यूहना 5

अडतीस साला गै रोगी नै ठीक करणो

1 इंगै बाद यीसू यहुदियां गो त्यूंहार मनाण खातर यरुसलेम गेयो। 2 यरुसलेम में भेड़ फाटक गै कनै एक बावड़ी है, इब्रानी भासा में इनै बेतसदा केयो जावै है। इंगै किनारै पांच बरामदा है। 3 बरामदा में भोत सारा आंधा, लंगड़ा अर लकवै गा मारेड़ा पड़या रेवंता हा। 4 (क्यूंकै टेम टेम पर परमेसर गो सुरगदूत बावड़ी में उतरगे पाणी नै हालावंतो हो। पाणी गै हालता ई झिको पेला पाणी में उतरतो बो ठीक हो जावंतो)। 5 बठै एक आदमी हो झिको अडतीस साला ऊं बीमारी में बठै पड़यो हो। 6 यीसू बिनै बठै पड़यो देख्यो जद बिनै ठा लागग्यो कै भोत साला ऊं ई हालत में पड़यो है। यीसू बिनै पूछयो, अरै भाई तू ठीक होणो चावै।

7 बीमार आदमी केयो, “हे गुरूजी, मेरै कनै कोई कोनी है झिको पाणी हालण पर मनै बावड़ी में उतार देवै अर मेरै जाण ऊं पेला कोई दूसरो उतर जावै है।”

8 यीसू बिनै उतर दियो, “खड़यो हो, आपगी लोई चकले अर चाल पड़।” 9 बो आदमी बि टेम ई ठीक हो'ग्यो, अर आपगी लोई चक'गे चालण फिरण लागग्यो। बो सबत गो दिन हो 10 ईंखातर ठीक होएड़ै आदमी नै यहुदियां केयो, आज सबत गो दिन है अर तेरो लोई चक'गे चालणो ठीक कोनी क्यूंकै ओ यहुदियां गै नेम गै विरुद्ध है। 11 बण बिनै उतर दियो, “झिकै मनै ठीक करयो है बण ई मनै केयो कै आपगी लोई चकले अर चाल फिर।”

12 बा लोगां बिनै पूछयो, “पण बो कुण आदमी है, झिकै तनै केयो हो, आपगी लोई चक अर चाल फिर।” 13 बो आदमी झिको ठीक होयो बो कोनी जाणै हो कै बो कुण हो। क्यूंकै बि जिग्या भोत भीड़ ही अर यीसू बठूं चुपचाप उड़ग्यो हो। 14 बाद में ठीक होएड़ै आदमी नै यीसू मिन्दर में मिल्या। यीसू बिनै केयो, “सुण, तू ठीक हो'ग्यो है, ईंखातर फेर पाप ना करी, नई तो पेला ऊं मोटो दुख तेरै पर आवैगो।” 15 अर बण आ'गे यहुदियां ऊं केयो, मनै यीसू ठीक करयो हो।

16 यीसू ऐ सगळा काम सबत गै दिन करया हा ईंखातर यहुदी लोगा बिनै तंग करणो सुरु कर दियो। 17 यीसू बानै उतर दियो, “मेरो पिता अब तांई जिंया काम करण लागरयो है ईंखातर मैं बी बिंया ई काम करण लागरयो हूं।” 18 यहुदी लोग यीसू नै मारण गी योजना बणाण लागग्या क्यूंकै बण ना केवल सबत गै नेम नै तोड़यो पण अपणै आपनै पिता परमेसर गै बराबर समझै।

बेटै गो अधिकार

19 यीसू उतर दियो, “मैं थानै साची साची केऊं कै परमेसर गो बेटो आपणै आप कीं कोनी कर सकै। बो केवल बो ई काम करै है झिको पिता परमेसर नै करतां देखे है अर पिता परमेसर जिंया करै है परमेसर गो बेटो बी बिंया ई करै है। 20 पिता परमेसर आपगै बेटै ऊं प्रेम करै है अर सारो कीं बिनै दिखावै है झिका काम आप करै है अर बा काम ऊं बी मोटा काम बिनै दिखावैगो जिऊं थे लोग अचंभो करोगा। 21 जिंया पिता परमेसर मरेड़ा नै उठावै है बिंया परमेसर गो बेटो बी झिकै नै चावै है बिनै जींमतो करै है। 22 पिता परमेसर किंगो बी न्याय कोनी करै पण न्याय करण गो अधिकार परमेसर आपगै बेटै गै हात में दे दियो, 23 कै सारा लोग जिंया पिता परमेसर नै आदर करै है बिंया ई परमेसर गै बेटै गो बी आदर करै। झिको परमेसर गै बेटै गो आदर कोनी करै, बो पिता परमेसर गो झिकै बिनै भेज्यो है बे बिंगो बी आदर कोनी करै। 24 मैं थानै साची बताऊं झिको मेरै बचन नै सुणगे मेरै भेजण आळो पर बिस्वास करै, बो अनन्त जीवन पावै है अर न्याय गै दिन सजा गी आग्या बि पर कोनी होवै पण बो मोत ऊं निकळगे जीवन में उठग्यो है। 25 मैं साची केऊं कै बो टेम आ'ग्यो है अर चालण लागरयो है जद बे झिका आत्मिक रूप ऊं मर गया है बे परमेसर गै बेटै गो बचन मानैगा अर झिका मानैगा बे जींवता हो जावेगा। 26 क्यूंकै जिंया पिता परमेसर जीवन देण आळो है बिंया ई बो आपगै बेटै नै जीवन देण गो अधिकार दियो। 27 अर झिकै बण बिनै न्याय करण गो अधिकार दियो है क्यूंकै बो मिनख गो बेटो है। 28-29 झिको मैं केऊं बि पर अचंभो ना करो क्यूंकै बो टेम आवै है जिता लोग कबर में है बे बिंगो बचन सुणगे बारै आवैगो अर झिका आच्छा काम करया है बे अनन्त जीवन खातर मरण ऊं जी उठेगा। पण झिका बुरा काम करया है बे सजा लेण खातर जी उठेगा।

यीसू गै बारे में गवाई

30 मैं आपणै आप कीं कोनी कर सकू जिंया परमेसर मनै केवै है बिंया ई मैं न्याय करूं हूं। मेरो न्याय साच्चो है मैं आपगी मरजी ऊं कीं कोनी करूं पण आपगै भेजण आळै गी इच्छा ऊं करूं हूं। 31 मैं मेरै बारै में बात करूं तो लोग कोनी मानैगा। 32 मेरै बारै में बताण आळो एक ओर हो, मेरै बारै में झिको बोलै है बो साची है। 33 थे लोगां नै यूहना कनै मेरै बारै में पूछताछ करण खातर भेज्या है बण मेरै बारै में सच्चाई बताई। 34 मैं आपगै बारै में माणस कनूं गवाई कोनी चावूं फेर बी यूहना गी गवाई गै बारै में मैं थानै ईंखातर केऊं कै थानै मुकती मिलै। 35 जिंया दीयो चानणो देवै है बिंया ई यूहना एक दीये गी तरियां परमेसर गी सच्चाई लोगा गै समझाणै में मदद करी अर थानै कीं देर तांई बी चानणै में रेणो आच्छो लागग्यो। 36 पण मैरी गवाही यूहना गी गवाही ऊं मोटी है क्यूंकै झिको कीं काम मैं करण लागरयो बे काम परमेसर पिता मनै पूरो करण खातर दिया है। ईंखातर मैं करूं हूं अर बे काम मेरी गवाई देवै है कै पिता मनै भेजयो है। 37 परमेसर पिता झिकै मनै भेज्यो है। मेरी गवाई दी है। पण थे लोग बिंगो बचन कदी कोनी सुण्यो अर ना थे बिंगो रूप देख्यो है। 38 थे बिंगो बचन आपगै मना में कोनी राख्यो क्यूंकै बिंगै भेजेड़ै पर थे बिस्वास कोनी करयो। 39 थे पवितर सासतर नै दिल ऊं डूंडो हो, क्यूंकै थारो बिचार है कै बिमें अनन्त जीवन मिलण गो ग्यान मिल जावैगो। पण ऐ सारा सासतर मेरै बारे में बतावै है। 40 फेर बी अनन्त जीवन पाण खातर मेरै लारै चालणो कोनी चावो। 41 मैं लोगां कनू आदर कोनी चावूं। 42 मनै पतो है कै थे परमेसर ऊं प्रेम कोनी करो। 43 मेरो बाप झिकै मनै अधिकार दियो बि अधिकार ऊं मैं आयो हूं फेर बी थे मनै स्वीकार कोनी करो पण जे कोई आपगै नाम ऊं आवै तो थे बिनै स्वीकार कर ल्योगा। 44 थे बिस्वास किंया कर सको हो क्यूंकै थे तो एक दूसरै नै आदर देणो चावो हो पण बो आदर कोनी चावै हो झिको केवल बिऊं मिलै बो ई परमेसर है।

45 थे इंया ना सोचो कै मैं पिता परमेसर गै सामणै थारै उपर दोस लगाऊंगा। पण थारै पर दोस सिद्ध करेगो बो तो मूसा है झिकै पर थे थारी आपगी आस लगाऐड़ी है। 46 ईंखातर जे थे मूसा पर सचमुच बिस्वास करो तो मेरै पर बी बिस्वास करो। ईंखातर कै बण मेरै बारै में लिख्यो है। 47 क्यूंकै थे मूसा गी लिखेड़ी बातां पर बिस्वास कोनी करो तो थे मेरी बातां पर बिलकुल बिस्वास कोनी करोगा।”