रीति रिवाज गो सवाल
15
1 जद केई फरीसी अर नेम सिखाण आळा यरुसलेम ऊं यीसू कनै आया अर पूछण लागग्या।
2 तेरा चेला म्हारै बडेरा गी रीति रिवाज नै क्यूं कोनी मानै। बे रोटी जीमण ऊं पेला हात कोनी धोवै?
3 यीसू बोल्यो, “थे थारी रीति रिवाज गै कारण परमेसर गै रीति नै क्यामी छोडो?”
4 क्यूंकै परमेसर गो केयेड़ो है, “तू आपगै माता पिता गो आदर कर।a झिको आपगो माता पिता नै माड़ो केवै बिनै मार देणो चईयै।”b
5 पण जे कोई आपगै माता पिता नै केवै कै मैं आपगो सारो कीं परमेसर नै दे दियो, अब मैं मदद कोनी कर सकूं।
6 ईंखातर बिनै आपगै माता पिता गो आदर करण गी लोड़ कोनी। इऊं थे परमेसर गो बचन तोड़ दियो।
7 हे पाखंडियों, थारै बारे में यसयाह ठीक ई लिख्यो है।
8 ऐ लोग होटा ऊं मेरो आदर करै। पण आंगो मन मेरूं दूर है।
9 मेरै खातर आंगी भगती अण होई है। आंगी भगती गा नेम लोगां गा बणाएडा है।c
असुद्ध करण आळी बातां
10 जद बण भीड़ नै आपगै कनै बुला'गे केयो, “सुणो अर समझो।
11 आदमी गै मूं में झिको कीं जावै बो बिनै अपवितर कोनी करै। पण बिंगै मू ऊं निकळेड़ी बात बिनै अपवितर करै।”
12 जद चेला यीसू कनै आ'गे केयो कै, “थारी बात गो फरीसियां भोत बुरो मान्यो।”
13 यीसू उतर दियो, “हरेक बूंटो झिको मेरै पिता परमेसर गी ओर ऊं कोनी लागेड़ो बो पटिज्येगो।
14 बानै छोडो। बे तो आंधा गा आंधा गुरू है। जे एक आंधो दूसरै आंधै नै रा बतावै तो दोनूं खड्डे में पड़सी।”
15 जद पतरस बिनै केयो, “म्हानै अपवितर होण'गी मिसाळ गो अरथ समझावो।”
16 यीसू बोल्यो, “अजे तांई थे समझा कोनी के?
17 थे जाणो कीं कोनी कै झिको कीं मू में जावै बो बिंगै पेट में पड़ै अर मल बणगे बारै आ'ज्यै।
18 झिको आदमी गो मूं ऊं बारै आवै बो बिंगै मन ऊं निकळै। बो ई बिनै अपवितर करै।
19 क्यूंकै बुरा बिचार, हत्या, बेबीचार, पराई लुगाई कनै जाणो, झूठी गवाई, चोरी अर निन्दा मन ऊं निकळै।
20 ऐई बातां है झिकै ऊं आदमी अपवितर होवै। बिना हात धोये रोटी जीमणूं अपवितर कोनी होवै।”
कनानी जात गी लुगाई गो बिस्वास
21 फेर बो बि जिग्यां नै छोड गै सूर अर सेदा कानी चाल पड़यो।
22 बठै एक कनान गी लुगाई आई अर बा रोळा मचाण लागी, “हे प्रभु, दाऊद गा बेटा, मेरै पर दया कर। मेरी बेटी में ओपरी है।”
23 यीसू कीं कोनी बोल्यो। जद बिंगा चेला आ'गे बिनती करण लागग्या, आ आपणै लारै रोळा मचावंती आवै है, इनै दूर करां।
24 यीसू बोल्यो, “मनै इसराएल गै गमेड़ी भेड़ा नै डूंडण गै अलावा कीं खातर कोनी भेज्यो।”
25 जद बण लुगाई बिंगै सामै झुकगे बिनती करी, “हे प्रभु मेरै पर दया कर।”
26 यीसू उतर दियो, “ओ ठीक कोनी कै टाबरां गी रोटी घर गै कुत्तां आ'गे रेड़ दयो।”
27 बा बोली, “ओ ठीक है प्रभु कै आपगै मालिक गी थाळी मूं पडेड़ा थोड़ा सा टुकड़ा घर गा कुता बी खाल्यै।”
28 जद बण केयो, “तेरो बिस्वास भोत मोटो है। झिको कीं तू चावै बो पूरो होवै।” जद ई बिंगी बेटी ठीक होगी।
भोत सारा रोगियां नै ठीक करणो
29 फेर यीसू बठूं गलील झील गै किनारै उडग्या। बठै एक प्हाड़ पर चड़गे बैठग्यो।
30 मोटी सारी भीड़ बिमै लंगड़ा, आंधा, हीण, गूंगा, बेरा अर बीमार लोगां नै लेगे बिंगै कनै आया। अर बिंगै पगां कनै सुणा दिया। अर यीसू बानै ठीक करया।
31 लोग बानै ठीक होयड़ा देखगे भोत हेरान होया अर बे इसराएल गै परमेसर गी बडाई करण लागग्या।
चार हजार लोगां नै रोटी जिमाणी
32 जद यीसू आपगै चेला नै बुला'गे केयो, “मनै ईं भीड़ पर तरस आवै। क्यूंकै आ लोगां तीन दिन हो'ग्या, मेरै सागै रेणवंतानै। आ कनै खाण नै कीं कोनी। मैं आनै भूखा कोनी जाणदयूं, कठै रा में भूखा पड़ ना जावै।”
33 जद चेला बोल्या, “ईं बन उजाड में इती रोटी कठूं ल्यावां?”
34 यीसू बानै पूछयो, “थारै कनै किती रोटी है? बा केयो सात रोटी अर कीं छोटी मछलियां है।”
35 यीसू लोगां नै नीचे बैठण गो केयो।
36 अर बा सात रोटियां अर मछलियां नै लेगे परमेसर गो धन्यवाद करयो अर रोटी तोड़गे चेला नै दी अर बे बांटता गेया।
37 बे जद तांई बांटता गेया जद तांई बे धाप्या कोनी। फेर बा बचेड़ी रोटियां गी सात टोकरी भरली।
38 लुगाईयां अर टाबरां नै छोडगे चार हजार लोगा रोटी जिमी।
39 फेर यीसू लोगां नै विदा कर'गे किस्ती पर चड़ग्यो अर मगदन कानी चाल पड़यो।