तलाक गै बारे में यीसू गी सिक्सा
19
1 ऐ बातां केगे यीसू गलील ऊं यहुदियां में यरदन नदी गै दूसरी पार उड़ग्यो।
2 बठै एक भोत मोटी भीड़ लारै चाल पडी झिकी नै बण ठीक करी।
3 बिनै परखण खातर केई बिंगै कनै आया अर केण लागग्या कै, “कोई आदमी कीं कारण ऊं आपगी लुगाई नै तलाक देदेये के?”
4 यीसू उतर दियो कै, “थे सासतर में इंया कोनी पड़यो कै धरती बणाण आळै बानै लुगाई अर आदमी गै रूप में बणाया।”a
5 अर ओ केयो, “आपगै मां बाप नै छोडगे आदमी आपगी लुगाई सागै दो होंता बी एक सरीर होगे रेवेगो।b
6 ईंखातर बे दो कोनी, एक ई बणज्यै। ईंखातर झिका नै परमेसर जोडै है, बानै कोई बी आदमी न्यारा ना करो।”
7 तो फरीसी बोल्या, “तो मूसा इंया क्यामी लिख्यो कै कोई आदमी आपगी लुगाई नै तलाक दे सकै। पण बिनै लिखगै देणो हो'सी।”
8 यीसू बानै उतर दियो, “मूसा ओ नेम विधान थारै कठोर मन गै कारण दियो। पण सरू में आ रीत कोनी।”
9 मैं थानै केऊं, “झिको आदमी आपगी लुगाई नै बेबीचार गै अलावा अर कोई कारण ऊं तलाक दे अर दूसरी लुगाई सागै ब्या करै तो बो बेबीचारी है।”
10 ओ सुणगे चेला बोल्या, “जे कोई आदमी लुगाई गै बिचाळै कोई इसी बात होवै तो ब्या ई नई करणो चईयै।”
11 यीसू बोल्यो, “हर एक आदमी उपदेस नै मानै कोनी। इनै बस बे ई मानै झिका नै ईं बात गी समझ दैड़ी होवै।
12 कीं लोग मां गै पेट ऊं ई खुसरा जन्मे है अर कीं लोग आदमियां गै द्वारा खुसरा बणा दिया जावै अर कीं लोग सुरग गै राज खातर बांगा बरगा बणज्यै। झिका इनै सुणनो चावै बे सुणले।”
टाबर अर यीसू
13 फेर लोग केई टाबरा नै यीसू कनै ल्यागे केयो, “आंगै सिर पर हात रखगे आसिरवाद दे अर आ खातर पराथना करै।” पण चेला बानै ललकार दिया।
14 ओ देखगे यीसू बोल्यो, “टाबरां नै अठै ई रेण दयो। आनै रोको ना। मेरै कनै आण दयो। क्यूंकै सुरग गो राज आ बरगो ई है।”
15 जद बो बानै आसिरवाद देगे बठूं चाल पडया।
अमीर आदमी अर अनन्त जीवन
16 बठै एक आदमी यीसू नै आ'गे केण लागग्यो, “गुरूजी मैं अनन्त जीवन पाण खातर के आच्छो काम करूं?”
17 यीसू उतर दियो, “आच्छो काम के है? इंगै बारे में मनै क्यूं पूछै? क्यूंकै आच्छो काम तो एक ही है तू अनन्त जीवन लेण खातर आग्या गो पालण कर।”
18 बण पूछयो, “किसी आग्या?” यीसू केयो, “कतल ना करी, बेबीचार ना करी, झूठी गवाई ना करी अर चोरी ना करी।
19 अर आपगै मां बाप गो आदर करी।c जिंया तू आपगै सरीर ऊं प्रेम करै बिंया ई आपगै आसै पासै रेण आळा ऊं प्रेम करी।”d
20 जद बण आदमी केयो, “मैं आ सारी बातां नै मानूं। अब मेरै में के कमी है?”
21 यीसू बोल्यो, “जे तू पूरण बणणो चावै तो जा तेरो सारो धन माल बेचगे गरीबा नै बांट दे क्यूंकै तनै सुरग में मिल ज्यगो। फेर मेरै लारै होज्या।”
22 ओ सुणगे बो भोत उदास होयो अर बठूं उड़ग्यो क्यूंकै बो भोत अमीर आदमी हो।
23 यीसू आपगै चेला नै केयो, “मैं थानै साची केऊं, एक धनवान आदमी गो सुरग में जाणो भोत ओखो काम है।
24 पण एक ऊंट गो सुई गै नाके माखर निकळ जाणो सोरो है पण कोई बी धनवान आदमी गो सुरग गै राज में जाणो ओखो है।”
25 चेला ओ सुणगे हेरान हो'ग्या फेर पूछयो कै, “अर किंगो उद्धार हो'सी।”
26 यीसू बानै केयो, “आदमियां खातर तो ओ काम ओखो है पण परमेसर ईं काम नै कर सकै।”
27 पतरस केयो, “देख, म्हे सारो कीं छोड गै तेरै लारै हो'ग्या। म्हानै के मिलसी?”
28 यीसू बोल्यो, “मैं साची केऊं कै एक नुए जुग में जद मिनख गो बेटो आपगै न्याय गै सिंघासन पर बैठेगो तो थे झिका बिंगै लारै चालो बारा सिंघासनां पर बैठगे इसराएल गी बारा जातां गो न्याय करोगा।
29 झिकै मेरै खातर आपगै घर परिवार नै छोड़यो है बिनै सौ गुणा फळ मिलैगो। अर सुरग गो अधिकारी बणेगो।
30 पण भोतसा अब झिका आ'गे है बे लारै होज्येगा अर झिका लारै है बे आ'गे होज्येगा।”