यूहना 3

यीसू अर निकुदेमुस

1 निकुदेमुस नाम गो एक यहुदियां गो नेता बठै हो अर बो फरीसिया माऊं हो। 2 एक रात बण यीसू कनै आ'गे पूछयो, हे गुरूजी, म्हे जाणा हा कै म्हानै सिखाण खातर थे परमेसर गी ओर ऊं आया हो क्यूंकै थे झिका निसान दिखावो हो बे परमेसर गी मदद बिना कोई कोनी दिखा सकै।

3 यीसू बिनै उतर दियो, “मैं तनै साची साची केऊं जे कोई आत्मिक रूप ऊं नुअं सिरै ऊं जन्म ना लेवै तो बो परमेसर गै राज में भागिदार कोनी बण सकै।”

4 निकुदेमुस बिनै पूछयो, “जे कोई आदमी बुढो हो जावैगो तो फेर जन्म किंया ले सकै है। क्यूंकै जन्म लेण खातर बो दूसरै आपगी मा गै कोख में कोनी जा सकै।”

5 यीसू उतर दियो, “मैं तनै साची साची केऊं जद कोई पाणी अर पवितर आत्मा ऊं जन्म लेवै है जद ई बो परमेसर गै राज में जा सकै है। 6 अर मां बाप ऊं लोग जन्म लेवै है तो बे सिरफ सरीर ऊं जन्म लेवै पण आत्मिक जीवन गी सुरुवात केवल पवितर आत्मा ऊं होवै है। 7 मैं झिको कीं तनै केयो बि पर अचंभो ना कर, तनै नुए सिरै ऊं जन्म लेणो ई होवैगो। 8 पून गो जिनै जी करै बा बिनै चालै है, थे बिंगी आवाज सुण सको हो पण थे कोनी जाण सको कै बा कठूं आवै है ओर किनै जावै है। आत्मा ऊं जन्म लेड़ो हर एक आदमी हिस्यो ई है।” 9 निकुदेमुस उतर दियो कै, “ऐ बातां किंया हो सकै।”

10 ओ सुणगे यीसू बिनै केयो, “तू इसराएल गो एक ई गुरू होगे बी तू आ बात क्यूं कोनी समझै। 11 मैं तनै साची साची केऊं झिकी सच्चाई म्हे जाणा हां बो ई म्हे बोला हां। अर बो ई कीं बतावां हां झिको कीं म्हे देख्यो है। पण थे लोग जिंया म्हे केवां हां कोनी मानो। 12 जद मैं थानै धरती गी बातां बताऊं तो तूं बि पर बिस्वास कोनी करै। ईंखातर जे मैं सुरग गै बारै में बताऊं तो बि पर किंया बिस्वास करेगो। 13 मैं झिको मिनख गो बेटो सुरग ऊं आयो हूं अर अब तांई कोई बी सुरग पर कोनी गेयो पण केवल मैं ई गेयो हूं। ईंखातर सुरग गै बारै में केवल मैं ई जाणू हूं। 14 जिंया मूसा बन उजाड में सांप नै ऊंचो चढायो इंया ई मैं झिको मिनख गो बेटो हूं आपगी जाण देण खातर लोग करूस पर चढावैगा। 15 जिऊं झिको कोई बि पर बिस्वास करसी बिनै अनन्त जीवन मिलसी।”

16 क्यूंकै परमेसर संसार गै लोगां सागै इतो प्रेम करयो कै आपगो एकलोतो बेटो दे दियो कै अर कोई बी बि पर बिस्वास करै बो नास ना होवै पण अनन्त जीवन पावै। 17 परमेसर आपगै बेटै नै संसार गै लोगा नै सजा देण खातर कोनी भेज्यो पण बिंगै द्वारा संसार गै लोगा नै मुकती मिलज्य ईंखातर भेज्यो। 18 झिको परमेसर गै बेटै पर बिस्वास करै है बि पर सजा गी आग्या कोनी होवै पण झिको बि पर बिस्वास कोनी करै बिनै दोसी बणागे सजा मिलैगी क्यूंकै बण परमेसर गै एकलोते बेटै पर बिस्वास कोनी करयो। 19 अर सजा गी आग्या गो कारण ओ है कै परमेसर गो बेटै एक जोती गी तरियां ई संसार में आयो पण लोग भोत बुरा काम करण आळा हा। ईंखातर लोग जोती गै उपर प्रेम पसंद कोनी करयो पण अंधकार जिंया पाप करणो पसंद करयो। 20 क्यूंकै झिको कोई बुराई करै है बो जोती नै पसंद कोनी करै अर बो जोती गै कनै कोनी आवै जिऊं बिंगा पूरा काम सामणै ना आ जावै। 21 पण झिको सच्चै रास्तै पर चालै है बो जोती गै कनै आवै है अर बो जोती परगट करै है कै ओ झिको करै है बो परमेसर गी इच्छा गै अनुसार करै है।

यीसू गै बारे में यूहना बतिस्मो देण आळा गी गवाई

22 कीं दिनां गै बाद यीसू आपगै चेला गै सागै यहुदियां प्रदेस में आयो। चेला गै सागै रेगे लोगा नै बतिस्मो देण लागग्यो। 23 जद यूहना बतिस्मो देण आळो बी सालोम सैहर गै नेडै़ ऐनोन गाम में लोगा नै बतिस्मो देवंतो हो क्यूंकै बठै भोत पाणी हो अर हर रोज लोग आ'गे बतिस्मो लेवंता हा। 24 आ धटना यूहना जेळ में जाण ऊं पेला होई। 25 बठै यूहना गै चेला अर एक यहुदी गो सागै सुद्धी गै बारै में वाद विवाद होयो। 26 अर बा चेलां यूहना कनै आ'गे केयो, गुरूजी, झिको आदमी यरदन गै दूसरै पार थारै सागै हो अर बिंगै बारै में थे बतायो हो कै बो ई मसी है अब बो आदमी लोगां नै बतिस्मो देण लागरयो है अर भोत लोग बिंगै कनै जाण लागरया है।

27 यूहना बानै उतर दियो कै जे परमेसर गी इच्छा ना होवै तो कोई कीं कोनी ले सकै। 28 मैं थारै सारै लोगा गै सामै बतायो हो मैं मसी कोनी हूं पण बिंगै खातर रा तैयार करण खातर बिऊं पेला भेज्यो गेयो हूं। 29 झिको बीनणी नै ब्या कर'गे ले जावै है बो ई बीन होवै है अर बीन गो सरबालो खड़यो बिनै उड़ीकतो रेवै है अर जद बो बीन गी आवाज सुणै है, जद बो भोत राजी होवै है ओ सुणगे सारा यीसू गै कनै जाण लागग्या हा, इंऊं मेरी खुसी पूरी होवै है। 30 जरूरी है कै बो पूरी तरियां ऊं मोटो होवै अर मैं बिऊं छोटो होऊं।

31 यूहना बतिस्मो देण आळै फेर बानै केयो बो ई सुरग ऊं आयो है अर सारा ऊं म्हान है। झिको ईं धरती ऊं आयो है, बे सिरफ आदमी है अर बे सिरफ ईं धरती गै बारै में ई बाता करै है। पण बो सुरग ऊं आयो है। ईंखातर बो सगळा ऊं म्हान है। 32 झिको कीं बण सुरग में देख्यो अर परमेसर ऊं सुण्यो बिंगी गवाई देवै है पण इंगी गवाई कोई मानै कोनी। 33 पण झिका बिंगी गवाई मानल्य तो बो गवाई देवै है कै परमेसर साच्चो है। 34 क्यूंकै बो झिकै नै परमेसर भेज्यो है बो परमेसर गी बाता ई बोलै है। क्यूंकै परमेसर बिनै पवितर आत्मा पूरी तरियां ऊं देवै है। 35 पिता आपगै बेटै नै प्रेम करै है अर बण सारी चिजां गो अधिकार बिंगै हात में दे दियो। 36 झिको परमेसर गै बेटै पर बिस्वास करै है बिनै ई अनन्त जीवन मिलैगो। पण झिको परमेसर गै बेटै गी आग्या नै कोनी मानै बिनै कदी अनन्त जीवन कोनी मिलैगो पण परमेसर बि पर रीस कर'गे सजा देवैगो।