चार हजार लोगां नै रोटी खुआणी
8
1 बा दिना में एकर ओर भीड़ यीसू गी बाता सुणन खातर भेळी होयी। पण भीड़ कनै खाण नै कीं कोनी। ईंखातर यीसू आपगै चेला नै केयो,
2 “मनै ईं भीड पर भोत तरस आण लागरयो। ऐ सारा तीन दिना ऊं मेरै सागै रेण लागरया है। अर खाण खातर आ कनै कीं कोनी बच्यो।
3 जे मैं आनै घरै भेज दिआ तो ऐ रा में ई बेहोस हो'ज्यगा। कीं लोग तो भोत दूर ऊं आयेड़ा है।”
4 बांगै चेला केयो, “बन उजाड में इती रोटी कठूं आसी जिऊं ऐ धाप ज्य।”
5 यीसू बानै पूछयो, “थारै कनै किती रोटी है,” बा केयो, “सात।”
6 जद बा सारै लोगा नै बैठण खातर केयो अर बे रोटी लेगे परमेसर गो धन्यावाद कर'गे तोड़ी अर आपगै चेला नै देंता गेया अर बे सारा बांटता गेया।
7 बांगै कनै थोडी़ सी छोटी मछलिया बी ही बा धन्यावाद कर'गे बे बी लोगा नै देण गी आग्या दी।
8 सारा खा'गे धाप ग्या अर बाकी बचेडै़ रोटियां गै टुकड़ा गा चेला सात टोकरा भर लिआ।
9 बे लोग चार हजार गै सारै सारै हा। बाद में बा सारै लोगा नै विदा करया।
10 अर यीसू आपगै चेला सागै किस्ती पर चड़गे दलमनूता प्रदेस में उड़ग्या।
फरीसियां गै द्वारा सुरगीय निसान गी मांग
11 बठै कीं फरीसी गुट गा लोग यीसू ऊं आ'गे सुआल पूछण लागग्या। अर बानै परखण खातर कै ओ परमेसर गो बेटो है या कोनी ईंखातर बांऊ कोई निसानी मांगण लागग्या।
12 बा आपगी आत्मा में जाण लिओ अर आह भरगे केयो, ईं जुग गा लोग क्यामी निसान मांगै। पण मैं थानै साची केऊं ईं जुग गा लोगा नै कोई निसान कोनी दियो जावैगो।
13 ओ केगे यीसू आपगै चेला सागै किस्ती पर चढ'गे झील गै दूसरै किनारै पर उड़ग्या।
फरीसिया अर हेरोदेस गो खमीर
14 चेला आपगै सागै रोटी ल्याणी भूल ग्या। बा कनै किस्ती में एक ई रोटी ही।
15 यीसू बानै चेताया कै, “देखो फरीसियां अर हेरोदेस गै लोगा ऊं सावधान रेईयो।”
16 चेला समझाया कोनी तो आपस में बिचार करण लागग्या कै, “ऐ आ बात ईंखातर केवै कै, के आपणै कनै रोटी कोनी?”
17 यीसू नै बांगी बात गो ठा लागग्यो। अर बा पूछयो, “थे रोटी ना होण'गी बात क्यामी करण लागरया हो। थारो दिल कठोर होयड़ो है थे देख गै ई कोनी समझो।
18 थे झिकी थारी आंखा ऊं देखो अर काना ऊं सुणी ही बा बात थानै याद कोनी।
19 कै पांच हजार लोगा नै पांच रोटियां ऊं सलटा दिआ हा जद थे बाकी किती टोकरियां भरी।” बा केयो, “बारा टोकरियां।”
20 फेर यीसू पूछयो, “जद मैं चार हजार लोगा नै सात रोटियां ऊं धपाया तो थे बाकी बचेड़ी रोटियां गा किता टोकरा भरया।” चेला केयो, “सात टोकरा।”
21 यीसू बानै केयो, “फेर ई थे रोटी गी चिंता करण लागरया हो।”
बेतसैदा में एक आंधै नै ठीक करणो
22 जद बे बेतसैदा गाम में आया तो बठै लोग एक आंधै आदमी नै यीसू कनै ल्यागे बांऊ बिनती करण लाग्या कै ईं पर दया करो। हात लगाओ।
23 यीसू बि आंधै आदमी गो हात पकड़ गै गाम ऊं बारै लेग्या अर बिंगी आंख पर थूथकारो घाल गै हात मेल्यो अर बिनै पुछ्यो, “तनै कीं दिख कै?”
24 बण आंख चक गै इनै बिनै देख्यो अर केयो, “मनै आदमी भाजतै दरखता गी तरियां दिखै।”
25 दूसरै फेर यीसू बिंगी आंख पर हात रखयो अर बो आदमी देखण लागग्यो।
26 यीसू बिनै गाम ऊं दूर होगे घरै जाण गो केयो, “झिकै ऊं बो चमत्कार गै बारै में किनैई बता ना सकै।”
पतरस गो यीसू नै मान लेणो
27 फेर यीसू अर बिंगा चेला गलील प्रांत ऊं केजस्यिन फिलिप्पी सैहर गै आसै पासै गै गामां में गेया। रा में यीसू चेला नै पूछयो, “मनै लोग के केवै?”
28 चेला उतर दियो, “केई लोग तो यूहना बतिस्मो देण आळो केवै अर केई एलियाह अर केई परमेसर गी बात बताण आळो केवै।”
29 बां बानै पूछयो, “थे मनै के केवो,” जद पतरस बोल्यो, “थे मसी हो।”
30 यीसू बानै चेतायो कै, “मेरै बारै में ओ किनैई ना केईयो।”
आपगी मोत गै बारे में यीसू गी बात
31 फेर यीसू बानै समझाण लागग्या कै, “मिनख गै बेटै खातर ओ जरूरी है कै बो दुख उठावै। समाज गा मोटा ग्यानी लोग, मुख्य याजक अर धर्म गा नेम सिखाण आळा मनै मसी मानण ऊं इनकार करै अर लोग जान ऊं मार दयगा ओ बि तीसरै दिन पाछो जीज्यगो।”
32 आ बात यीसू आपगै चेला नै खुल गै बताई, ईं पर पतरस यीसू नै न्यारी जिग्या ले जा'गे डांटण लागग्यो।
33 पण यीसू मूड़ गै आपगै चेला कानी देख्यो अर फेर पतरस नै फटकार गै केयो, “हे सैतान मेरी नजरा ऊं दूर होज्या। तूं परमेसर गी बाता पर कोनी पण मिनख गी बात पर मन लगावै।”
34 फेर बा आपगै चेला सागै भीड़ नै बुलाई अर बानै केयो, “जे कोई मेरै लारै आणो चावै तो पेलां आपणै आपगो त्याग कर देवै। फेर मेरै लारै चालै।
35 क्यूंकै झिको आपगै प्राणा नै बचाणो चावैगो बो बिनै खोवेगो। अर झिको मेरै ईं सुब समाचार गै खातर आपगा प्राण खोवेगो बो आपगा प्राण बचावेगो।
36 जे कोई आदमी सारी दुनिया नै आपगी मुठी में कर ल्य अर अनंत जीवन ना पा सकै तो फेर बिनै के लाभ होयो।
37 मुकती ऊं बड़गै कोई किमती चीज कोनी।
38 जे कोई ईं संसार गै बुरा लोगा गै सागै मेरो चेलो बणन ऊं अर मेरी बाता नै मानण में सरमावे गो तो बिनै मिनख गो बेटो जद बो आपगै पिता परमेसर गी मेमा सागै सुरगदूता सागै धरती पर आवैगो तो बिनै बी मानण ऊं सरमावैगो।”