यीसू गो रूप बदळणो
17
1 छ दिनां गै बाद यीसू पतरस, याकूब अर यूहना नै लेगे प्हाड़ पर गेयो।
2 बठै बांगै सामै यीसू गो रूप बदळ ग्यो। अर बिंगो मू सूरज गी तरियां चमकण लागग्यो अर बिंगा गाबा जोती गै समान धोळा हो'ग्या।
3 फेर एकदम मूसा अर एलियाह बठै परगट होया अर यीसू ऊं बातां करण लागग्या।
4 ओ देखगे पतरस यीसू नै बोल्यो, “प्रभु आच्छी बात है कै आपां अठै हा। जे थे चावै तो म्हे अठै तीन तंबु बणा दया, थारै तीनां खातर।”
5 पतरस जद ऐ बातां बोलण लागरयो, एक चमकते बादळ आ'गे बानै घेर लिया अर बादळ मूं आकासबाणी होयी कै ओ मेरो लाडलो बेटो है। मैं इऊं भोत खुस हूं अर थे इंगी सुणो।
6 जद चेला ओ सुण्यो तो भोत डरग्या अर धरती पर मूंदा पडग्या।
7 जद यीसू बानै हात लगागे केयो, “डरो ना, खड़या होज्यो।”
8 जद बा उठगे देख्यो तो बठै कोई कोनी एकलो यीसू देख्यो।
9 जद बे प्हाड़ ऊं उतरया तो बण बानै केयो कै झिको कीं थे देख्यो किनैई बताईयो ना। जद तांई मिनख गो बेटो मरगे पाछो जींवतो ना होजै।
10 जद चेला पूछयो, “फेर यहुदी नेम सिखाण आळा क्यामी केवै कै एलियाह सारा ऊं पेली आसी।”
11 बण उतर दियो कै, “एलियाह आण लागरयो है। बो रा नै सई तरियां तैयार करेगो।
12 पण मैं थानै केऊं एलियाह तो अब तांई आ'ग्यो। पण लोगां बिनै पिछाण्यो कोनी। बिंगै सागै जिंया बा चाओ बिंया ई करयो। बिंया ई मिनख गै बेटै नै बी सतावेगा।”
13 जद चेला समझ गया कै बो बतिस्मो देण आळै यूहना गै बारे में केवै।
ओपरी बडे़डे़ छोरै नै ठीक करणो
14 जद यीसू भीड़ में पाछो आयो तो एक आदमी बि कनै आयो बण बिनै निमस्कार कर'गे केयो,
15 “हे प्रभु मेरै बेटै पर दया कर। बिनै मिरगी आवै। बो भोती ओखो होवै, बो कदी तो पाणी अर कदी आग में पड़ज्य।
16 मैं बिनै तेरै चेला कनै ल्यायो पण बे बिनै ठीक कोनी कर सक्या।”
17 यीसू बानै उतर दियो, “जिदी अर कमजोर बिस्वास गा लोगों, मैं थारै सागै किता दिन रेऊंगा अर मैं किता दिन थानै सेहन करतो रेवूंगा। बिनै मेरै कनै ल्यावो।”
18 फेर यीसू बि ओपरी नै बारै निकळण गो हुक्म दियो अर बा बारै निकळगी। बो छोरो हातो हात ई ठीक हो'ग्यो।
19 फेर बिंगै चेला बिनै एकलै नै पूछयो, “म्हे ई ओपरी नै क्यूं बारे कोनी काड़ सक्या?”
20 यीसू बोल्यो, “थारो बिस्वास कमजोर है। मैं थानै साची केऊं, जे थारै में राई गै दाणै जितो बिस्वास होवै तो थे ई प्हाड़ नै चालगे बठै जाण गो के दयो। बो थारो केणो मानल्यगो। थारै खातर कोई बी काम ओखो कोनी हो'सी।”
21 जद यीसू गा चेला बिनै गलील में आ'गे मिल्या तो बण बानै केयो, “मिनख गो बेटो मिनखां गै हात में पकडिजणआळो है।”
आपगी मोत गै बारे में यीसू ऊं दुसर परमेसर गी बात
24 जद यीसू अर बिंगा चेला कफरनहूम में आया तो मिन्दर गो कर लेण आळो पतरस कनै आयो अर बोल्यो, “तेरै गुरू मिन्दर गो कर कोनी दय के?”
25 बो बोल्यो, “हा देवै। इतो केगे घर में आ'ग्यो।” बिंगै बोलण ऊं पेला यीसू बोल्यो, “पतरस, तेरो के केणो है। धरती गो राजा किऊं कर लेवै? खुद आपगै लोगा ऊं या दूसरा गै लोगा ऊं।”
26 पतरस उतर दियो, “दूसरै लोगा ऊं,” जद यीसू केयो, “आपगै लोगा नै छूट होवै।
27 पण आपां बा लोगां नै नाराज कोनी करां। ईंखातर झील पर जा अर कुंडी पाणी में फेंक अर झिकी पेली मछली पकड़िजै, बिंगै मू में एक रिपियो मिलैगो, बो बानै ल्यागे मेरै अर थारै कर खातर दे दयो।”