यूहना 1

यूहना गो लिखेड़ो सुब समाचार

यीसू गो आणो

1-2 संसार बणण ऊं पेला बचन हो। बचन परमेसर हो, अर बो बचन परमेसर गै सागै हो। 3 बि बचन गै द्वारा परमेसर संसार गो सारो कीं बणायो। संसार गी कोई बी चीज बिंगै बिना कोनी बणी। 4 बिमै सारा नै जीवन देण आळो जीवन हो झिको परमेसर गै सच्च नै एक जोती गी तरियां लोगा गै बिचाळै परगट करै है। 5 जद ईं संसार गा लोग अन्धेरै में हा तो बांगै उपर एक जोती चमकी। पण लोगा बि जोती नै आपगै उपर चमकणै कोनी दी।

6 परमेसर गो भेजेड़ो एक आदमी आयो झिकै गो नाम यूहना हो। 7 अर बो जोती गै बारै में लोगा नै बताण खातर आयो। कै बिंगी सुण गै सारा बी जोती पर बिस्वास राखै। 8 बो आप जोती कोनी हो पण बो तो लोगां नै जोती गी गवाई देण खातर आयो हो।

9 बा सच्ची जोती झिकी हर एक आदमी पर परमेसर गै सच्च नै परगट करै है बा जगत में आण आळी ही। 10 बो ई संसार में ई हो अर अण संसार बिंगै द्वारा पैदा होयो पण संसार बिनै कोनी पिछाण्यो। 11 बो आपगै लोगां में आयो। पण आपगै लोगां बिनै स्वीकार कोनी करयो। 12 पण कीं लोगा बिनै स्वीकार करयो अर बि पर बिस्वास राख्यो, ईंखातर बण बानै परमेसर गै सन्तान होण गो अधिकार दियो। 13 अर जिंया माणस गै पीढी ऊं अर माणस गी इच्छा ऊं अर आदमी लुगाई गै संबन्ध ऊं सन्तान पैदा होवै।

14 अर बो बचन माणस गो रूप लेगे पैदा होयो अर आपणै बिचाळै रेयो। बो कितो म्हान है। ओ म्हे देख्यो है। अर बो ई परमेसर गो एकलोतो बेटो है, ईंखातर परमेसर बिनै बडाई दी है। बिंगी किरपा सदा आपणै उपर रेवै अर परमेसर गो साच आपणै पर परगट होयो है।

15 यूहना बिंगी गवाई दी अर पुकार गै केयो, ओ बो ई है, झिकै गै बारे में मैं केयो हो, बो झिको मेरै बाद आण आळो है, मेरै ऊं म्हान है क्यूंकै बो मेरूं पेला आयो हो। 16 बिंगी किरपा सदा आपणै उपर भरपूर है ईंखातर आपां नै किरपा पर किरपा मिलै है 17 ओ सच्च है कै परमेसर मूसा गै द्वारा आपगो नेम दियो है, यीसू मसी गै द्वारा बण आपणै उपर किरपा करी अर आपगै बारे में सच्चाई परगट करी। 18 कणी परमेसर नै कदैई कोनी देखयो पण बांगो एकलोतो बेटो झिको पिता गै सागै गैरो संबन्ध राखै है, बिनै ई लोगा गै बिचाळै बण परगट करयो है।

यूहना बतिस्मो देण आळा गी गवाई

(मत्ती 3:1-12; मरकुस 1:1-8; लूका 3:1-18)

19 एक दिन यरुसलेम नगर गै कीं यहुदियां गा अधिकारियां यूहना बतिस्मो देण आळै गै बारे में जाणकारी लेण खातर कीं याजकां अर मिन्दर में सेवा में मदद करण आळै लेवियां नै बिंगै कनै भेज्या। बां जा'गे बिनै पूछयो, “तूं कुण है?” 20 जद यूहना बानै उतर दियो अर बानै सारी बातां सच्च ईं बता दी कै “मैं मुकतीदाता मसी कोनी हूं।”

21 जद बा बिनै पूछयो तो फेर तूं कुण है, तूं परमेसर गी बात बताण आळो एलिय्याह है के या परमेसर झिकै परमेसर गी बात बताण आळो नै घालण गो वायदो करयो हो। तूं बो है के? जद बण केयो कै मैं आ दोनां मूं कोई कोनी।

22 फेर बा बिनै पूछयो तो, तू कुण है। तू आपगै बारै में बता कै झिका म्हानै भेज्या है बानै तेरै बारै में बता सका।

23 जिंया यसयाह परमेसर गी बात बताण आळै केयो बिंया ई यूहना केयो कै मैं बन उजाड में ऊंची आवाज में हेलो मारण आळो हूं कै प्रभु गै खातर रा सीधो करो।

24 आ लोगा नै फरीसियां गी ओर ऊं भेजेड़ा है। 25 बां बिनै पूछयो जे थे ना मसी हो, ना एलिय्याह हो, ना परमेसर गी बात बताण आळो हो तो लोगां नै बतिस्मो किंया देवो हो।

26 यूहना बानै उतर दियो, मैं तो सिरफ पाणी ऊं बतिस्मो देऊं हूं पण थारै बिचाळै एक आदमी खड़यो है बो कुण है ओ थे कोनी जाणो हो। 27 ओ बो ई है झिको मेरै बाद में आण आळो है। मैं बिंगो दास बणगे बिंगै बूटां गो फितो खोलण गै लाइक कोनी हूं।

28 ऐ सारी बाता बैतनिय्याह नाम गै एक गाम में होई। ओ सहर यरदन नदी गै दिखणादे पासै हो जठै यूहना लोगां नै बतिस्मो देण लागरयो हो।

यीसू परमेसर गो मेमणियो

29 दूसरै दिन यूहना यीसू नै आपगी ओर आवंता देखगे केयो, ध्यान ऊं देखो, परमेसर बिनै एक मेमणियां गी तरियां भेज्यो है, झिको आपगा प्राण बलिदान कर'गे संसार गै सारै लोगा नै बांगै पापां ऊं मुकती दिरावैगो। 30 ओ बो ई है झिकै गै बारै में मैं बतायो हो। एक आदमी मेरै बाद में आण आळो है झिको मेरूं म्हान है अर झिको मेरूं पेला मोजूद है। 31 अर मैं कोनी जाणै हो कै बो परमेसर गो भेजेड़ो मसी है पण अब मैं बिनै पिछाण लियो अर लोगां नै पाणी ऊं बतिस्मो देण खातर आ ग्यो हूं। ईंखातर कै इसराएल गा सारा लोग बिनै पिछाण ल्ये।

32-33 अर यूहना फेर गवाई दी कै यीसू गै बारे में बतायो है कै, पेला मैं परमेसर नै भेजेड़ै मसी नै पिछाण्यो कोनी हो, जद मनै परमेसर पाणी ऊं बतिस्मो देण खातर भेज्यो, जद मनै केयो हो कै झिकै पर पवितर आत्मा उतरती अर रुकता देखेगो बो ई लोगां नै पवितर आत्मा ऊं बतिस्मो देण आळो है। अर मैं बिनै बतिस्मो दियो तो देख्यो कै आकास ऊं पवितर आत्मा कबूतर गै तरियां उतरी अर बिंगै उपर ठेर गयी। 34 अर मैं देख्यो अर गवाई देऊं हूं कै ओ ई परमेसर गो बेटो है।

यीसू गा पेला चेला

35 दूसरै दिन फेर यूहना अर बिंगा चेला माऊं दो जणा बठै खड़या हा। 36 जद बण यीसू नै आपगै कनूं जावंतां देख्यो अर बण केयो देखो परमेसर गो मेमणियो।

37 जद बा दोनां बिनै ओ केवंता सुण्यो तो बे यीसू गै लारै चाल पड़या। 38 जद यीसू मुड़गे देख्या तो बानै आपगै लारै आवंता देख्यो अर बानै पूछयो थानै के चईयै। बा बिनै केयो, “हे गुरूजी थे कठै रेवो?”

39 यीसू बानै उतर दियो, “आओ अर देखो,” जद बा जा'गे बिंगै रेण गी जिग्यां देखी अर बि दिन बिंगै सागै रेया। क्यूंकै लगभग स्याम गा चार बज गेया हां। 40 झिकै दोना यूहना गी बात सुणी ही अर यीसू गै लारै हो'ग्या हा। बामै एक समौन पतरस गो छोटो भाई अन्द्रियास हो। 41 पेला बण आपगै मोटै भाई समौन ऊं मिलगे बिनै केयो म्हानै मुकतीदाता मसी मिलग्यो। 42 अन्द्रियास पतरस नै यीसू कनै लेगे आयो। यीसू बिनै देख्यो अर केयो, “हे पतरस तूं यूहना गो बेटो समौन है। पण आज ऊं मैं तेरो नाम कैफा रख दियो है।”

फिलिप्पुस अर नतनेल नै बुलायो जाणो

43-44 दूसरै दिन यीसू गलील प्रदेस जाण गो फैसलो करयो अर फिलिप्पुस ऊं मिलगे केयो मेरै लारै होले। जद फिलिप्पुस बिंगै लारै चाल पड़यो। अन्द्रियास अर पतरस गी तरियां फिलिप्पुस बी बेतसैदा सहर गो रेण आळो हो। 45 बिंगै बाद फिलिप्पुस जा'गे नतनएल ऊं मिल्यो अर बिनै केयो झिकै गै बारै में मूसा गै नेम गी किताब में लिखेड़ो है अर परमेसर गी बात बताण आळो बी बांगी किताब में लिख्यो है बो म्हानै मिलग्यो। बो नासरत सैहर गो रेण आळो युसुफ गो बेटो यीसू है।

46 नतनएल बिनै केयो कै नासरत ऊं कोई मसी कोनी आ सकै। फिलिप्पुस बिनै केयो तूं जा'गे देख ले। 47 यीसू नतनएल नै आपगी ओर आवंता देख्यो अर बिंगै बारै में केयो ओ सच्चो इसराएली है झिकै में कोई खोट कोनी है। 48 नतनएल बिनै केयो, “तूं मनै किंया जाणै है?” यीसू बिनै केयो, “बिऊं पेला कै फिलिप्पुस तनै बुलायो हो, मैं देखयो कै तू अंजीर गै दरखत गै नीचे हो।”

49 नतनएल बिनै उतर दियो कै हे गुरूजी, तूं परमेसर गो बेटो है, तूं इसराएल गो महाराज है। 50 इंगै जबाब में यीसू केयो तूं ईंखातर बिस्वास करै है कै मैं तनै केयो कै मैं तनै अंजीर गै दरखत गै नीचे देख्यो पण तूं इंयूं ई मोटा मोटा काम होवंता देखेगो। 51 यीसू बिनै फेर केयो, “मैं तनै साची केऊं हूं कै एक दिन थे देखैगा कै सुरग खुल जावैगो अर परमेसर गा दूत मिनख गै बेटै मतलब मेरै द्वारा नीचे ऊं उपर अर उपर ऊं नीचे आवा जाई करसी।”