यरुसलेम में जीत गै जाणो
11
1 फेर यीसू अर बिंगा चेला यरुसलेम गै कनै बेतफगे अर बेतनिया नाम गै दो गामां कनै पोंच्या झिका जेतुन पहाड़ पर बसेड़ा हा, यीसू आपगै दो चेला नै आ'गे भेज्या।
2 अर बानै केयो, “आ'गे झिको गाम है बिमै जाओ। जिंया ई थे बि गाम में बडोगा थानै एक गदी गो बच्चों बांदेड़ो दिखसी। बि पर अजे तांई कणई सवारी कोनी करी है। बिनै खोलगे अठै ले आओ।
3 जे थानै कोई पूछै कै इनै क्यूं थे खोलो हो, तो थे बिनै केईयो प्रभु नै इंगी जरूरत है अर बेगो ई पाछो भेज दयांगा।”
4 दोनूं भेला गेया अर एक गधी गै बच्चै नै एक घर गै दरवाजा गै बारे गली में बांदेडो देख्यो बिनै जिंया ई खोलण लागग्या।
5 बठै खडया लोगा बानै पूछयो, “के करण लागरया हो। ईं गधै गै बच्चै नै क्यामी खोलो हो?”
6 जिंया यीसू चेला नै केयो हो, बिंया ई बानै बता दियो। जद लोगा गधी गै बच्चै नै ले जाण दियो।
7 बा गधी गै बच्चै नै यीसू गै कनै ल्यागे बि पर आपगा गाबा रख दिया अर बो बिंगै उपर बेठ ग्यो।
8 भीड़ ऊं केई लोगा आपगा गाबा अर केई लोगा दरखता गी डालिया खेता ऊं ल्यागे रा में बिछा दी।
9 यीसू गै आ'गे अर लारै चालण आळा लोग ऊंची आवाज में केण लाग्या,
“परमेसर गी बडाई होवै।
परमेसर गी जय जयकार होवै। तू झिको परमेसर कनूं आयो है।
परमेसर गी खास आसिस थारै पर है।
10 म्हारै बाप दाऊद गो राजा झिको आण आळो है धन्य है।”
परमेसर गी जय जयकार होवै।
11 यीसू यरुसलेम आया अर मिन्दर में गेया। चारूंमेर घूमगे यीसू ध्यान ऊं सारो कीं देखयो। पण देर होण गै कारण बारा चेला गै सागै बेतनिया गाम में उड़ग्या।
बिना फळ गो अंजीर गो दरखत
(मत्ती 21:18, 19)
12 दूसरै दिन जद यीसू अर बिंगा चेला बेतनिया गाम ऊं निकल्या तो यीसू मसी नै भूख लागगी।
13 थोड़ी सी दूर बा पता ऊं भरेडो अंजीर गो दरखत देखयो। यीसू बिंगै कनै गेया कै बिंगै अंजीर लागेड़ा है के कोनी। जद बे बिंगै कनै गेया तो एकला पता ईं लागेडा देखया क्यूंकै बो टेम अंजीर पाकण गो कोनी हो।
14 फेर बी दरखत नै सराप दियो आज गै बाद तेरो फळ कोई बी खा ना सकै। चेला यीसू गी आ बात सुणी।
मिन्दर मूं ब्यापारियां नै बारै काड़णो
15-16 फेर बे यरुसलेम आया अर बठै मिन्दर में गेया अर बठै लोगा दुकानां लगा राखी बानै बारै काड़ण लागग्यो अर सारा नै सामान खरिदणो अर बेचणो बंद कर दियो।
17 फेर यीसू परमेसर गो बचन सिखाण लागग्यो। बण केयो, “थे जाणो हो के पवितर सासतर में इंया लिखेड़ो है कै मेरो मिन्दर सारी जाती गै लोगा खातर पराथना करण गो घर हो। पण थे इनै बोपार गो घर बणा दियो।”a b
18 जद खास अर यहुदी नेम सिखाण आळा यीसू नै मारण गी कोसिस करण लाग गेया पण यीसू कनूं बे डरता हा क्यूंकै सारा लोग बिंगो बचन सुणगे हेरान हो जावंता हा।
19 जद आथण होई तो यीसू अर चेला सैहर ऊं बारे उड़ग्या।
सुकेड़ै अंजीर दरखत गी सिक्सा
20 दूसरै दिन दिनगे जद यीसू अर चेला गाम ऊं जावै हा तो। बा बी अंजीर गै दरखत नै देखयो झिकै नै यीसू स्राप दियो हो। बो जड़ ऊं सूख गयो हो।
21 पतरस नै याद आयो अर बण यीसू नै केयो, “गुरूजी देखो, ओ बो ई अंजीर गो दरखत हो झिकै नै थे स्राप दियो बो सुख ग्यो।”
22 यीसू केयो, “परमेसर पर बिस्वास करो।
23 मैं थानै साची केऊं हूं कै जे कोई आपगै पूरै दिल ऊं बिस्वास करै है अर कोई संका कोनी करै कै जिंया बो केवेगो बिंया जरूर हो जासी अर जे पहाड़ नै केवै, जा'गे समुन्दर में पड़ जा तो बो बिंया ई हो'सी।
24 मैं थानै केऊं हूं कै जद थे लोग परमेसर कनूं कोई बी चीज पराथना कर'गे मांगो हो तो इंया बिस्वास करो कै बा थानै मिलैगी तो थानै जरूर मिलसी।
25 जद थे पराथना करो हो जे थारै मन में किनैई सागै है कीं तरियां गो बैर है तो बिनै थे माफ कर दयो। जद थारो पिता परमेसर झिको सुरग में है थानै थारै पापा गी माफी दे देवैगो।
26 जे थे माफ ना करोगा तो थारो पिता झिको सुरग में है थारै पापा गी माफी बी कोनी देवैगो।”
यीसू गै अधिकार पर सवाल
27 बे यरुसलेम पूगगे मिन्दर में गेया, यीसू मिन्दर गै आंगण में चालण लागरया हा तो खास याजक अर नेम सिखाण आळा अर समाज गा मोटा आदमी बांगै कनै आया।
28 अर बे यीसू नै पूछण लाग्या, “काल तू झिको कीं करयो बो करण खातर तनै कण केयो, इंया करण गो अधिकार तनै कुण दियो है।”
29 यीसू बानै उतर दियो, “मैं थानै एक सवाल पूछूं हूं, जे बिंगो उतर देवैगो तो मैं बताऊंगा कै इयां करण गो मनै कण केयो?
30 यूहना झिको पाणी में बतिस्मो दियो बो सुरग कानूं ईं या फेर माणसा कानूं इंगो मनै उतर दयो।”
31 बा लोग आपसरी में बाता करी अर एक दूसरै नै केण लाग्या जे आपां केवेगा कै यूहना गी डूबगी परमेसर कानूं ईं तो यीसू केसी फेर थे बिस्वास क्यूं कोनी करयो।
32 जे आपां केवां, यूहना कानी ऊं है क्यूंकै सारा लोग यूहना नै परमेसर गो संदेस सुणाण आळो मानता ई बात ऊं बे लोग डरता हा।
33 ईंखातर बा उतर दियो, “म्हे कोनी जाणा,” यीसू फेर केयो, “मैं बी थानै कोनी बताऊं कै मैं ओ काम किंगै अधिकार ऊं करूं हूं।”