीसू गी माता अर बांगा भाई आया। अर बां बारूं ई बुलावो भेज्यो।
32 यीसू गै चारूंमेर लोगा गी भीड़ बैठी अर बां यीसू नै आ'गे केयो, “थारी माता अर थारा भाई थानै मिलण खातर बारै खड़या है।”