9
1 फेर बानै यीसू केयो, “थारै मूं कीं लोग मरण ऊं पेलां परमेसर गो काम जरूर देखैगा झिका परधान गै रूप में आपगी ऊंची ताकत ऊं करण आळा है।”
यीसू गो रूप बदलणो
2 इंगै छ दिन गै बाद यीसू पतरस याकूब अर यूहना नै सागै लेगे ऊंचै प्हाड़ पर गेया जठै बे चारूं एकला हा चेला गी आंखा गै सामणै यीसू गो रूप बदल ग्यो।
3 अर बिंगा गाबा चमकण लागग्या अर बोळा धोळा हो गेया अर इता धोळा हो गेया जिता सारी दुनिया में कोई बी गाबा धोळा कोनी कर सकै है
4 चेला नै एलियाह अर मूसा नै बी अचानक देखयो अर बे यीसू गै सागै बात करण लागरया हा।
5 पतरस यीसू नै केयो, “म्हारो अठै रेणो आच्छो होवैगो ईंखातर म्हे तीन तंबु बणावां एक थारै खातर एक मूसा खातर अर एक एलियाह खातर।”
6 तीनूं चेला भोत डर गेया। पतरस नै केयो क्यूंकै बिनै ठा कोनी हो कै बिनै के केणो है।
7 फेर एक बादळ उठयो अर बानै घेर लियो बादळ मूं परमेसर गी बोली सुणीजी ओ मेरो बेटो है इंयु मैं प्रेम करूं हूं इंगी बाता नै ध्यान ऊं सुणो अर मानो।
8 जद अचानक चेला नै यीसू गै सिवा कोई कोनी दिख्यो।
9 जिंया ई बे प्हाड़ ऊं नीचे उतरता टेम यीसू बानै हुकम देगे केयो, “थे झिको कीं देखयो है इंगै बारे में परमेसर गी ओर ऊं आयो, इनसान गो बेटो मरण गै बाद दुबारा जींवतो होण तांई किनैई ना बताईयो।”
10 आ बात चेला किनैई कोनी बतायी पण आपस में बाता करण लागरया कै दुसर जींवतो किंया हो'सी।
11 फेर चेला पूछयो, “यहुदी नेम सिखाण आळा क्यूं केवै है कै मसी गै आण ऊं पेला एलियाह जरूर आवैगो।”
12 यीसू उतर दियो, “ओ सच्च है कै एलियाह पेला आवैगो अर लोगा नै परमेसर गी इच्छा गै अनुसार जीणो सिखावैगो। पण ईं बात पर बी ध्यान दयो कै सासतर में लिखेड़ो है कै परमेसर गी ओर ऊं आएड़ो माणस परमेसर गी मरजी गै अनुसार भोत दुख उठावैगो अर लोग बिनै तुछ जाणैगा।”
13 मैं थानै बताऊ हूं कै, “एलियाह आ'ग्यो है अर जिंया पेला ई पवितर सासतर में बिंगै बारे में लिखयो है अर परमेसर गी बात होई है लोगा आपगी इच्छा गै अनुसार बिनै सतायो।”
ओपरी भरेड़ै छोरै नै ठीक करणो
14 जद बे नीचे दूसरा चेला कनै आया तो बां देखयो कै बांगै कानी चारूंमेर एक मोटी भीड़ है अर यहुदी नेम सिखाण आळा बांगै सागै बैस करण लागरया है।
15 जिंया ई लोगा यीसू नै देख्या तो बानै अचंभो होयो अर प्रणाम करण खातर बि कानी भाज पड़या।
16 यीसू पूछयो, “थे कीं बात नै चेला गै सागै बैस करण लागरया हो।”
17 भीड़ मूं एक आदमी उतर दियो, “हे गुरू चेला गै कनै मैं आपगो बेटो लयायो हूं बिंगै मां एक भूत है बिंगी बजह ऊं बो बोल कोनी सकै।
18 जद बो भूत बि पर जोर करै है अर हमलो करै है। बो बिनै जमीन पर पटक देवै है बिंगै मूं में झाग जावै है। बिंगो सरीर सूकतो जावै है बिंगै भूत गै कारण थारै चेला नै केयो पर बे कोनी काड़ पाया।”
19 यीसू केयो, “थे लोग मेरै उपर बिस्वास करो ही कोनी मैं थारै सागै भोत टेम तांई रे चुकयो हूं ओर भोत टेम ऊं सेहन करतो आण लागरयो हूं फेर बी थे बिस्वास कोनी करो।” फेर यीसू छोरै नै आपगै कनै ल्याण खातर केयो।
20 बे छोरै नै यीसू कनै ले आया। जद भूत यीसू नै देखयो। छोरै नै झटका देण लागग्यो, छोरो नीचे पड़ग्यो अर कूकण लागग्यो। बिंगै मूं में झाग निकलण लागग्या।
21 यीसू छोरै गै बाप नै पूछयो, “इनै कद ऊं आ तकलीफ होयी है?” बाप बतायो, “छोटे थका गी है।”
22 केई बारी भूत इनै जान ऊं मारण खातर आग अर पाणी में रेड़ दियो। जे थे कीं कर सको हो तो म्हारै उपर दया कर'गे म्हारी मदद कर।
23 यीसू केयो, “मन में बेम क्यामी राख्यो के? जे थे कीं कर सको हो?” झिका बिस्वास करै है बांगै खातर सारो कीं हो सकै है।
24 जद छोरै गै बाप गिडगिडागे केयो, “मैं बिस्वास करूं हूं पूरी तरियां बिस्वास करण खातर मेरी मदद करो।”
25 जद यीसू देख्यो कै भीड़ भोत होण लागरी है, यीसू ओपरी नै फटकार गै केयो, “हे बैरी अर गूंगी आत्मा मैं तनै आग्या देऊ हूं ईं छोरै ऊं बारै आ ओर कदी दुसर इंगै मां ना बडी।”
26 ओपरी रोळो मचाण लागगी अर छोरै नै बुरी तरियां मरोड़ गै बारै निकळगी अर छोरो बेहोस हो'ग्यो ओ देख केई लोग केण लाग्या कै ओ तो मर ग्यो।
27 पण यीसू बिंगो हात पकड़गे उठायो अर बो खड़यो हो'ग्यो।
28 जद यीसू घर गै बारै आया तो बिंगा चेला ऐकांत में बानै पूछयो, “म्हे ओपरी नै क्यूं कोनी काड़ सकया।”
29 यीसू उतर दियो, “ईं तरिकै गो ओपरी सिरफ परमेसर गी पराथना करण ऊं ई निकळै है।”
आपगी मोत गै बारे में यीसू गी दूसरी बात
30 फेर यीसू अर बिंगा चेला बठूं चालगे गलील प्रान्त ऊं होगे जाण लागरया हा, यीसू चावै हा कै किन्ही ठा ना लागै कै बे अठै है।
31 क्यूंकै बे आपगै चेला नै कीं खास बात बताणी चावै हा, बा बानै केयो, “परमेसर कनूं आएड़ै माणस नै कीं लोग बिंगो बिरोध करण आळा गै हवाले कर देवैगा। बे बिनै जान ऊं मार देवैगा। पण तीन दीना गै बाद बो फेर जींवतो होज्य'गो।”
32 ईं बात गी चेला नै समझ कोनी आई ही पण यीसू नै पूछण ऊं डरा हां।
सारा ऊं मोटो कुण?
33 फेर बे कफरनहूम उठग्या। जद बे घर में हा यीसू चेला नै पूछयो, “थे लोग रा में कै बात पर बैस करण लागरया हा।”
34 पण चेला चुप रेया क्यूंकै बा'ईं बात पर बैस करी ही कै आपणै मूं मोटो कुण।
35 यीसू बेठ ग्या अर आपगै चेला नै बुला'गे केयो, “झिको परमेसर गी नजर में सारा ऊं मोटो आदमी बणनो चावै तो बो अपणै आपनै सारा ऊं छोटो समझै अर सारा गी सेवा करै।”
36 फेर बा बांगै सामै एक छोटे टाबर नै खड़यो करयो अर बिनै आपगी गोदी में लेगे केयो,
37 “झिको मेरूं प्रेम करण गै कारण ईं तरियां एक छोटे टाबर गी सेवा करै है बो मानो मेरी सेवा करै है। झिका इयां मेरी सेवा करै है बे मेरी कोनी पण मेरै पिता झिकै मनै भेज्यो है मानो बिंगी सेवा करै है।”
झिको बिरोध में कोनी बो पक्स में
38 यूहना केयो, “गुरू मैं एक आदमी नै देख्यो झिको थारो नाम लेगे ओपरिया नै काड़ण लागरयो हो। मैं बिनै रोकयो क्यूंकै बो आपणै मूं कोनी है।”
39 यीसू बिनै केयो, “बिनै रोको ना। झिको मेरो नाम लेगे चमत्कार गा मोटा काम करै है बो बेगी मेरी बुराई कोनी करै।
40 क्यूंकै झिको आपणै खिलाफ कोनी बो आपणै सागै है।
41 मैं थानै केऊं हूं झिको बी थानै एक गिलास पाणी प्यावै है बो मनै प्यार करै है अर थे मेरै उपर बिस्वास करण आळा हो बिनै परमेसर गी बरकत जरूर मिलैगी।”
ठोकर गो कारण
42 कीं किमत पर पाप करण ऊं बचो। झिको टाबरा गी तरियां मेरै पर बिस्वास करै है जे बिनै कोई ठोकर मारै है तो परमेसर बिनै भयानक सजा देवैगो। बिंगी गळ में मोटी चककी गो पथर बान्ध गै समुन्दर में डाल गै भयंकर मोटी सजा देवैगो।
43-44 जे थे आपगो हात गो उपयोग करगै पाप करता रेवोगा तो बो पाप करण ऊं अपणै आपनै रोक कोनी सकै। बि हात नै बाढ देवो। दोनू हाता गै सागै बी पाप गै कारण नरक में जाणूं एक हात अनन्त जीवन पाणो आच्छो होवैगो। नरक में कीड़ा कदी कोनी मरै अर आग कदी कोनी बुझे।
45-46 जे थे आपगै पगां गो उपयोग कर'गे पाप करता रेवो हो ओर पाप करण ऊं थे आपनै रोक कोनी पाओ तो बी पगा नै ही बाढ देवो दो पंगा गै सागै अनन्त जीवन पाणो आच्छो होवैगो। (नरक में कीड़ा कदी कोनी मर ओर ना कदी आण बूझ)।
47-48 जे तेरी आंख तेरूं बुरो करवावे तो बिनै बारै काड़ दे। काणो होगे परमेसर गै राज में जाणूं आच्छो है कै दोनूं आंखा समेत नरक गी आग में फेंक दियो जावै, जठै बा आग ना कदी बुझे अर ना कदी बठै कीड़ा मरै।
49 ईं दुनिया में हरेक जणै पर दुख तकलीफ आवै ईंखातर परमेसर गी आच्छी संतान बणन खातर आ चीजा नै सुधार गै अपणै आपनै काबिल बणाओ।
50 लूण आच्छो होवै पण जे बिंगो सुआद बिगड़ ज्यै तो बो कीं काम गो कोनी रेवै। इंया ई थे अपणै आप में बो गुण बणाये राखो जिऊं थे परमेसर गै काम आ सको अर दूसरा सागै मिल जुल गै रेवो।