यूहना 4

यीसू अर सामरी लुगाई

1 जद यीसू नै पतो लागग्यो कै फरीसिया सुण्यो है कै यीसू यूहना ऊं बोळा चेलां बणागे बानै बतिस्मो देण लागरयो है। 2-3 तो बो यहुदी प्रेदेस छोड़गे गलील प्रेदेस उड़ग्यो। यीसू आप बतिस्मो कोनी दिया पण बिंगा चेला देवा हा।

4 बिंगो सामरिया प्रेदेस ऊं होगे जाणो जरूरी हो। 5 ईंखातर बो सामरिया प्रदेस में एक नगर सूखार में आयो। ओ नगर बि जिग्या कनै हो, आ जिग्या याकूब आपगै बेटै युसुफ नै दी ही। 6 बठै याकूब गो कुओ हो, यीसू आपगी यातरा में भोत थक ग्यो हो। ईंखातर बो कुओ गै कनै बेठ ग्यो, आ बात लगभग दोफारे गै टेम गी है।

7 ओ टेम बठै एक सामरी प्रदेस गी लुगाई पाणी भरण आई, यीसू बिनै केयो, “मनै पाणी प्यादे।” 8 बिंगा चेला नगर में रोटी लेण गेयड़ा हा।

9 सामरी प्रदेस गी लुगाई यीसू नै केयो, “थे यहुदी होगे बी मेरूं पीण खातर पाणी क्यूं मांग्यो हो। मैं तो एक सामरी प्रदेस गी लुगाई हूं।” (यहुदी प्रेदेस गा लोग सामरी प्रदेस गै लोगां सागै कोई बी लेण देण कोनी राखता)।

10 यीसू उतर दियो तू कोनी जाणै कै परमेसर तनै के वरदान देणो चावै है। तेरै कनूं पाणी मांगण आळै नै बी तू कोनी जाणै पण जे तू बि कनूं मांगती तो बो तनै जीवन देण आळो पाणी देवंतो। 11 लुगाई बिनै केयो, “हे प्रभु, थारै कनै पाणी काड़ण खातर बालटी कोनी अर कुओ बी भोत डूंगो है फेर थे जीवन गो पाणी किंया देवैगो?” 12 थे के सोचो हो थे म्हारै बडेरै याकूब ऊं मोटो हो कै? झिका म्हानै ओ कुओ दियो। ईं कुओ ऊं याकूब अर बिंगै टाबरां अर बिंगा पसुआ समेत सगळा इमूं ई पीयो हो।

13 यीसू बिनै उतर दियो, “झिको कोई ओ पाणी पीएगो बिनै फेर बी तीस लागसी। 14 झिको पाणी मैं देवूं बो पाणी जे कोई पीओ है बिनै कदी तीस कोनी लागै। झिको पाणी मैं देऊंगा बिंगै माऊं एक बावड़ी बण जावैगी झिकी अनन्त जीवन खातर पाणी देवंती रेवैगी।”

15 लुगाई बिनै केयो, “हे प्रभु, बो पाणी मनै दे देवो कै मनै कदी तीस ना लागै अर कदी मनै कुओ पर पाणी खीचण ना आणो पडै।” 16 यीसू बिनै केयो, “जा अर आपगै घर आळै नै बुला'गे ल्या।” 17 लुगाई उतर दियो, “मेरो घर आळो है कोनी।” यीसू बिनै केयो, “तू सच्ची केवै है कै मैं बिना घर आळै गी हूं।” 18 तेरा पांच घर आळा हा, तू अब झिकै घर आळै गै सागै रेवै है। बो बी तेरो कोनी। ईंखातर तूं जिंया केयो बो सच्च है।

19 लुगाई बिनै केयो, “हे प्रभु, मैं समझू हूं कै थे एक परमेसर गी बात बताण आळो हो। 20 म्हारै बडेरा ईं पहाड़ पर आराधना करी पण थे यहुदी लोग केवो हो कै यरुसलेम में ई आराधना करणी चईयै।”

21 यीसू सामरी लुगाई नै केयो, “मेरी बात पर बिस्वास कर कै एक बो टेम आवैगो जद थे पिता परमेसर गी आराधना ईं पहाड़ गै उपर अर यरुसलेम में बी कोनी करोगा। 22 थे सामरी लोग बिनै कोनी जाणो, झिकै गी थे आराधना करो हो। पण म्हे यहुदी लोग बिनै जाणा हा झिकै गी म्हे आराधना करा हां क्यूंकै बचाण आळो यहुदियां मूं आवै है। 23 पण टेम आण लागरयो है अर आ'ईं ग्यो है। जद सच्चाई ऊं आराधना करण आळा लोग पिता परमेसर नै आपगै दिल अर मन ऊं अर परमेसर गी परगट करेड़ी सच्चाई ऊं करै है बि सच्चाई ऊं आराधना करसी क्यूंकै पिता परमेसर आपगै खातर हिसे लोगां नै ढूंढै है। 24 परमेसर आत्मा है। ईंखातर झिको बिंगी आराधना करै बो आत्मा अर सच्चाई ऊं बिंगी आराधना करणी चईयै।”

25 फेर बण बिनै केयो मैं जाणू हूं कै मसी झिकै नै लोग “मसी” केवै है बो आण आळो है जद बो आवैगो तो म्हानै सारो कीं बता देवैगो। 26 यीसू बिनै केयो, “मैं झिकी तनै बात केऊं हूं, मैं बो ई हूं।”

चेला गो पाछो आणो

27 इतै में बिंगा चेला आग्या, चेला यीसू नै लुगाई सागै बातां करतां देख्यो तो भोत अचंभो होयो। ईं पर यीसू कनूं कणी पूछयो कोनी कै थे ईं लुगाई ऊं के लेणो है अर इंयूं क्यूं बात करण लागरयो हो।

28 जद लुगाई आपगो घड़ो छोड़गे नगर में उड़गी अर लोगा नै केण लागी। 29 आओ अर देखो एक हिस्यो आदमी है मैं झिको कीं करयो बो सारो कीं मनै बता दियो, थे लोग ओ कोनी सोच्यो कै बो मसी हो सकै? 30 आ बात सुणगे लोग नगर छोड़गे यीसू कनै आग्या।

31 बि टेम यीसू गा चेला बिऊं बिनती करण लागग्या कै, “हे गुरूजी, कीं खा ल्यो” 32 यीसू चेला नै केयो, “मेरै कनै खाण खातर हिसी रोटी है, झिकै गै बारै में थे कोनी जाणो” 33 फेर बिंगा चेला आपसरी में पूछण लागग्या कै, “कोई बि खातर खाण नै कीं ल्यायो हो'सी के?”

34 यीसू बानै केयो, “मेरी रोटी आ है कै मैं मेरै भेजण आळै गी इच्छा गै अनुसार चालू अर बिंगो काम पूरो करूं। 35 थे बारी बारी केवो हो कै फसल बाड़ण खातर चार मिहना बाकी है पण मैं थानै केऊं झिका लोग आण लागरया है बानै देखो बे बी खेत गै समान है झिका खेत आच्छी तरियां पाकगे सफेद हो'ग्या है। 36 फसल बाड़ण आळा नै मजदूरी दी जावै है अर लोगा नै अनन्त जीवन में लेगे आणो ई बिंगो फसल बाड़णो है। ईंखातर फसल उगाण आळो अर बाड़ण आळो मिलगे राजी होवै। 37 ओ पद साची है एक आदमी उगावै है दूसरो बाडै़ है। 38 मैं थानै बा फसल बाड़ण घाल्या है झिकी पर थे मेहनत कोनी करी झिकी पर दूसरा मेहनत करी अर बांगी मेहनत गो फल थानै मिल्यो है।”

सामरिया गो बिस्वास करणो

39 बि नगर गै भोत सारा सामरिया यीसू पर बिस्वास करयो क्यूंकै बण लुगाई नगर में गवाई दी कै मैं झिको कीं करयो बण मनै सारो कीं साची बता दियो। 40 जद सामरी लोग बिंगै कनै आया तो बा बिनै आपगै सागै रेण गी बिनती करी। ईं पर बो बठै बांगै सागै दो दिन रुक्यो। 41 बिंगै बचन गै कारण अर बि पर भोत सारा लोग बिस्वास करयो।

42 अर बा बि लुगाई नै केयो म्हे तेरी एकली गवाई केण पर बिस्वास कोनी करयो पण अब म्हे आप बिनै सुण्यो है अब म्हे जाणग्या हा कै सच्च में ओ बो आदमी है झिको संसार नै मुकती देवैगो। 43 अर सामरी लोगां गै सागै दो दिन रेण गै बाद यीसू अर बिंगा चेलां बठूं गलील प्रेदेस में उड़ग्या। 44 यीसू आप ई केयो हो कै कोई बी परमेसर गी बात बताण आळो आपगै ई देस में कदी बी आदर कोनी पावै। 45 ईं तरियां जद बो गलील आयो तो गलीलियां बिंगो आदर मान करयो क्यूंकै बण झिको कीं यरुसलेम में त्यूंहार गै टेम करयो हो बो सारो कीं बां देख्यो हो।

राजा गो अधिकारी गै छोरै नै ठीक करणो

46 यीसू फेर गलील गै काना गाम में गेयो जठै बण पाणी नै दाख गो रस बणायो हो। जद काना गाम गै कनै कफरनहूम गाम में एक राजा गो अधिकारी हो झिकै गो बेटो बीमार हो। 47 जद राजा गै अधिकारी सुण्यो कै यहुदियां ऊं यीसू गलील आयो है। तो बो बिंगै कनै आयो अर बिनती करी कै बो कफरनहूम में आ'गे बिंगै बेटै नै ठीक करै क्यूंकै बिंगो बेटो मरण आळो हो। 48 यीसू बिनै केयो, “मोटो चमत्कार देखे बिना थे लोग मेरै उपर बिस्वास कोनी करोगा।” 49 राजा गै अधिकारी बिनै केयो, “मेरै बेटा गै मरण ऊं पेला मेरै सागै चाल।” 50 यीसू केयो, “तू जा, तेरो बेटो जींवतो रेवेगो।” झिको कीं यीसू केयो हो, बि पर बण बिस्वास करयो अर घर कानी चाल पड़यो। 51 बो घरै जावंता टेम रा में बिंगा नोकर मिल्या अर बिनै समाचार दियो कै तेरो बेटो ठीक हो'ग्यो। 52 बण नोकरां नै पूछयो, “मेरो बेटो के टेम ठीक होयो हो।” बा बिनै केयो, “काल दुपारै एक बजे बिंगो बुखार उतर ग्यो हो।

53 जद बेटै गै बाप नै ध्यान आयो कै बो ईं टेम है जद यीसू केयो, तेरो बेटो जींवतो रेवेगो।” ईं तरियां बिंगै सारै घराणै यीसू पर बिस्वास करयो।

54 ओ दूसरो मोटो चमत्कार हो झिको यीसू यहुदियां ऊं गलील आ'गे दिखायो।