मजदूर गी मिसाल
20
1 सुरग गो राज एक अंगूरां गै बाग खातर दिनगे टेम मजदूरिया ल्याण गेयै एक जमिन्दार बरगो है
2 बण चांदी गै रिपिया पर मजदूर कर'गे काम करण खातर बाग में घाल दिया।
3 नौ बजे जमिन्दार घरूं बारै गेयो तो बण देख्यो कै केई लोग बजार में इनै बिनै इंया ई बेकार में खड़या है।
4 जद बण बानै केयो, “थे मेरै मजदूरी पर चालो। जितो थारो हिसो बणसी, मैं थानै दे देयूंगा।”
5 जद बे काम पर उड़ग्या, फेर बण दोफारे बारा बजे अर फेर तीन बजे बिंया करयो।
6 फेर बो पांच बजे ओर बजार में गेयो। फेर बण लोगां नै बेला खडया देख्या। जद बण पूछयो, “थे बेकार में बेला क्यामी खडया हो।”
7 बा केयो, “म्हानै मजदूरी पर कोई कोनी लेग्यो।” जद बण केयो, “मेरै बाग में मजदूरी पर चालो।”
8 जद आथण होयो, तो जमिन्दार आपगै मुनिम नै केयो, “झिका मजदूरिया पेली आळा अर बाद आळा, सारा नै बुला'गे बांगी धयाड़ी दे दे।”
9 जद बण सारा नै एक एक चांदी गो रिपियो दे दियो।
10 फेर झिका दिनगे लागग्या बा सोच्यो म्हानै कीं जादा मिलसी। पण सारा नै एक एक रिपियो ई मिल्यो।
11 रिपियो तो बा ले लियो पण जमिन्दार सागै ओखा होगे केण लागग्या।
12 झिका म्हारूं बाद में आया, बा एक घंटो ई काम करयो। फेर बी थे सारा नै एकसी मजदूरी दी। मैं तो सारै दिन तावड़ै में काम करयो।
13 बामूं एक जणै नै जमिन्दार केयो, “मैं थारै सागै कोई भेदभाव कोनी करयो। आपणी पेला ई एक रिपिया में बात खोलेड़ी है।
14 झिको हक बणै बो लेल्यो अर जाओ। झिका नै बाद में ल्यायो बानै बी एक रिपियो देस्यूं झिको थानै दियो है।
15 मनै मेरो धन कितो कितो बांटणो है, इंगो हक मनै है। मैं आच्छो काम करूं, ईंखातर थे लोग मेरै पर रीस बळो।
16 ईंखातर झिका पेला है बे बाद में होज्येगा अर झिका बाद में है बो पेलां होज्येगा।”
आपगी मोत गै बारे में यीसू गी तीसर परमेसर गी बात
17 जद यीसू आपगै बारै चेला सागै यरुसलेम जावै हो तो बानै एक पासै ले जा'गे चालता चालता केयो।
18 “सुणो। आपां यरुसलेम पूगण आळा हा। मिनख गै बेटै नै बठै मुख्य याजकां अर नेम सिखाण आळां गै हाता में पकड़ीजैगो। बे बिनै मोत गी सजा दयगा।
19 फेर बे गेर यहुदियां गै हात में बिनै सोंप दयगा अर बे बिंगी बेजती करेगा अर कोड़ा मारैगा अर करूस पर चढा दयगा पण बो तीसरै दिन पाछो जींवतो होज्येगो।”
20 फेर जबदी गै बेटै गी मां आपगै बेटा सागै यीसू कनै आयी अर झुकगे प्रणाम करयो अर कीं मांग्यो।
21 यीसू बिनै केयो, “तू के चावै? बा बोली कै मैं चाऊं मेरा दोनूं बेटा नै तेरै राज में एक थारै सजै पासै एक खबै पासै बिठा लेयी।”
22 यीसू बोल्यो, “तू कोनी जाणै तू के मांगण लागरी है? मैं झिको दुख सेऊंगा, बो थे सेल्यगा के?” बा केयो, “हा मैं सेल्यूंगा।”
23 यीसू बानै केयो, “थे ओ दुख तो सेल्येगो, पण मेरै दाए अर बाए बिठाण गो मेरै कनै हक कोनी। अठै बैठण गो हक तो बानै है झिका नै मेरो पिता परमेसर बिठासी।”
24 जद बा दूसरा दस चेला ओ सुण्यो तो बा दोनां पर भोत रीस बळया।
25 जद यीसू बानै बुला'गे केयो, “थे जाणो हे कै, गेर यहुदी राजा बा लोगां पर आपगी ताकत दिखाणी चावै। अर बांगा मुख्य नेता लोगां पर आपगो हक जताणो चावै।
26 पण थारै बिचाळै इंया ना'ई होणो चईयै। पण थारै मूं झिको मोटो बणणो चावै बिनै दास बणणो पडेगो।
27 अर थारै मूं झिको प्रधान बणणो चावै बिनै सारा गो दास बणणो पडेगो।
28 जिंया मिनख गो बेटो है, बो आपगी सेवा कराण कोनी आयो पण सेवा करण आयो है। अर भोत लोगां खातर आपगा प्राण देगे लोगां नै बचाण खातर आयो है।”
29 जद यरीहो नगर ऊं जाण लागरया तो एक भोत मोटी भीड़ बांगै लारै चाल पड़ी।
30 बठै सडक गै किनारै दो आंधा आदमी बैठया। जद बानै ठा लागग्यो कै यीसू जावै है। तो बा रोळो मचागे केयो, “हे प्रभु, दाऊद गा बेटा म्हारै पर दया कर।”
31 जद भीड़ में लोगां बानै धमकाया कै चुप रेओ। पण बे ओर जोर ऊं रोळो मचाण लागग्या। प्रभु दाऊद गा बेटा म्हारै पर दया कर।
32 जद यीसू रुकगे केयो, “थे के चावो मैं थारै खातर करूं।”
33 बा केयो, “प्रभु म्हे चावा म्हानै दिखण लागज्यै।”
34 यीसू नै बा पर दया आ'गी। जद बण बांगी आंखयां पर हात लगायो, बि टेम ई बानै दिखण लागग्यो। अर बे बिंगै लारै चाल पड्या।