यीसू सब्त गै दिन गो प्रभु
12
1 यीसू सब्त गै दिन खेतां माखर आपगै चेलां सागै जाण लागरया हा। जद चेला नै भूख लागी अर बे कणक गी बालां मरोडगे खाण लागग्या।
2 फरीसियां बानै देखगे केयो, “देख तेरा चेला के करण लागरया है? ओ सब्त गै दिन करणो ठीक कोनी।”
3 जद यीसू बानै पूछयो, “थानै ठा कोनी कै जद दाऊद अर बिंगै साथियां नै भूख लागी तो बा के करयो?
4 बा परमेसर गै मिन्दर में बड़गै चढायेड़ी पवितर रोटी किंया खाई? बानै इंया करणो नेम विधान गै खिलाफ हो। बा रोटियां नै सिरफ याजक खा सकां।
5 नेम विधान गै द्वारा थानै ईं बात गो पतो होणो कै याजक लोग मिन्दर में सब्त गै दिन नेम विधान नै तोडै़, फेर बी बे दोसी कोनी ठेरै।
6 पण मैं थानै केऊं मिन्दर ऊं मोटो आदमी अठै है।
7 सासतर इंया केवै लोगां गै द्वारा करेड़ै बलिदान ऊं आच्छी दया है। थानै ईं बात गो पतो है तो थे बिना दोस गै लोगां नै दोसी कोनी बणावंता।a
8 मिनख गै बेटै नै सब्त गै दिन गो बी अधिकार है।”
सुकेड़ै हात आळै नै ठीक करणो
9 फेर बो बठूं चालगे यहुदियां गै सतसंग घर में उडग्यो।
10 बठै एक आदमी हो। बिंगो एक हात सुकेड़ो हो। जद लोगां बिनै पूछयो, “मूसा गै नेम विधान ऊं सब्त गै दिन कोई आदमी नै ठीक करणो सई है या कोनी? क्यूंकै बे लोग यीसू पर दोस लगाणो चावा।”
11 यीसू बानै केयो, “मान्ल्यो थारै में किंगैई कनै एक ई भेड़ है। बा सब्त गै दिन कुऐ में पड़ज्य तो बिनै बारै कोनी काडोगा?
12 पण आदमी तो फेर ईं भेड़ ऊं भोत जादा किमती है। ईंखातर मूसा गै नेम विधान गै अनुसार सब्त गै दिन भलाई करणी सई है।”
13 जद बण बि सुकेड़ै हात आळै आदमी नै केयो, “तेरो हात आ'गे कर” अर बिंगो हात बि टेम ई ठीक कर दियो।
14 फेर फरीसियां बठूं बारे जा'गे बिनै मारण गो तरिको डूंडण लागग्या।
15 यीसू आ बात समझग्यो अर बठूं उडग्यो अर लोगां गी भीड़ बिंगै लारै चाल पड़ी। बण बानै ठीक करया अर केयो।
16 थे मेरै बारे में लोगां नै कीं ना बताईयो।
17 ओ ईंखातर होयो कै यसयाह परमेसर गी बात बताण आळै गै द्वारा केयेड़ो बचन पूरो हो'ज्य।
18 “ओ मेरो सेवक है झिकै नै मैं चुण्यो है,
ओ मेरो लाडलो है, मैं इऊं खुस हूं।
आपगी आत्मा इनै देऊंगा।
अर सारै देसां गै सारै लोगां नै न्याय गो समाचार दयगो।
19 बो कदी लडाई कोनी करेगो।
लोग इनै कदी गळियां में कोनी सुणेगा
अर ओ कदी रोळा कोनी मचावेगो।
20 ओ लटकेडे़ सरकाणां नै कोनी तोडेगो,
ओ बुजते दीये नै बी कोनी बुजावेगो।
जद तांई लागग्यो रेवै जद तांई न्याय पर जीत ना हो'ज्य।
21 अर सारा लोग बिंगै उपर ई आस राखसी।”b
यीसू अर बेलजबूल
22 फेर लोग यीसू कनै हिस्यै आदमी नै लेगे आया झिको आंधो गूंगो अर बिमै ओपरी बी ही। बण बिनै ठीक कर दियो बो देखण अर बोलण लागग्यो।
23 ओ देखगे सारा हेरान हो'ग्या। अर केण लागग्या, “ओ आदमी दाऊद गो बेटो हो सकै।”
24 जद फरीसियां ओ सुणयो तो केण लागग्या, “ओ सैतान गै राजा बेलजबूल गी मदद ऊं ओपरी काडै़।”
25 यीसू बांगै मन गी बात जाणग्यो, जद बानै केयो, “झिकै राज में फूट पड़ज्य तो बो चालै कोनी। जे कोई घर में फूट पड़ज्य तो बो बी कोनी बण्यो रेवै।
26 इंया जे सैतान अपणै आपनै बारै काड़ण लागग्यो तो बिंगै आपगै घर में ईं फूट पड़गी तो बिंगो राज किंया बण्यो रेसी?
27 जे आ बात साची है कै बेलजबूल गी मदद ऊं ओपरी काडूं तो सारा चेला किंगी मदद ऊं काडै़? इऊं सारा समझेगा कै थे गळत हो।
28 जे मैं ओपरियां परमेसर गी आत्मा ऊं बारै काडूं तो आ बात सच्च होवै कै परमेसर गो राज थारै कनैई आ'ग्यो।
29 फेर एक तकडे़ आदमी गै घर में बड़गै चोरी किंया कर सकै? जद तांई बिनै बांदयो ना जावै बिंगै घर में चोरी कोनी कर सकै।
30 झिको मेरो साथी कोनी बो मेरो बिरोधी है। अर झिको मेरै सागै भेड़ा गी तरियां लोगां नै भेळा कोनी करावे बो बानै खिण्डाण आळो है।
31 ईंखातर मैं थानै केऊं, आदमी गा सारा पाप अर चुगली माफ करीज्येगी। पण जे पवितर आत्मा गै खिलाफ बोल्यो तो बिंगी माफी कोनी मिलैगी।
32 जे कोई मिनख गै बेटै गै खिलाफ कीं केवेगो तो बिनै माफी मिलज्येगी। पण जे कणी पवितर आत्मा गै खिलाफ कीं केयो, बिनै माफ कोनी करिज्येगो, ना ईं लोक में, ना परलोक में।”
दरखत अर बिंगो फळ
33 “थे लोग जाणो हो कै आच्छा फळ ल्याण खातर आच्छो दरखत होणो चईयै अर माड़ा दरखत ऊं माडै़ फळ ई मिलै क्यूंकै दरखत गी पिछाण बिंगै फळा ऊं होवै।
34 हे सांप गा बच्चों, जद थे आप ई माड़ा हो तो आच्छी बात किंया कर सको? आदमी गा सब्द बिंगै मन में भरेड़ा है, बे बठूं ई निकळै है।
35 एक आच्छो आदमी झिकी अच्छाई बिंगै मन में भरेड़ो है बिऊं आच्छी बात ई बारै निकळै। अर बुरे आदमी कनूं बुरी बात निकळै।
36 पण मैं थानै केऊं, न्याय गै दिन हर एक आदमी झिकै गळत बात बोली है बिनै ईं बात गो हिसाब देणो पड़सी।
37 तू आपगी बाता ऊं गुनेगार अर साऊकार बणायो जावैगो।”
योना गो निसान
38 फेर कीं नेम सिखाण आळा अर फरीसियां बिनै केयो, “हे गुरूजी, म्हे थारूं चमत्कारां गो निसान प्रकट करता देखणो चावां।”
39 यीसू उतर दियो, “थे लोग बुरा अर बेबीचार काम करया अर फेर बी चमत्कार गो निसान देखणो चावो। मैं परमेसर गी बात बताण आळै योना गै निसान गै सिवा ओर कोई दूसरो निसान कोनी देयिजै।
40 जिंया योना तीन दिन रात एक समुन्दर गी मोटी मछली गै पेट में रेयो बिंया ई मिनख गो बेटो तीन दिन रात धरती गै मां रेवेगो।
41 न्याय गै दिन नीनवे सैर गा लोग आज गी पीढी गै लोगां गै सागै खड्या होवैगा अर बानै दोसी बणावेगा। क्यूंकै बा योना गो संदेस सुणगे मन बदळ्यो। अब अठै योना ऊं मोटो है।
42 न्याय गै दिन दिखणाद गी राणी ईं पीढी गै लोगां सागै खडी हो'सी अर बानै गुनेगार बणावेगी। क्यूंकै बा धरती गै दूसरै पासै ऊं सुलेमान गो संदेस सुणगे आई। पण अठै तो सुलेमान ऊं मोटो है।
43 जद कोई ओपरी आदमी नै छोडै है तो बा आराम खातर सुखी जिग्या ढूंढै, पण बिनै लादै कोनी।
44 जद बा सोचै झिकै घर मूं आयी बिमै ई पाछी उड़ जाऊं। जद बा पाछी जावै तो बिनै बो घर साफ सुतरो अर सजाईड़ो लादै।
45 अर आवंती आपगै सागै सात ओर ओपरियां नै ल्यावै झिकी बिऊं खतरनाक होवै। अर फेर बी आदमी गी हालत ओर बी माडी होज्यै। आज गी पीढी गै लोगां गी हालत बी हिसी होवैगी।”
यीसू गी मा अर भाई
46 जद बो लोगा ऊं बात करण लागरया तो बिंगा मा अर भाई बारै खडया अर बे बिऊं बात करण गी उडीक करां।
47 जद कणी आ'गे केयो, “तेरी मां अर भाई बात करण खातर अडीक है।”
48 यीसू बिनै उतर दियो, “कुण हे मेरी मां, अर कुण है मेरो भाई?”
49 जद बण आपगै चेला कानी हात कर'गे केयो, “ऐ है मेरी मां अर मेरा भाई।
50 मेरो पिता झिको सुरग में है झिको बिंगी इच्छा पर चालै है बो मेरी मां, मेरो भाई अर मेरी भेन है।”