मत्ती 10

यीसू गा बारा चेला

(मरकुस 3:13-19; लूका 6:12-16)

1 यीसू आपगै बारा चेलां नै बुला'गे बानै ओपरी काड़ण गो अधिकार दियो अर लोगां गा दुख दरद दूर करण गो अधिकार दियो। 2 बा बारा खास चेला गा ऐ नाम हा: सारा ऊं पेला समौन झिको पतरस कुवायो, अर बिंगो भाई अंद्रियास, जब्दी गो बेटो याकूब अर बिंगो भाई यूहना, 3 फिलिप्पुस, बरतुल्मै, थोमा, कर लेण आळो मत्ती, हलफै गो बेटो याकूब अर तदियास, 4 समौन जिलौत अर यहूदा इस्करियोति झिको यीसू नै पकडाण आळो हो। 5 आ बारा चेला नै आग्या देगे भेज्या अर केयो, “गेर यहुदियां में ना जाईयो अर सामरिया गै कोई बी नगर में ना जाईयो। 6 पण इसराएल गै परिवार गी गमेड़ी भेड़ा कनै जाईयो। 7 अर चालता चालता परचार करो कै सुरग गो राज नेडै़ आ'ग्यो। 8 मरेड़ा नै जींवता करो, कोढिया अर बीमारा नै ठीक करो अर ओपरियाळा ऊं ओपरी काड़ो। थानै मुफ्त में प्रभु गी आसिस अर सकती मिली है। ईंखातर दूसरा नै मुफ्त में बांटो। 9 थे थारा बटुवां में सोनो, चांदी अर ना तांबो राखियो। 10 सफर में सागै झोळो बी ना राखियो अर ना दो कुड़ता राखियो, चप्पल अर लाठी बी ना राखियो क्यूंकै मजदूर नै बिंगी रोटी मिलणी चईयै। 11 थे जद बी कोई गाम में जाओ तो बठै देखो बिस्वास गै लायक कुण है। अर बठै ई रुक्या रेईयो जद तांई बठूं ना जाओ। 12 थे किंगैई घरै जावै तो बानै आसिस देओ अर केओ थानै सांती मिलै। 13 जे घर गै लोगां में कोई धरमी होयो तो थारो आसिरवाद बांगै सागै रेसी ना'ई तो पाछो थारै कनै आज्येसी। 14 जे कोई थारो आदर मान अर थारी बात ना सुणै तो बि घर अर नगर नै छोड़दयो। अर थारै पगां गै लागेड़ी माटी बठै ई झाड़ देयियो। 15 मैं थानै साची केऊं, जद न्याय होवैगो बि दिन बि नगर गी दसा ऊं सदोम अर अमोरा नगर गी दसा भोत आच्छी हो'सी।

आण आळो संकट

(मरकुस 13:9-13; लूका 21:12-17)

16 सावधान रेईयो। मैं थानै भेड़ा गी तरियां भेड़ियां गै बिचाळै भेजण लागरयो हूं। सांप गी तरियां चालाक अर कबूतर गी तरियां बोळा बणगे रेईयो। 17 लोगा ऊं चोकस रेईयो क्यूंकै बे थानै पकड़गे यहुदी पंचायत में सोंप देगा अर आपगै सतसंग घरां में कोड़ा ऊं कुटवासी। 18 थानै राजा गै सामै पेस करेगा क्यूंकै थे मेरा चेला हो। पण थानै टेम मिलैगो कै थे बांगै अर गेर यहुदियां सामै मेरै बारे में गवाई देईयो। 19 जद थानै पकड़ लेवै तो घबराईओ ना क्यूंकै परमेसर थानै बता दयगो कै थानै के करणो अर के बोलणो है। 20 पण याद राखियो, बोलण आळा थे कोनी होस्यो परमेसर गी पवितर आत्मा थारै माऊं बोलेगी। 21 भाई भाई नै अर मां बाप आपगै टाबरां नै अर टाबर आपगै मां बापा नै पकडवागै मरवा देवैगा। 22 मेरै नाम ऊं लोग थारूं बैर करेगा। पण आखर तांई टिक्या रेवोगा तो जद ई थारी मुकती हो'सी। 23 जद थानै एक नगर गा लोग सतावे तो दूसरै नगर में भाज जाईओ। मैं थानै साची केऊं कै जद मिनख गो बेटो दुसर आज्येगो जद तांई थे इसराएल गै सारा नगरां में जा कोनी सकोगा। 24 चेलो आपगै गुरू ऊं मोटो कोनी हो सकै अर ना'ई दास आपगै मालिक ऊं। 25 चेले नै आपगै गुरू बराबर अर दास नै आपगै मालिक गै बराबर होण में संतोस राखणो चाइयै। जद बे घर गै मालिक नै बेलजबूल केवै तो बो घर में रेण आळै लोगां गै सागै भोत माड़ो बरताव करसी।

किऊं डरा?

(लूका 12:2-7)

26 ईंखातर लोगां ऊं ना डरियो झिको कीं लुकेड़ो है सामणै आसी। अर हर एक चीज झिकी लुकेड़ी है एक दिन प्रकट हो'सी। 27 मैं अंधेरे में थानै झिको कीं केण लागरयो हूं, मैं चाऊं कै थे बिनै चानणै में केओ। झिको कीं मैं थारै कान में केऊं मैं चाऊं कै थे बिनै कोठै पर चड़गे केओ। 28 बाऊं ना डरो झिका थारै सरीर नै खत्म करेगा। पण बे थारी आत्मा नै कोनी मार सकै। बि परमेसर ऊं डरो झिको थारै सरीर अर आत्मा दोनां नै नरक में रेड़गे खत्म कर सकै। 29 एक टकै गी दो चिड़ियां मूं एक बी बिना परमेसर गी इच्छा बगेर नीचे कोनी पड़ सकै। 30 पण थारै तो सिर गा बाळ तांई गिणेड़ा है। 31 ईंखातर डरो ना। थे बा चिड़ियां ऊं भोत जादा किमती हो।

32 झिको मनै सारां गै सामै मानैगा मैं बी बिनै सुरग में पिता परमेसर सामै आपगो मानूंगा। 33 झिको मनै सारा लोगां सामै ना मानैगा मैं बी बिनै सुरग में पिता परमेसर सागै कोनी मानूंगा।

34 ओ ना समझो कै मैं धरती पर मिलाप करण आयो हूं। पण मैं मिलाप कराण कोनी तलवार चलाण आयूं। 35 मैं ईंखातर आयो हूं कै मिनख नै बिंगै पिता ऊं अर बेटी नै बिंगी माऊं अर बहु नै बिंगी सासूं ऊं न्यारी कर देयूं।

36 आदमी गा दुसमण बिंगै घर गा ई लोग होवैगा। 37 झिको आपगै मां बाप नै अर झिको आपगै बेटा बेटी नै मेरूं जादा प्यार करै बो मेरो कोनी बण सकै। 38 मेरै खातर झिको दुख सेण नै तैयार कोनी बो मेरो चेलो कोनी बण सकै। 39 बो आदमी झिको आपगै प्राण बचाणो चावै बो बानै खो देवैगो पण झिको मेरै खातर प्राण खत्म करेगो बो जीवन पावेगो।

40 झिको थारो आदर करै बो मेरो आदर करै अर झिको मेरो आदर करै बो परमेसर गो आदर करै झिकै मनै धरती पर घाल्यो है। 41 झिको परमेसर गी बात बताण आळो नै परमेसर गी बात बताण आळो समझगे आदर करै बिनै बो ई फळ मिलैगो झिको परमेसर गी बात बताण आळै नै मिलै। थे एक भले आदमी नै आच्छो समझगे बिंगो आदर करो तो थानै बो ई फळ मिलैगो झिको बि भले आदमी नै मिलैगो। 42 जे कोई आ छोटा मूं मेरो चेलो जाण गै बिनै पाणी पियासी तो मैं थानै साची केऊं बिनै बिंगो फळ जरूर मिलसी।”