दुस्ट न्यायी अर विधवा लुगाई गी मिसाल
18
1 फेर एक दिन यीसू बतायो कै, “थे रोजाना पराथना करता रेईयो अर ना कदैई दिल रेड़ियो” अर बानै एक मिसाल बताई कै:
2 “किसैई गामै एक न्यायी रेंतो बो ना तो परमेसर ऊं डरतो अर ना'ई किसैई आदमी गी परवा करतो।
3 बि गामै एक विधवा लुगाई रेंती। बा रोजाना आपगै न्याय खातर न्यायी आगै आपगो रोणो रोंती, कै झिकै आदमी मेरै उपर अन्याय करयो है बिंऊं मनै न्याय दी'रा।”
4 पण बो कई दिनां तांई तो आनाकानी करतो रेयो फेर बण सोच्यो, “मैं ना तो परमेसर ऊं डरूं अर ना'ई किसैई आदमी गी परवा करूं।
5 फेर ई अण लुगाई मेरो दम ले लियो है ईंखातर मैं इंगो न्याय करवाऊंगा। झिको आ घड़ी घड़ी आ'गे मेरी स्यान तो ना पटै।”
6 प्रभु यीसू बोल्यो, “सुणो, ओ गळत न्यायी के केवै?”
7 बण गळत न्यायी होंताई बि विधवा गो न्याय करयो है तो परमेसर आपगै चुणेड़ा लोगां गो न्याय क्यूं कोनी करेगो? झिका बिनै रात दिन पूकारै बांगी मदद करण में देर करेगो के?
8 मैं थानै केऊं कै परमेसर दबादब बांगो न्याय करेगो फेर परमेसर गो बेटो धरती पर आवैगो तो बिनै भोत कम लोग बि पर बिस्वास करणाळा दिखैगा।
फरीसी अर चुंगी लेण आळै गी मिसाल
9 फेर बण झिका लोग अपणै आपनै धरमी मानै हा अर दूसरा नै माड़ा समझा बानै एक मिसाल बताई कै:
10 “एकर दो आदमी मिन्दर में पराथना करण गेया झिका में एक फरीसी हो अर दूसरो चुंगी लेण आळो हो।
11 फरीसी आदमी न्यारो खड़यो होगे आपगै मन में पराथना करण लागग्यो कै हे परमेसर मैं थारो धन्यवाद करूं। मैं दूसरा गी तरियां ठगी मारण आळो, अन्यायी, बेबीचार अर ना'ई चुंगी लेण आळै बरगो हूं।
12 मैं हफ्ते में दो बारी बरत राखूं अर आपगी सारी कमाई गो दसमों हिसो दान करूं।”
13 पण चुंगी लेण आळो दूर खड़यो होगे निची नस कर'गे छाती कूट कूट'गे केण लागग्यो कै हे परमेसर, मैं जाणूं, मैं पापी हूं, मेरै पर दया कर।
14 मैं थानै केऊं कै बो छाती पीटणआळो आदमी परमेसर गी नजरां में धरमी मानिज्यो। पण बो फरीसी आदमी अपणै आपनै भोत मोटो मानै हो ईंखातर बिंगी पराथना सुणी कोनी। क्यूंकै झिको आदमी खुद नै मोटो मानैगो बिनै परमेसर छोटो मानैगो अर झिको खुद नै छोटो मानैगो बिनै परमेसर मोटो मानैगो।
टाबरां नै आसिरवाद
15 फेर लोग आपगै टाबरां नै यीसू गै कनै ल्याण लागग्या कै यीसू आंगै सिर पर हात फेरै। पण बिंगै चेला लोगां नै झिड़क दिया कै थे टाबरां नै ना ल्याओ।
16 यीसू टाबरां नै कनै बुलाया अर आपगै चेला नै केयो, “टाबरां नै मेरै कनै आण दयो, आनै रोको ना। क्यूंकै परमेसर गो राज्य इंगै बरगै लोगां गो है।
17 मैं थानै साची केऊं कै झिको कोई अपणै आपनै टाबरां गी तरियां कोनी बणावेगो तो बो कदी बी परमेसर गै राज्य में कोनी जा सकैगो।”
अमीर आदमी अर अनन्त जीवन
18 फेर एक यहुदी मुखिया पूछयो कै हे उतम गुरू, मैं अनन्त जीवन गो वारिस होण खातर के करूं?
19 यीसू बिनै केयो, “तूं मनै उतम क्यामी केवै?” क्यूंकै सिरफ परमेसर नै छोड़गे ओर कोई बी उतम कोनी।
20 तूं बिंगी आग्या नै जाणै नी, बेबीचार ना करी, हत्या ना करी, चोरी ना करी, झूठ ना बोली, झूठी ग्वाई ना देई अर आपगै मां बाप गो आदर मान करी।
21 बण यीसू नै केयो, “ऐ तो मैं टाबरथकां ऊं ई मान्तो आयो हूं, ओर के करूं आ बताओ?”
22 ओ सुणगे यीसू बोल्या, “तेरै में अजे एक बात गी ओर कमी है, तूं आपगो सारो धन बेचगे गरीबां नै बांट दे जद तनै सुरग में धन मिलसी अर मेरै लारै होज्या।”
23 बो आ बात सुणगे भोत दुखी होयो क्यूंकै बो भोत अमीर हो।
24 यीसू देखगे बिनै केयो, “अमीर लोगां गो परमेसर गै राज्य में बड़णो भोत ई दोरो है।
25 बिंऊं ऊंट गो सुई गै नाके माखर निकळणो तो सोरो हो सकै पण अमीर आदमी गो परमेसर गै राज में बड़णो भोत ई दोरो है।”
26 ओ सुणगे बां पूछयो तो किंगो उद्धार हो सकै?
27 बण केयो, “झिको काम आदमी कोनी कर सकै बिनै परमेसर कर देवै।”
28 जद पतरस बोल्यो, “देख, म्हे तो सारो घर बार छोड़गे थारै लारै हो'ग्या।”
29 यीसू केयो, “तूं ठीक केयो है, पण मैं तनै साची केऊं कै झिकैई परमेसर गै राज गै खातर आपगो घर-बार, लुगाई, भाई, मां-बाप या टाबर छोड़या है।
30 बानै ईं जीवन में कई गुणा जादा आसिस मिलसी अर आण आळै जुगa में अनन्त जीवन बी मिलसी।”
आपगी मोत गै बारै में यीसू गी तीसरी बात
31 फेर यीसू आपगै बारा चेला नै बुला'गे केयो, “देखो, आपां यरुसलेम नगर में चालां'गा अर झिकी बातां ‘मिनख गै बेटै’ गै बारै में परमेसर गी बात बोलण आळावां गी लिखेड़ी है बे सारी बठै पूरी होवैगी।
32 क्यूंकै बो गेर यहुदियां गै हातां ऊं पकड़ाइजैगो अर लोग बिंगो मजाक उडावैगा अर बिंगी बेजती करेगा। अर बि पर थूकैगा अर कोड़ा मारैगा अर जान ऊं मार देवैगा।
33 पण बो तीसरै दिन पाछो जीज्यगो।”
34 पण चेला बांगी बात नै समझ कोनी सक्या अर आ बात बाऊं परमेसर लूका'गे'ई राखी कै ऐ बातां किंगै खातर केण लागरया है।
आंधै भिखारी नै ठीक करणो
35 जद बे चालतां चालतां यरीहो नगर गै कनै पूग्या तो बठै सड़क गै किनारै आंधो आदमी भीख मांगण लागरयो।
36 बो रोळो सुणगे पुछ्ण लागग्यो, “अठै के होण लागरयो है?”
37 लोगां बतायो कै “नासरत आळो यीसू जाण लागरयो है”
38 जद बण जोर ऊं हेलो मारयो, “हे नासरत आळा यीसू, राजा दाऊदb गै कुळ गा, मेरै पर दया करो।”
39 झिका लोग सारा ऊं आ'गे जाण लागरया बे बिनै रोळा करण लागग्या कै तेरूं चुप कोनी रेईजै के, पण बो भिखारी ओर जोर जोर ऊं हेला मारण लागग्यो कै हे यीसू, राजा दाऊद गै कुळ गा, मेरै पर दया करो।
40 जद यीसू रूकै'गे आग्या दी कै, “बिनै मेरै कनै ल्याओ। जद बिनै कनै ल्याया तो पूछयो तूं के चावै? मैं तेरै खातर के करूं?”
41 बण केयो, “हे प्रभु, मैं चाऊं कै मनै दिखण लागज्य”
42 यीसू केयो, “हां तूं देख, तेरै बिस्वास तनै ठीक कर दियो”
43 जद चाणचकै ई बिनै दिखण लागग्यो अर बो परमेसर गी बडाई करतो बांगै सागै चाल पड़यो। अर सारा देखण आळा परमेसर गी भोत बडाई करण लागग्या।