रीति रिवाज नै मानणै गो सवाल
7
1 एकर फरीसी अर सासतरी लोग झिका यरुसलेम ऊं आयेड़ा हा बांगै कनै भेळा होया।
2 बा देख्यो कै यीसू गा चेला यहुदी नेम गै अनुसार बिना हात धोये खाणो खाण लागरया।
3 क्यूंकै सारा फरीसी अर यहुदी लोग आपगी पूर्वजा गी परम्परा गै अनुसार हात आच्छी तरियां धोगे रोटी जीमता।
4 जद बे बजार ऊं घरै आवै तो आपगै बुर्जगा गी परम्परा गै अनुसार हात धोगे खाणो खावै। बे लोटा, बाटी अर ताम्बे गै भांडा नै मांजणै गै कामा में आपगै पूर्वजा बतायेडै नेम गो पालण करता।
5 फरीसियां अर यहुदियां यीसू नै पूछयो, “थारा चेला नेम गै अनुसार हात धोगे क्यूं खाणो कोनी खावै। बांगी रिवाज पर ऐ क्यूं कोनी चालै।”
6 यीसू बानै केयो, “थारै पाखंडी लोगा गै बारै में तो परमेसर गा बचन सुणाण आळा भोत पेलां साची बात केदी।” ऐ बाता सासतर में ईं तरियां ऊं लिखेड़ी है कै,
“ऐ लोग मेरी बाता ऊं ई मनै मोटो मानै
पण मेरै पर बिस्वास कोनी करै।
7 ऐ झिका बेकार में मेरी पूजा करै बिंगो कोई फायदो कोनी।
बे झिको सिखाण लागरया बे आदमी गा बणायेड़ा रिवाज है।”
8 थे लोगा परमेसर गै हुकम नै मानणो छोड़ दियो अर आदमी गै बणायेडै़ रिवाज नै सखताई ऊं मानण लागग्या।
9 फेर यीसू बानै केयो, “थे परमेसर गै हुकम नै टाल गै आपगै रीति रिवाजा नै मानण गो आच्छो ढंग सीख लिओ।”
10 मूसा परमेसर गो ओ नेम सिखायो कै, “थे थारै मां बाप नै आदर करो। अर बा ओ ईं सिखायो कै झिको आपगी माता पिता गी बुराई करै बिनै जान ऊं मारदयो।”
11 पण थे सिखाओ झिको आदमी आपगै मां बाप गी मदद खातर न्यारो धन भेळो करै बो परमेसर खातर रखेड़ो है।
12 फेर आपगै मां बाप नै कीं देण गी लोड़ कोनी?
13 इयां थे थारै रिवाजा ऊं दूसरा नै सिखाओ अर परमेसर गै नेमा ऊं आख फेर ल्यो हिस्या हिस्या भोत गळत काम करो।
आदमी नै नास करण आळी बातां
14 फेर यीसू लोगा गी भीड़ बुला गै केयो, “थे ध्यान ऊं सुणगे मेरी बात नै समझो।
15 हिसी कोई चीज बारै कोनी झिकी नै आदमी खा गै असुद्ध होवै पण एक आदमी गै दिल ऊं झिकी बुराईयां निकळै बे ई आदमी नै परमेसर गी नजर में असुद्ध बणा दय।
16 झिकै गै कान है बो ईं बात नै ध्यान ऊं सुण गै समझ ल्य।”
17 जद यीसू भीड़ नै छोड गै घर में गेया तो बांगै चेला ईं मिसाल गो मतलब पूछयो।
18 यीसू बानै केयो, “थे इती सोखी बात नै ई कोनी समझ सक्या कै झिको आदमी गै मूं माखर जावै बो आदमी नै असुद्ध कोनी कर सकै।
19 क्यूंकै बो बिंगै मन में कोनी जावै पण पेट में जा'गे सरीर ऊं बारै निकल ज्य। ओ केगे बानै समझायो कै हर तरियां गो भोजन नै खा सको।”
20 फेर यीसू बानै समझायो कै, “झिको आदमी गी जबान ऊं निकळै बो ई आदमी नै परमेसर गी नजरा में बुरो बणा दय।
21-22 क्यूंकै आदमी गै मन ऊं ई बुरी सोच, बेबीचार, चोरी, हत्या, लोभ, बुरा काम, ईरस्या, चुगली, घमण्ड, अर मूरखता निकळै।
23 ऐ सारी बुराईयां आदमी गै माऊं आ'गे बिनै बुरो बणा दय।”
युनानी जाती गी लुगाई गो बिस्वास
24 यीसू गलील प्रांत नै छोड गै उतर दिसा गै तुरास प्रांत में उड़ग्या। अर बठै किंगी घर में उड़ग्या अर बे चावा हा कै किनी ठा ना लागै कै मैं अठै हूं। पण लोगा ऊं ओले कोनी रे सक्या।
25 अर जद ई बठै एक लुगाई आई झिकी गी छोरी में ओपरी बडेडी ही। अर बा आ'गे बांगै पगा पड़गी।
26 बा सिरिया देस गै फुनीसिया प्रान्त गी युनानी जाती गी ही। बो ओपरी काड़ण खातर यीसू ऊं गिडगिडागे पराथना करण लागगी।
27 बिंगै बिस्वास नै परखण खातर यीसू बिनै केयो, “पेलां यहुदियां झिका परमेसर गी उळाद बागी मदद कर लेण दे। टाबरा गी रोटी लेगे कुता नै फेंकणी माड़ी बात है।”
28 बण लुगाई केयो, “पण मालिक घर गा कुता तो टाबरा कनूं मेज गै नीचे पडया टुकडा खावै।”
29 ओ सुणगे यीसू केयो, “तू इतो आच्छो उतर दिओ ईंखातर तूं जा सकै। तेरी बेटी मूं ओपरी निकळी।”
30 जद बा घरै गेईं तो बिंगी छोरी बिस्तर पर सुती पड़ी अर बिमू ओपरी निकळगी ही।
बेरै अर हकळै आदमी नै ठीक करणो
31 फेर यीसू तुरास प्रांत नै छोड़गे सेदा सैहर ऊं होगे गलील झील गै कनै दिकापुलिस प्रांत में आग्या।
32 बठै लोग एक आदमी नै यीसू कनै ल्याया। बो आदमी बेरो हो। बो हकड़ी खा'गे बोलतो हो जद लोग यीसू ऊं बिनती करण लागग्या कै थारी दया गो हात ईं पर रखै।
33 जद बे बि आदमी नै भीड़ ऊं दूर लेग्या अर बिंगै काना में आगळी घाली अर थूथकारो घाल बिंगी जीभ गै हात लगायो।
34 अर आकास कानी देख गै लंबो सांस लियो अर बि आदमी गी भासा में बोल्या “इफकथा” झिकै गो अरथ होवै खुल ज्याओ।
35 अर बि आदमी गी जबान अर कान खुल ग्या अर बो दूसरै लोगा गी तरियां बोलण लागग्यो।
36 यीसू लोगा नै चेतायो कै ईं चमत्कार गै बारै में किनी ना बताईयो पण फेर ई लोगा ईं बात गो जादा परचार करण लागग्या।
37 लोग हेरान होगे केण लाग्या, “यीसू झिको कीं करै बड़िया करै। आ'गे केण ऊं बेरा सुणन लागज्य अर गूंगा बोलण लागज्य।”