मत्ती गो लिखेड़ो सुब समाचार
यीसू गो वंस
1
1 यीसू मसी गी पीढी इंया चाली है। अबरहाम ऊं दाऊद अर दाऊद ऊं यीसू।
2 अबरहाम गो बेटो इसहाक अर इसहाक गो बेटो याकूब पैदा होयो। फेर याकूब ऊं यहूदा अर बिंगा भाई पैदा होया।
3 यहूदा गा बेटा फिरिस अर जोरह हा, आंगी मां गो नाम तामार हो। फिरिस गो बेटो हिसरोन हो। हिसरोन ऊं एराम पैदा होयो।
4 एराम अम्मीनादाब गो पिता हो अर अम्मीनादाब ऊं नहसोन अर नहसोन ऊं सलमोन पैदा होयो।
5 सलमोन ऊं बोआज पैदा होयो, बोआज गी मा गो नाम रूत हो। बोआज अर रूत ऊं ओबेद पैदा होयो। ओबेद ऊं यिसै पैदा होयो।
6 अर यिसै ऊं राजा दाऊद पैदा होयो।
अर दाऊद ऊं सुलेमान पैदा होयो, अर झिको बि लुगाई ऊं पैदा होयो बा पेला उरियाह गी घराळी ही।
7 सुलेमान ऊं रहबाम पैदा होयो अर रहबाम ऊं अबियाह पैदा होयो अर अबियाह ऊं आसा पैदा होयो।
8 आसा ऊं यहोसाफात पैदा होयो, यहोसाफात ऊं योराम अर योराम ऊं उजियाह गो जन्म होयो।
9 उजियाह ऊं योताम पैदा होयो अर योताम ऊं आहाज अर आहाज ऊं हिजिकिय्याह पैदा होया।
10 हिजिकिय्याह ऊं मनसेह पैदा होयो अर मनसेह ऊं आमोन पैदा होयो। फेर आमोन ऊं योसे पैदा होयो।
11 फेर इसराएल गै लोगा नै बंदी बणागे बेबिलोण ले जावंता टेम, योसियाह ऊं यकुन्याह अर बिंगै भाईयां गो जन्म होयो।
12 बेबिलोण जाणै गै बाद यकुन्याह सालितेल गो पिता बण्यो अर फेर सालितेल ऊं जरुबाबिल गो जन्म होयो।
13 जरुबाबिल ऊं अबिहूद पैदा होयो। अबिहूद ऊं इल्याकिम गो अर इलयाकीम ऊं अजोर गो जन्म होयो।
14 अजोर ऊं सदोक अर सदोक ऊं आखिम अर आखिम ऊं इलिहूद गो जन्म होयो।
15 इलिहूद ऊं इलियाजर अर इलियाजर ऊं मतान अर मतान ऊं याकूब गो जन्म होयो।
16 अर याकूब ऊं युसुफ पैदा होयो झिको मरियम गो घराळो हो अर मरियम ऊं यीसू पैदा होयो झिको मसी कुवायो।
17 ईं तरियां अबरहाम ऊं लेगे दाऊद तांई चौदा पीढी होगी। अर दाऊद ऊं बेबिलोण बंदी होण तांई चोवदा पीढी अर बंदी होगे बेबिलोण जाण गै टेम ऊं लेगे यीसू मसी तांई चोवदा पीढी होगी।
यीसू गो जन्म
18 यीसू मसी गो जन्म इंया होयो कै जद मरियम गो रिस्तो यूसफ ऊं होयड़ो हो। ब्या होणूं पेला ई ठा लागग्यो कै पवितर आत्मा ऊं मरियम पेट ऊं है।
19 पण युसुफ आच्छो आदमी हो अर बो मरियम गै बारे में लोगां नै बतागे बिनै बदनाम कोनी करणो चावो। जद बण चुपके सी रिस्तो तोडण गी सोची।
20 जद बो बा बाता नै सोचण ई लागरयो तो सपने में बिनै सुरगदूत आ'गे केयो, ओ दाऊद गा बेटा युसुफ, मरियम नै बहु बणाण में ना डर। झिको छोरो बिंगै पेट में है बो पवितर आत्मा गो है।
21 जद बो पैदा होवै तो तू बिंगो नाम यीसू राखी क्यूंकै बो आपगै लोगां नै पापा ऊं मुकती दयगो।
22 ओ सारो कीं ईंखातर होयो कै प्रभु परमेसर गी बात बताण आळा नै झिको केयो बो पूरो होवै।
23 “एक कुवारी छोरी एक टाबर नै जन्म देवैगी बिंगो नाम इम्मानुएलa राखीज्येगो,” झिकै गो मतलब है “परमेसर आपणै सागै है।”