गलील गै काना गाम में पेलो चमत्कार
2
1 गलील प्रदेस गै काना गाम में तीसरै दिन किंगैई ब्या हो। यीसू गी मां बी ब्या में आएड़ी ही।
2 यीसू अर बिंगा चेला नै बी ब्या में बुलाएड़ा हा।
3 जद बठै दाख गो रस मुक गयो तो, यीसू गी मां यीसू नै केयो, “बांगै कनै अब ओर दाख गो रस कोनी है।”
4 यीसू आपगी मा नै केयो, “हे मा, आ बात थे मनै क्यूं केओ? मेरो काम करण गो टेम अजे तांई कोनी आयो।”
5 फेर यीसू गी मां ब्या में काम करण आळै नोकरां नै केयो, “झिको कीं बो थानै केवै, बिंया ई करियो।”
6 बठै पाणी भरण गै खातर छ माटला रखेड़ा हा। ऐ माटला यहुदी लोगां गै धारमिक रीति रिवाज गै अनुसार हात धोगे सुद्ध करण गै खातर रखेड़ा हा। हरेक माटले में दो तीन मण पाणी समावंतो हो।
7 यीसू ब्या में काम करण आळै नोकरां नै केयो, “आ माटला में पाणी भर दयो। नोकरां माटला नै उपर तांई भर दिया।”
8 फेर बण बानै केयो, “माटला माऊं थोड़ो काढ गै भोजन गै प्रधान नै दिखाओ।” अर बे ले गया।
9 भोजन गै प्रधान जद बो पाणी पीयो तो बि टेम बो दाख गो रस बण गयो हो, बिनै ठा कोनी हो कै दाख गो रस कठूं आयो पण झिका नोकरां माटला माऊं पाणी काढयो बानै पतो हो। फेर भोजन गै प्रधान बीन नै बुला'गे केयो,
10 “हर कोई पेला आच्छो दाख गो रस देवै है जद लोग धाप जावै है तो थोड़ो बिऊं हळको दाख गो रस देवै है पण थे अजे तांई बढिया आळो दाख गो रस मेल राखयो है।”
11 यीसू गलील गै काना गाम में पेलो चमत्कार करयो। ओ चमत्कार गै द्वारा यीसू आपगी मेमा प्रकट करी। अर बिंगा चेला बि पर बिस्वास करयो।
यीसू मिन्दर में
12 इंगै बाद यीसू आपगी मां, भाईयां अर चेलां गै सागै कफरनहूम गाम उड़ग्यो अर बठै केई दिन रेयो।
13 यहुदियों गै फसह गो त्यूंहार नेडै़ हो ईंखातर यीसू यरुसलेम उड़ग्यो।
14 बठै मिन्दर गै आंगणे में देख्यो कै लोग बळद, भेड़ अर कबूतर बेचण लागरया है अर मिन्दर में चढाण खातर विदेसी रिपया नै बदलगे देसी रिपिया देण आळा नै बैठया होया देख्या।
15 ईंखातर बण जेवडिया गो कोड़ो बणागे सारां लोगां अर बांगी भेड़ अर भळदां नै मिन्दर ऊं बारै काढ दिया अर मिन्दर में चढाण खातर विदेसी रिपया नै बदलगे देसी रिपिया देण आळा गा रिपियां खिंडा दिया अर बांगा पीड़ा मूंदा मार दिया।
16 अर कबूतर बेचण आळा नै केयो, “आनै अठुं बारै ले जाओ,” मेरै पिता गै घर नै खरीदण अर बेचण आळा गो घर ना बणाओ।
17 जद बिंगा चेला नै परमेसर गी लिखेड़ी बाता याद आई कै परमेसर थारै मिन्दर गै बारे में मेरी भगती मेरै मां आग गी तरियां बळती रेवै है।
18 फेर यहुदी अधिकारिया यीसू नै पूछयो कै तू म्हानै के चमत्कार दिखावैगो झिकै ऊं ओ साबित हो'ज्य कै ओ सगळो कीं करण गो अधिकार तेरै कनै है।
19 यीसू बानै जबाब दियो, “ईं मिन्दर नै ढा दयो अर मैं इनै तीन दिनां में बणा देऊंगा।”
20 यहुदियां गै अधिकारिया केयो ईं मिन्दर नै बणाण खातर छ्यालिस साल लागग्या हा तू इनै तीन दिनां में किंया बणा देवैगो।
21 पण बण खुद गै सरीर गै बारै में केयो हो।
22 अर जद बो मरेड़ा माऊं जी उठयो तो बिंगै चेला नै याद आयो कै आ बात बण केई ही अर जद बानै पवितर सासतर अर यीसू गी केयेड़ी बाता पर बांगो बिस्वास मजबूत हो'ग्यो।