फरीसी अर संदूकियां गी चाल
16
1 फेर फरीसी अर संदूकी यीसू कनै आया। बे बिंगै अधिकार गो पतो लगाणो चावा। ईंखातर बा बिनै चमत्कार करण गो केयो।
2 यीसू उतर दियो, “सूरज छिपजेयै जद थे केयो आज मोसम आच्छो है क्यूंकै आसमान लाल है।
3 अर सूरज उग्यो जद थे केयो आज आंधी आसी क्यूंकै खंखळ चडरी है। थे मोसम में देखगे भेद बता सको पण टेमां गै निसान गो भेद क्यूं कोनी बता सको?
4 दुस्ट अर बेबीचार पीढी गा लोग कोई निसान देखणो चावै। पण आनै योना गै निसान गै सिवा अर दूसरो निसान कोनी दिखाईजेयै।” फेर बो बानै छोडगे बठूं उड़ग्यो।
फरीसी अर संदूकियां गी सिक्सा गो खमीर
5 यीसू गै चेला झील गै परली पार तो आग्या पण बे रोटी ल्याणी फूल ग्या।
6 जद यीसू बानै केयो, “फरीसियां अर संदूकियां गी खमीर ऊं चोकस रेईयो।”
7 जद बे आपसरी में केण लागग्या, “के आपां रोटी सागै कोनी ल्याया?”
8 झिको कीं चेला बोल्या बानै यीसू जाणग्यो अर बानै केयो, “अरै ओ कमजोर बिस्वासियों, थे रोटी गै बारे में क्यामी सोचो?
9 थे अजे बी कोनी समझया कै पांच हजार लोगां नै पांच रोटियां ऊं धपाया अर फेर बी किती टोकरी बचगी।
10 अर थानै याद कोनी चार हजार लोगां खातर सात रोटी ही, सारा थापग्या फेर बी किती टोकरी बची।
11 थे क्यूं कोनी समझो कै मैं थानै रोटी खातर कोनी केऊं। मैं थानै फरीसियां अर संदूकियां गै खमीर ऊं बचण खातर केऊं।”
12 जद बे समझ गया कै इंगो मतलब फरीसियां अर संदूकियां गी सिक्सा ऊं बचगे रेण खातर केयो।
पतरस गो यीसू नै मसी मानणो
13 जद कैसरिया फिलिप्पी गै प्रदेस में आयो तो बण चेला नै पूछयो कै, “लोग मिनख गै बेटै नै के केवै?”
14 जद चेला केयो, “केई तो यूहना बतिस्मो देण आळो, अर केई केवै एलियाह अर केई केवै यिरमयाह अर केई केवै परमेसर गी बात बताण मूं एक।”
15-16 यीसू बानै पूछयो, “थे मनै के केवो?” पतरस बोल्यो, “तू मसी है, परमेसर गो बेटो।”
17 यीसू बिनै उतर दियो, “योना गा बेटा, तू धन्य है। तू आ बात किनैई ना केई। मेरै सुरगीय पिता आ बात तेरै पर प्रकट करी है।
18 मैं केऊं तू पतरस है अर तेरो बिस्वास पथर बरगो है। तेरै द्वारा भोत सारा लोग बिस्वास में आवैगा अर आ लोगों गो मोत गी सकती कीं कोनी बिगाड़ सकै।
19 मैं थानै सुरग गै राज गी कुंजी देऊंगा, झिकी ऊं धरती पर तू कीं बांधै बो परमेसर सुरग में बांधेगो। अर झिको कीं तू धरती पर खोलै बो परमेसर सुरग ऊं खोल दयेगो।”
20 फेर बण आपगै चेला नै आग्या दी कै, “आ बात थे किनै ना बताईयो, कै मैं मसी हूं।”
आपगी मोत गै बारे में यीसू गी परमेसर ऊं बात
21 बि टेम बो आपगै चेला नै बताण लागरयो कै मनै यरुसलेम जाणो चईयै। बठै मनै यहुदी नेम सिखाण आळा अर बुडा यहुदी नेता अर महा याजक मनै दुख देगे मरवा दयेगा। फेर बो तीसरै दिन जी उठेगो।
22 जद पतरस बिनै न्यारो ले जा'गे केण लागग्यो कै, “प्रभु परमेसर तेरै पर दया करै। थारै सागै इयां कदी ना होवै।”
23 फेर यीसू बि कानी मुडगे बोल्यो, “पतरस मेरै रा ऊं परने होज्या। सैतान तू मेरै रा नै रोकणो चावै। तू परमेसर गी तरियां कोनी सोचै। पण तू आदमियां गी तरियां सोचै।”
24 फेर बण आपगै चेला नै केयो, “झिको मेरै लारै आणो चावै बो अपणै आपनै भूलज्य अर आपगो करूस चक'गे मेरै लारै होज्यै।”
यीसू गै लारै चालण गो अरथ
25 झिको आपगी जान बचाणी चावै बो बिनै खोवेगो। पण झिको आपगी जान मेरै खातर खोवेगो बो आपगी जान नै बचा ल्येगो।
26 जे कोई आपगी जान गमागे सारी चिजां भेळी कर ल्ये तो बिनै के फायदो? आपगी जाण ऊं कोई चीज मेंगी हे के?
27 मिनख गो बेटो सुरगदूतां सागै परम पिता गी मेमा सागै आण आळो है झिको हर एक गै करमां गो फळ दयेगो।
28 मैं थानै साची केऊं, “अठै हिस्या बी है झिका जद तांई कोनी मरेगा जद तांई मिनख गै बेटै नै आवंता ना देखे।”