चुंगी लेण आळो बावनो जक्कई
19
1 फेर जद यीसू यरीहो नगर माखर जाण लागरया।
2 बठै जक्कई नाम गो रोमी सरकार गै खातर चुंगी लेण आळा गो मुखिया हो अर बो भोत अमीर हो।
3 बो यीसू गा दरसण करणो चावै ओ पण बोळी भीड़ गै कारण बो देख कोनी सक्यो क्यूंकै बो बावनो हो।
4 जद बो भाजगे, आ'गे रा पर एक मोटै दरखत पर चडग्यो। क्यूंकै यीसू बि राई आण लागरयो।
5 यीसू जद बि दरखत कनै आयो तो जक्कई नै उपर चडेड़ो देखगे हेलो मारयो कै, “अरै ओ जक्कई, दबादब नीचे आ'ज्या क्यूंकै मनै आज तेरै घरै रेणो है।”
6 बो दबादब उतरयो अर राजी राजी बानै आपगै घरै लेग्यो।
7 ओ देखगे सारा बड़बडाण लागग्या कै ओ तो पापी आदमी गै घरे'ईं जावै।
8 जद यीसू बिंगै घरै आयो तो जक्कई खड़यो होगे केयो, “हे प्रभु, आज मेरो आदो धन गरीबा नै देऊं अर झिकै आदमी कनूं मैं ठगी मारी है बिनै चोगुणो कर'गे देऊं।”
9 जद यीसू बिनै केयो, “आज'ई घर गो कल्याण होयो है कै ईंखातर ओ ई परमेसर गै दास अबरहाम गै घराणै गो है।”
10 ईंखातर “मिनख गो बेटो इंगै बरगा पापियां नै ढूंढ'गे आंगो कल्याण करण ई आयो है।”
दस म्होरां गी मिसाल
11 जद लोग बांगी बातां सुंणता सुंणता यरुसलेम नगर गै कनै आया तो लोग सोचा कै यीसू म्हारो राजा बणण आळो ई है जद यीसू बानै एक मिसाल बताई कै,
12 एक बारी एक राज घराणै गो आदमी आपगै देस गो राजा बणगे पाछो आण खातर दूसरै देस में उड़ग्यो।
13 जाण ऊं पेलां बण आपगै दस नोकरां नै बुला'गे बानै दस सोनै गी म्होरां देगे केयो, “जद तांई मैं पाछो नां आऊं जद तांई थे आऊं बोपार करियो।”
14 पण बिंगै ईं नगर गा कई आदमी झिका बिनै राजा बणाणो पसंद कोनी करै हा, बां आपगै दूत बिंगै लारै ओ केण नै भेज्या कै म्हे कोनी चावां कै ओ म्हारो राजा बणै।
15 पण बो राजा बणगे पाछो आयो तो बण आपगै नोकरां नै झिका नै म्होरां देगे गेयो बानै कनै बुलाया कै बाऊं लेण देण गो हिसाब करां कै कितो कमायो है।
16 जद पेलै आ'गे बोल्यो, “हे स्वामी, तेरी एक म्होर ऊं मैं दस ओर म्होरां कमा'ली।”
17 बण केयो, “स्याबास, धन्य है तूं उतम दास। तूं थोड़े में ई बोळो बिस्वास आळो निकळयो। जा, तनै दस गामां गो प्रधान बणा दियो।”
18 दूसरै केयो, “हे स्वामी, तेरी म्होर ऊं मैं पांच ओर कमा'ली।”
19 बण बिनै केयो, “स्याबास, जा तनै पांच गामां गो प्रधान बणा दियो।”
20 तीसरै आ'गे केयो, “हे स्वामी, देख तेरी म्होर आ'री। इनै मैं पलै बांदगे राखी।
21 क्यूंकै मनै तेरूं डर लागै हो कै तूं भोत करड़ो आदमी है क्यूंकै तूं झिको बीजै'ई कोनी, बिनै ई तूं बाड़ल्य अर झिको तेरो कोनी बो तूं ले'ल्य है।”
22 बण बिनै केयो, “हे दुस्ट दास, मैं तेरी बातां ऊं तेरो न्याय करूंगा। जद तूं मनै जाणै ओ कै मैं करड़ो आदमी हूं अर झिको मैं बिज्यो कोनी बिनै मैं बाड़'ल्यूं अर झिको मेरो कोनी बिनै चकल्यूं।
23 तो मेरी म्होर नै ब्याज पर दे देंतो मैं आपी आ'गे सणै ब्याज ले लेंतो।
24 अर झिका लोग बिंगै कनै खड़या बानै केयो कै ईं कनूं आ म्होर लेगे झिकै आदमी दस कमाई है बिनै दे देवो।”
25 बां केयो स्वामी, “बि कनै दस म्होरां तो है।”
26 जद यीसू लोगां नै केयो, “मैं थानै केऊं झिकां गै कनै है बानै ओर देईजैगो गो अर झिका गै कनै ना है बां कनूं बो ई लेईजैगो झिको बां कनै है।”
27 फेर राजा आपगै सिपाईयां नै हुकम दियो, “मेरा दुसमण झिका मनै कोनी चावै कै मैं बां पर राज करूं, बानै अठै ल्यागे मेरै सांमै मारदयो।”
यरुसलेम में स्याही यातरा
28 आ मिसाल बतागे यीसू यरुसलेम कानी आपगै चेला गै आ'गे-आ'गे चाल पड़यो।
29 जद बे बेतफेगा अर बैतनिय्याह गाम गै कनै जेतुन प्हाड़ कनै पूग्या तो बां आपगै दो चेला नै केयो,
30 कै सांमलै गाम जाओ बठै थानै एक गधी गो बच्चों बांदेड़ो मिलैगो झिकै पर अजे तांई कणैई सवारी कोनी करी, बिनै खोलगे ल्याओ।
31 जे थानै कोई कीं पूछै तो के देईयो प्रभु नै इंगी लोड़ है।
32 फेर चेला जा'गे देख्यो तो बानै बिंया ई मिल्यो जिंया बा केयो।
33 जद बे गधी गै बच्चै नै खोलण लाग्या तो बिंगै धणि केयो कै “इनै क्यामी खोलो?”
34 बां केयो, “प्रभु यीसू नै इनै मंगायो है अर बण केयो है जद धणि बानै कीं कोनी केयो।”
35 अर बिनै खोलगे यीसू कनै लिआया। अर आपगा खेसला उतारगे बि पर बिछा'गे यीसू नै बि पर बिठा दियो अर चाल पड़या।
36 अर जद बे चाल्या तो सगळा लोग आदर करण खातर बांगै आगै आगै आपगा खेसला बिछांता गेया।
37 अर जद बे जेतुन प्हाड़ गै कनै पूगग्या तो बिंगै चेला अर सारा लोग बांगै चमत्कारां गी झिका बां देख्या, बांगै खातर जोर जोर ऊं परमेसर गी बडाई करण लागग्या।
38 “धन्य है बो राजा झिको धरती पर परमेसर गै नाम ऊं आवै। ईंखातर सुरग में सांती अर आकास में परमेसर गी बडाई होवै।”
39 जद लोग बडाई करा तो फरीसी लोग बोल्या, “हे गुरूजी, आनै चुप कराओ।”
40 यीसू बानै केयो, “जे ऐ लोग चुप हो'ग्या तो ऐ पथर जय जयकार करण लागज्यगा।”
यरुसलेम गै खातर रोणो
41 जद बो यरुसलेम नगर गै कनै आयो तो बिनै देखगे आंखा पाणी ऊं भरिजैगी अर केण लागग्यो,
42 “हे यरुसलेम गा लोगो, जे सांती गी बातां नै जाण लेंता तो ठीक रेंता पण अब परमेसर बे बातां थारूं लको दी।
43 क्यूंकै थारै पर हिस्या दिन आवैगा कै थारा दुसमण थानै च्यारूं-पासू घेर'गे थानै दबा'ल्यगा।
44 अर तेरै में रेण आळा सारा लोगां नै नास कर देसी अर सारो कीं ढा देसी। क्यूंकै प्रभु थानै बचाण आयो जद तो थे बांगी कोई बात मानी कोनी।”
मिन्दर माऊं बोपारिया नै बारै काड़णो
45 फेर यीसू मिन्दर में जा'गे बोपारी झिकां बठै दुकानां लगा राखी बानै बारै काड़ण लागग्या।
46 अर रीसा में आ'गे केयो, “पवितर सातर में तो लिखेड़ो है कै ‘ओ मेरो पराथना गो घर होवैगो’ अर थे इनै डाकुआं गो अड्डो बणा राख्यो है।”
47 यीसू रोज मिन्दर में परबचन करण जांता जद मुख्य याजक अर सासतरी लोग, मुखिया लोग बानै मरवाण गो मोको ढूंढता रेंवता हा।
48 बे बिनै फसाण गी कोई तरकीब कोनी निकाळ सक्या। क्यूंकै बिनै मानण आळा भोत लोग हा बे बांगी बातां नै भोत ध्यान ऊं सुंणता हा।