ग्यानी लोगां गो आणो
2
1 जद राजा हेरोदेस गै टेम में यहुदियां गै बेतलहम में यीसू गो जन्म हो'ग्यो तो पूरब दिसा ऊं केई ग्यानी लोग यरुसलेम में आ'गे पूछण लाग्या,
2 “यहुदियां गो राजा झिकै गो जन्म होयो है बो कठै है? म्हे बिंगै तारे गो निसान आकास में देख्यो। म्हे बिनै आराधना करण आया।”
3 जद राजा हेरोदेस ओ सुण्यो तो भोत उदास हो'ग्यो अर यरुसलेम गा सारा लोग डरग्या।
4 जद बण यहुदियां गै मुख्य याजकां अर नेम सिखाण आळै लोगां नै भेळा कर'गे पूछयो कै मसी गो जन्म कठै हो'सी?
5 बा केयो, “यहुदियां प्रांत गै बेदलेहेम गाम में है।” क्यूंकै परमेसर गी बात बताण आळो गै द्वारा इंया लिखेड़ो है,
6 “ओ यहूदा गी धरती पर बणेड़ा बेदलेहेम,
तू यहुदां गै अधिकारियां गी रीति में छोटो कोनी
क्यूंकै तेरै में एक राजा पैदा होवैगो
झिको मेरै लोगां नै इसराएल में संभाळेगो।”a
7 जद राजा हेरोदेस पूरब गै ग्यानी लोगां नै चुपके सी बुलाया अर पूछयो कै बो तारो कद उगग्यो।
8 फेर बण बानै बेदलेहेम भेज दिया अर केयो, “जा'गे टाबर गो पतो लगावो। जद थानै ठा लागज्या तो मनै बी बताईयो कै मैं बी जा'गे बिंगी आराधना करूं।”
9 फेर बे राजा गी बात सुणगे उडग्या झिको तारो बानै आकास में दिख्यो बो आ'गे चालगे बि जिग्यां रुकग्यो जठै बो टाबर हो।
10 तारे नै देखगे बे भोत राजी होया।
11 फेर बा घर गै मां जा'गे टाबर अर बिंगी मां मरियम नै एक सागै देख्या। अर बा बि टाबर आ'गे सिर झुकगे प्रणाम करयो अर बिंगी आराधना करी। बा बिंगै आ'गे सोनो, धूप अर सुरम आळी केई किमती चिजां गी भेंट चढाई।
12 पण परमेसर एक सपने में बानै बता दियो कै थे पाछा राजा हेरोदेस कनै ना जाईयो। जद बे दूसरै रा माखर आपगै देस में पाछा उड़ग्या।
यीसू नै लेगे मिस्र देस में जाणो
13 जद बे लोग उड़ग्या तो युसुफ नै प्रभु गै एक सुरगदूत सपने में आ'गे केयो, ईं टाबर अर इंगी मां नै लेगे मिस्र देस में उड़जा। जद तांई मैं ना केऊं बठै रेई क्यूंकै राजा हेरोदेस ईं टाबर नै मारण खातर डूंडण लागरयो।
14 जद युसुफ रात नै ई खड़यो होगे बानै लेगे मिस्र देस कानी चाल पड़यो।
15 फेर हेरोदेस गै मरण तांई बठै ई रेओ। ओ ईंखातर होयो कै प्रभु परमेसर गी बात बताण आळा गो द्वारा केयेड़ो बचन पूरो होवै कै, “मैं आपगै बेटै नै मिस्र ऊं बारै आण गो केयो।”b
16 हेरोदेस नै जद ठा लागग्यो कै पूरब गै ग्यानियां बिंगै सागै धोखो करयो है तो बिनै भोत तकड़ी रीस आयी। जद बण हुकम दियो कै बेतलहम अर बिंगै आसेपासे गै गामां गा दो सालां तांई गै सारै टाबरां नै मारदयो।
17 इंया यिरमयाह परमेसर गी बात बताण आळै गो केयेड़ो बचन पूरो होयो।
18 “रामाह सैहर में दुख सुण्यो,
रोणो अर जोर गो विलाप सुण्यो,
राहेल आपगै टाबरां खातर रोण लागरी है।
अर चुप कोनी होणो चावै
क्यूंकै बे अब कोनी रेया।”c
मिस्र देस ऊं पाछो आणो
19 फेर हेरोदेस गै मरण ऊं बाद युसुफ नै प्रभु गै सुरगदूत सपने में आ'गे केयो,
20 “उठ, टाबर अर इंगी मां नै लेगे इसराएल उड़जा। क्यूंकै झिका टाबर नै मारणो चावै हा बे आप सारा मर गया।”
21 जद बो बानै लेगे इसराएल आ'ग्यो।
22 पण जद युसुफ नै ठा लागो कै हेरोदेस गी जिग्यां बिंगो बेटो अरखिलास यहुदियां में राज करण लागरयो है तो बो डर ग्यो। फेर बो परमेसर ऊं सपने में हुकम लेगे गलील प्रदेस में उड़ग्यो।
23 अर बठै नासरत नाम गै गाम में रेण लागग्यो। इंया परमेसर गी बात बताण आळा गो केयेड़ो पूरो होयो कै बो नासरी कुहावैगो।