लूका 3

बतिस्मो देनाळै यूहना गो संदेस

(मत्ती 3:1-12; मरकुस 1:1-8; यूहना 1:19-28)

1 आ बात बां दिनां गी है जद महाराजा तिबिरियुस नै रोम साम्राज में राज करतां पन्दरा साल हो'ग्या। बि टेम पुन्तियुस पिलातुस यहुदियां राज गो राजपाल हो। हेरोदेस राजा गै राज गी च्यार पांती करी झिका में गलील परदेस में हेरोदेस, इतुरेया अर तरखोनीतिस में बिंगो भाई फिलिप्पुस अर अबिलेने राज में लिसानियास राज करतो हो। 2 अर बि टेम यरुसलेम में हना अर कैफा महा याजक हा, तो परमेसर आपगो बचन बन उजाड में रेण आळै जकरिया गै बेटै यूहना कनै पुगायो। 3 बो यरदन नदी गै आसै पासै सगळै परदेस में जा'गे लोगां नै ओ परचार करण लागग्यो कै थे लोग परमेसर ऊं आपगै पापां गी माफी लेण खातर आपगै पापां गै खातर पसतावो कर'गे पाप करणो छोड़गे बतिस्मो ल्यो। 4 जिंया यसयाह परमेसर गी बात बताण आळो गै बचनां गी किताब में यूहना गै बारै में आ परमेसर गी बात लिखेड़ी है:

“बन उजाड में एक जणो हेलो मारै कै प्रभु गो रा तैयार करो

अर बिंगी सड़कां सीदी बणाओ।

5 जिंया एक बड़ै आदमी गै आवण पर रास्तै नै तैयार कर'गे सड़कां सीदी करै

अर ऊंची जिग्यां नै निची करै अर निची जिग्यां नै भर देवै

अर टेडा मेडा रास्तै नै सीधो करै अर उबड़ खाबड़ नै एकसा करै

इंया ई प्रभु गै आवण खातर लोगां गै मना नै तैयार करो।

6 सगळा लोग परमेसर गै मुकतीदाता गा दरसण करसी।”

7 यूहना ऊं लोगां गी मोटी भीड़ बतिस्मो लेण आंती जद बण केयो, “अरै सांप गा बच्चों, थानै कण बता दियो कै आण आळै न्यायी गै दण्ड ऊं बचण खातर मेरै कनै आओ। 8 थे आपगो मन बदळगे दरखतां गी तरियां आच्छा फळ ल्याओ अर बानै झिड़क्या कै थे आपगै मन में घमण्ड ना करो, सागै थे इंया ना सोचो कै अबरहाम झिको धरमी आदमी हो बिंगै घराणै गै होण गै खातर म्हे बच जांवां, क्यूंकै मैं थानै साची केऊं कै परमेसर थानै नास कर'गे अबरहाम गै खातर तो आं पथरां ऊं बी उळाद पैदा कर सकै पण परमेसर गै न्याय ऊं कोई बच कोनी सकै। 9 अब कुहाड़ो दरखतां गी जड़ां पर रखेड़ो है। ईंखातर झिका-झिका दरखत आच्छा फळ ना ल्यासी बानै बाढगे आग में बाळ देसी।”

10 जद लोगां डरतां पूछयो, “तो म्हे के करां?” 11 बण बानै जबाब दियो, “झिकै गै कनै दो कुड़ता है, बो एक कुड़तो बिनै देवै झिकै कनै कोनी अर झिकै गै कनै रोटी है बो आपसरी में बांटल्य।”

12 जद चुंगी लेण आळा बी बतिस्मो लेण आया अर पूछयो कै, “गुरूजी, म्हे के करां?” 13 बण बानै केयो कै, “थे चुंगी हक ऊं जादा ना लेई करो,” 14 अर सिपाईयां बी पूछयो, “म्हे के करां?” बण जबाब दियो कै “धकै ऊं थे रिपिआ ना ल्यो, अर ना कीं पर झूठो दोस लगाओ, आपगी तनखां में ई संतोस करो।”

15 लोगां नै मसी गी आण गी बडी़ आस ही ईंखातर बे आपगै मन में यूहना गै बारै में सोचण लाग्या कै कठैई ओ मसी तो कोनी। 16 तो यूहना बां सगळा नै केयो, “मैं तो थानै पाणी ऊं बतिस्मो देऊं, पण झिको आण आळो है बो मेरूं सकतीसाली है मैं बिंगै इतो लाइक कोनी कै बिंगै बुंटा गो फितो खोल सकूं। बो थानै पवितर आत्मा अर आग ऊं बतिस्मो देसी। 17 बिंगो छालो बिंगै हात में है, बो आपगो खळो आच्छी तरियां साफ कर'गे अर कणक नै आपगी बखारी में भेळी करेगो पण फूसका नै बि आग में गेरै गो झिकी कदी बुझण आळी कोनी अर बाळ देसी।” 18 ईं तरियां यूहना ग्यान गी भोत बातां समझागे परमेसर गै बचन गो परचार करतो।

यीसू गो बतिस्मो

(मत्ती 3:13; मरकुस 1:9-11)

19 जद सारा लोग बतिस्मो लेण लागरया तो बि टेम यीसू बी बतिस्मो लेगे पराथना करण लागरयो हो, जद सुरग खुलग्यो। 20 अर परमेसर गी पवितर आत्मा बि पर कबूतर गी देह धार'गे उतरी अर आकासबाणी होई कै, “तूं मेरो लाडलो बेटो है, मैं तेरूं भोत ईं खुस हूं।”

21 जद यूहना चौथाई देस गै राजा हेरोदेस नै बिंगै भाई फिलिप्पुस गी घराळी हेरोदिआस ऊं ब्या करण खातर अर बिंगै माड़ा कामां गै खातर रोळो करयो। 22 जद हेरोदेस यूहना नै जेळ गै मा करवागे अर एक भोत बुरो काम करयो।

यीसू गी पीढी

(मत्ती 1:1-17)

23 यीसू जद आपगी सेवा सरू करी तो बि टेम बिंगी उंमर लगभग तीस साल गी ही। लोग एली गै बेटै युसुफ गै बेटै गै रूप में बिनै जाणता हा। 24 एली मत्तात गो बेटो हो, अर मत्तात लेवी गो बेटो हो। लेवी मलकी गो बेटो हो, अर मलकी यन्ना गो बेटो हो। अर यन्ना योसेफ गो बेटो हो। 25 योसेफ मत्तित्याह गो बेटो हो, अर मत्तित्याह आमोस गो बेटो हो। आमोस नहूम गो बेटो हो, अर नहूम असल्याह गो बेटो हो। असल्याह नोगह गो बेटो हो। 26 नोगह मात गो बेटो हो, अर मात मत्तित्याह गो बेटो हो। मत्तित्याह सिमी गो बेटो हो, अर सिमी योसेख गो बेटो हो। अर योसेख योदाह गो बेटो हो।

27 योदाह यूहना गो बेटो हो, अर यूहना रेसा गो बेटो हो। रेसा जरुबाबिल गो बेटो हो, अर जरुबाबिल सालतियेल गो बेटो हो। सालतियेल नेरी गो बेटो हो। 28 नेरी मलकी गो बेटो हो, अर मलकी अद्धी गो बेटो हो। अद्धी कोसाम गो बेटो हो, अर कोसाम इलमोदाम गो बेटो हो। अर इलमोदाम एर गो बेटो हो। 29 एर येसू गो बेटो हो, अर येसू इलाजार गो बेटो हो। इलाजार योरीम गो बेटो हो, अर योरीम मत्तात गो बेटो हो। मत्तात लेवी गो बेटो हो।

30 लेवी समौन गो बेटो हो, अर समौन यहूदा गो बेटो हो। यहूदा योसेफ गो बेटो हो, अर योसेफ योनान गो बेटो हो। योनान इलयाकीम गो बेटो हो। 31 इलयाकीम मलेआह गो बेटो हो, अर मलेआह मिन्नाह गो बेटो हो। मिन्नाह मत्तता गो बेटो हो, अर मत्तता नातान गो बेटो हो। नातान दाऊद गो बेटो हो। 32 दाऊद यिसै गो बेटो हो, अर यिसै ओबेद गो बेटो हो। ओबेद बोअज गो बेटो हो, अर बोअज सलमोन गो बेटो हो। सलमोन नहसोन गो बेटो हो। 33 नहसोन अम्मीनादाब गो बेटो हो, अर अम्मीनादाब आदमीन गो बेटो हो। आदमीन अरनी गो बेटो हो। अरनी हिस्त्रोन गो बेटो हो, अर हिस्त्रोन फिरिस गो बेटो हो। फिरिस यहूदा गो बेटो हो। 34 यहूदा याकोब बेटो हो, अर याकोब इसहाक बेटो हो। इसहाक अबरहाम गो बेटो हो, अर अबरहाम तिरह गो बेटो हो। तिरह नाहोर गो बेटो हो। 35 नाहोर सरूग गो बेटो हो, अर सरूग रऊ गो बेटो हो। रऊ फिलिग गो बेटो हो, अर फिलिग एबिर गो बेटो हो। एबिर सिलह गो बेटो हो।

36 सिलह केनान गो बेटो हो, अर केनान अर्पकद गो बेटो हो। अर्पकद सेम गो बेटो हो, अर सेम नूह गो बेटो हो। नूह लिमिक गो बेटो हो। 37 लिमिक मथूसिलह गो बेटो हो, अर मथूसिलह हनोक गो बेटो हो। हनोक यिरिद गो बेटो हो, अर यिरिद महललेल गो बेटो हो। महललेल केनान गो बेटो हो। 38 केनान इनोस गो बेटो हो, अर इनोस सेत गो बेटो हो। सेत आदम गो बेटो हो, अर आदम परमेसर गो बेटो हो।