यूहना बतिस्मो देण आळै गा काम
3
1 बा दिना में यहुदियां गै बन उजाड में यूहना बतिस्मो देण आळो परचार करै हो।
2 बण केयो, “मन बदळो, सुरग गो राज आण आळो है।”
3 ओ यूहना बो ई है झिकै गै बारे में यसयाह परमेसर गी बात बताण आळो केयो:
“बन उजाड में एक जणो हेलो मारै,
प्रभु खातर रा तैयार करो
अर बिंगो रा सीधो करो।”a
4 यूहना ऊंठ गी ऊन गा बणेड़ा गाबा अर आपगी कडतू में चमडा गो साफो बांध राख्यो हो। अर बो सेत अर टीडियां नै खावंतो हो।
5 बि टेम बिंगै कनै सारा यहुदियां गा अर यरुसलेम गा अर यरदन नेर गै आसेपासे गा सारा लोग बि कनै आया।
6 अर सारा आपगै पापां नै मानगे यरदन नदी में यूहना कनूं बतिस्मो लियो।
7 जद बण देख्यो कै भोत सारा संदूकी अर फरीसी लोग बिंगै कनै बतिस्मो लेण आया। बण केयो, “हे सांप गा बच्चों, आण आळै न्यायी गै दण्ड ऊं थे कदी बी कोनी बच सको।”
8 पण थानै मन बदळगे आच्छो फल ल्याणो होवैगो।
9 अर थे इयां ना सोचो कै म्हे अबरहाम गी उळाद हा। मैं थानै केऊं कै परमेसर अबरहाम खातर पथरां ऊं उळाद पैदा कर सकै।
10 झिकै दरखत गै आच्छा फळ कोनी लागै बिनै बो बाडगे आग में बाळ देवैगो।
11 मैं तो थानै पाणी ऊं मन बदळण गो बतिस्मो देऊं झिको मेरै बाद आवैगो बो मेरूं म्हान होवैगो। मैं तो बिंगै बूटां गो फितो खोलण गो जोगो कोनी हूं। बो थानै पवितर आत्मा अर आग ऊं बतिस्मो दयगो।
12 बिंगै हात में आपगो छालो होवैगो झिका ऊं बो दाणा नै उपणगे सारै भूसका न्यारा कर देवैगो अर आपगै खेत गा सारा दाणा बखारी में भेळा करेगो अर भूसका नै आग में बाळ देवैगो।
यीसू गो बतिस्मो
13 फेर यीसू गलील ऊं आ'गे यरदन नदी पर यूहना कनूं बतिस्मो लेण आयो।
14 पण यूहना ओ केगे बिनै रोकण लागग्यो कै, मनै तो थारूं बतिस्मो लेणो चईयै, मैं थानै किंया दे सकूं।
15 पण यीसू बिनै केयो, “अब इंया ई होण दय। परमेसर किंया चावै बिनै पूरो करण खातर ओ ई ठीक है।” फेर बण बिंगी बात मान ली।
16 जद यीसू बठै बतिस्मो लियो अर जिंया ई पाणी ऊं बारै निकळ्यो तो आकास खुलग्यो। परमेसर गी आत्मा कबूतर गै रूप में यीसू पर उतरी।
17 जद आकास ऊं एक आवाज आई कै, “ओ मेरो लाडलो बेटो है। इऊं मैं भोत खुस हूं।”