तलाक गै बारे में यीसू गी सिक्सा
10
1 यीसू कफरनहूम ऊं चालगे यहुदियां प्रेदेस गी कांकड़ में अर यरदम नेर गी दूसरी पार गेयो। फेर ऊं भीड़ बिंगै कनै भेळी होगी, बो बानै रोज कीं तरियां परमेसर गी बाता सिखाण लागग्यो।
2 फरीसी सभा गा केई आदमी यीसू कनै आ'गे बिनै सवाल पूछण लागग्या कै, “बिमै कोई गलती म्हानै लादै।” बा बिनै पूछयो, “कोई आदमी आपगी घरआळी नै छोड़ सकै है के?”
3 यीसू बानै उतर दियो, “मूसा गै नेम विधान थानै के आग्या दी है?”
4 बा जबाब दियो, “तलाक नामो दे'गे केई आदमी आपगी घरआळी नै छोड़ सकै।”
5 यीसू बानै केयो, “मूसा आ आग्या थानै ईं कर'गे दी कै थारा मन भोत पथर बरगा है।
6 पण जद परमेसर सरसटी बणाई तो आदमी अर लुगाई नै बी बणाई।
7 ईंखातर आदमी आपगै मां बाप नै छोड़गे आपगी घरआळी गै सागै रेसी।
8 अर अब बे दो कोनी पण एक माणस गी तरियां हो'सी।
9 ईंखातर बानै परमेसर जोड़ दिया तो कोई बी इनसान बानै न्यारा न्यारा ना करै।”
10 जद बे घरै हा तो चेला एकर फेर पूछयो,
11 यीसू बानै उतर दियो, जे कोई आपगी घरआळी नै छोड़गे दूसरी लुगाई सागै ब्या करावे तो बो परमेसर गी नजर में गलत काम करै।
12 अर जे कोई लुगाई आपगै आदमी नै छोड़गे दूसरै आदमी सागै ब्या करै है तो बा परमेसर गी नजर में बेबीचार करै है।
टाबरां नै आसिरवाद
13 एकर लोग आपगै टाबरा नै यीसू कनै ल्याया। बे चावा हा कै यीसू बांगै सिर पर हात रखगे बानै आसिरवाद देवै। पण यीसू गा चेला बानै रोक दिया।
14 जद यीसू ओ देख्यो तो बिनै भोत रीस आ'गी। बण चेला नै केयो, टाबरा नै मेरै कनै आण दयो, बानै रोको ना। आ टाबरा गी तरियां परमेसर पर पूरो भरोसो राखण आळा ई परमेसर गी आसिस ले सकै।
15 झिका लोग एक टाबर गी तरियां परमेसर पर भरोसो कर'गे अर पूरी खुसी ऊं बिनै आपगो राजा मानसी बे ई परमेसर कनूं मिलण आळी आसिस ले सकै।
16 फेर यीसू टाबरा नै आपगी गोदी में लेगे बांगै सिर पर हात रखगे बानै आसिरवाद दियो।
अमीर आदमी अर अनन्त जीवन
17 जिंया ई यीसू यरुसलेम कानी जाण लागग्यो, एक आदमी भाजगे बिंगै कनै आयो अर आपगा गोढा टेक लिया अर बोल्यो, “गुरूजी, थे भोत आच्छा हो। मनै बताओ मैं अनन्त जीवन लेण खातर के करूं?”
18 यीसू बिनै केयो, “तू मनै क्यूं आच्छो बतावै है, तूं जाणै है कै परमेसर नै छोड़गे कोई बी आच्छो कोनी हो सकै।
19 थे परमेसर गा ऐ नेम जाणो हो कै, कीं हत्या ना करियो, कोई बी लुगाई गै सागै गळत संबंध ना राखियो, झूठी गवाई ना राखियो, ना पंचायत में ना कचेरी में किन्ही धोखो ना देईयो अर आपगै मां बाप गो आदर मान करो।”
20 बण आदमी जबाब दियो, “गुरूजी, ऐ तो मैं छोटो सो हो जद ऊं आ सारा नेम नै मानूं हूं।”
21 यीसू बिनै देखयो अर बिंगो मन प्रेम ऊं भरग्यो। फेर यीसू बिनै केयो, “तू एक काम कर झिको तू अजे तांई कोनी करयो तू इंया कर, जितो तेरै कनै धन माल है सारो बेचगे गरीबा नै बाट दे, जे इंया करसी तो तनै सुरग में आत्मिक धन मिलैगो अर बाद में तू मेरै लारै आ जा।”
22 आ बात सुणगे बो भोत उदास होगे बठूं उड़ग्यो क्यूंकै बो भोत अमीर हो।
23 यीसू चारूंमेर देखगे आपगै चेला नै केयो, “अमीर लोगा गो परमेसर गै राज में जाणो भोत मुसकिल है।”
24 आ बात सुणगे चेला नै अचंभो होयो, पण यीसू फेर केयो, “झिका लोग आपगै धन पर भोरोसो राखै है बांगो परमेसर गै राज में जाणो भोत मुसकिल है।
25 जिंया एक ऊंठ गो सुई गै नाके माखर निकलणो बिंया ई एक धनवान आदमी परमेसर गै राज में जाणो भोत मुसकिल है।”
26 आ बात सुणगे बे भोत चिंता में पड़ग्या अर आपसरी में पूछण लाग्या, “फेर तो कोई बी परमेसर गी सजा ऊं बच कोनी सकै।”
27 यीसू बांगै कानी देखगे केयो, “लोगा खातर तो ओ भोत मुसकिल है पण परमेसर इंया कर सकै।”
28 पतरस यीसू नै केयो, “थारै लारै चालण खातर म्हे सारो कीं छोड़ दियो।”
29 यीसू बानै केयो, “मैं थानै साची केऊं, इसो कोई कोनी झिकै मेरै अर सुब समाचार खातर आपगा मा बाप, भाई भेन अर टाबर आपगी खेती छोड़ दी होवै।
30 बे ईं दुनिया में सो गुना ऊं जादा बिनै जरूर मिलणो चावै, घर होवै या भाई भेन, या मां बाप या टाबर पण आ मुसकिल गै सागै बिनै सताव गो बि सामणो करणो पड़सी। बिंगै आण गै टेम में बिनै अनन्त जीवन मिलसी।
31 झिका नै आ दुनिया मोटा समझ है बामू केई आण आळै टेम में परमेसर छोटा मानसी। अर केईया नै आ दुनिया छोटा मानै है बानै परमेसर आण आळै टेम में मोटा मानसी।”
आपगी मोत गै बारे में यीसू गी तीसरी बात
32 जद यीसू मसी अर बिंगा चेला अर केई ओर लोग बांगै सागै यरुसलेम जाण लागरया हा। यीसू बांगै आ'गे चालै हो। चेला नै अचंभो होयो। झिका सारा लोग बे बी भोत डरेडा हा। फेर यीसू बारा चेला नै ओटे ले जा'गे बाता बताई झिकी बिंगै सागै होण आळी ही बानै सारी बाता बताई।
33 यीसू बानै केयो, “आपां यरुसलेम जाण लागरया हा। लोग परमेसर कनूं आएड़ै माणस मुखय याजक अर यहुदी नेम सिखाण आळा गै हवाले कर देसी। बे बिनै मोत गी सजा सुणागे सैहर गै राजा गै अफसरा गै हवाले कर देसी।
34 बे बिंगो मजाक उड़ावैगा। बि पर थूक सी, कोडा मारसी अर मार देवैगा। पण बो तीन दिना गै बाद फेर जींवतो होज्य'गो।”
याकूब अर यूहना गी बिनती
35 फेर जबदी गै बेटै याकूब अर यहूदा यीसू गै कनै आ'गे केण लागग्या गुरूजी म्हे थारै कनूं कीं मांगागा थे म्हानै मना ना करियो।
36 यीसू बानै पूछयो, “थे लोग मेरै कनूं के चावो हो?”
37 बा उतर दियो जद थे परमेसर गी मेमा गै सागै सासन करो तो, थे म्हानै दोना नै एक नै दाए अर दूसरै नै बाए पासै बिठा लेईयो।
38 यीसू बानै केयो, थे झिको कीं मांगो हो बिनै आच्छी तरियां समझ गै कोनी मांगो कै झिको दुख झेलण जाण लागरयो हूं। थे बी बो दुख झेलण खातर तैयार हो। के मेरी तरियां दुख झेलगे मरण खातर तैयार हो।
39 बा यीसू नै केयो, “म्हे तैयार हा,” यीसू बानै केयो, “थे दोनूं मेरी तरियां दुख झेलगे मरण नै तैयार हो सको हो।”
40 पण कुण मेरै दायै अर बायै बेठसी इंगो फैसलो मैं कोनी कर सकूं। कुण लोग बेठ सकै है बांगै खातर परमेसर पेला ऊं बा जिग्या तैयार कर राखी है।
41 जद बा दूसरा दस चेला नै पतो लागग्यो कै याकूब अर यूहना यीसू कनूं के मांग्यो है तो बानै दोना पर रीस आ'गी।
42 यीसू मसी चेला नै बुला'गे केयो, “थे जाणो हो कै गेर यहुदियां पर झिका हुकम चलावे है, बे लोग आपगी ताकत दिखाणी चावै है अर बांगै मोटै लोगा नै हुकम देणो आच्छो लागै है।
43 पण थानै इसो कोनी बणणो। झिको परमेसर गी नजर में मोटो बणणो चावै है बिनै सारा गी सेवा करणी चईयै।
44 झिको परमेसर गी नजर में मोटो बणणो चावै है। बिनै सारा गो दास बणणो चाइयै।
45 क्यूंकै माणस गो बेटो ईंखातर कोनी आयो कै दूसरा बिंगी सेवा करै। पण दूसरा गी सेवा कर'गे आपगी जान दय। परमेसर ऊं मिलण आळी सजा ऊं बचाण खातर आयो।”
आंधो बरतिमाई नै आंखा देणी
46 फेर बे यरीहो पूग्या। जद बठूं यीसू अर चेला बोळी भीड़ गै सागै निकळ्या, सड़क गै किनारै तिमी गो बेटो बरतिमाई झिको आंधो हो, मंगतो बण गै बैठयो हो।
47 जद बण सुणयो कै नासरत गाम गो यीसू आवै है। बो रोळा मचागे केण लागग्यो, “दाऊद राजा गी उळाद यीसू मेरै पर दया कर।”
48 भीड़ ऊं केई लोगा बिनै रोकयो अर रोळा करया कै, “चुप हो'जा।” पण बो चुप कोनी रेयो अर ओर भोळा रोळा मचागे केण लागग्य, “दाऊद राजा गी पीढी ऊं आण आळा यीसू मेरै पर दया कर।”
49 यीसू बठै रुकगे बिनै बुला'गे ल्याण खातर केयो, “लोगा बरतिमाई नै जा'गे केयो, सबर राख अर उठ, बो तनै बुलावै है।”
50 आ बात सुणता ई बण आपगो गाबो परने फेंकगे दबादब खड़यो होगे यीसू गै कनै आयो।
51 यीसू बिनै पूछयो, “मैं तेरै खातर के करूं?” आंधै आदमी केयो, गुरूजी मैं चाऊं के मैं देखण लाग जाऊं।
52 यीसू बिनै केयो, “जा तेरै बिस्वास गै कारण तू ठीक हो'ग्यो।” बो बी घडी देखण लाग गेयो अर यीसू गै लारै लारै चाल पड़यो।