लकवै गै रोगी नै ठीक करणो
9
1 फेर यीसू किस्ती पर चड़गे आपगै गाम आ'ग्यो।
2 बठै कीं लोग एक लकवै गै रोगी नै मांची पर सुणागे बिंगै कनै ले आया। बण बांगो बिस्वास देखगे बिनै केयो, “हे बालक हिम्मत राख, तेरा पाप माफ हो'ग्या।”
3 जद केई नेम विधान सिखाण आळा आपस में केण लागग्या, “ओ आदमी परमेसर गो अपमान करै।”
4 जद यीसू जाणग्यो कै ऐ आपगै मन में के सोचै अर बानै केयो, “थे गळत क्यामी सोचो?”
5 सोरो हे के ओ केणो तेरा पाप माफ हो'ग्या अर ओ केणो कै खड़यो अर अठुं चाल।
6 पण अब थानै ठा लागज्यगो कै मिनख गै बेटै कनै धरती पर पाप माफ करण गी ताकत है।
7 जद यीसू बि रोगी नै केयो, “खडयो हो अर आपगो माचो चकले अर घरै उड़जा। अर बो रोगी खड़यो होगे घरै उडग्यो।”
8 जद लोग ओ देखगे भोत हेरान होया अर परमेसर गी बडाई करण लागग्या कै ईं मिनख नै हिस्यो हक दियो है।
मत्ती गो बुलायो जाणो
9 यीसू जद जाण लागरयो तो रा में चोकी पर बैठयो एक आदमी देख्यो झिको कर लेवै हो। बिंगो नाम मत्ती हो। यीसू बिनै केयो, “मेरै लारै आ'ज्या।” जदी बो हातो हात बिंगै लारै चाल पड्यो।
10 फेर यीसू जद मत्ती गै घरै भोत सारा कर लेण आळा अर पापी लोग अर आपगै चेला सागै रोटी जिमै हो।
11 जद फरीसियां ओ देखगे चेला नै पूछयो, “थारो गुरू कर लेण आळा अर पापी लोगां सागै क्यामी जिमै?”
12 ओ सुणगे यीसू बोल्यो, “चंगै भले आदमी नै डाक्टर गी लोड कोनी होवै। बीमार नै लोड़ पडै़।”
13 ईंखातर थे जा'गे सासतर में ईं बचन गो मतलब समझो। मैं बलिदान कोनी दया चावूं। मैं धरमी लोगां नै कोनी, पापी लोगां नै बचाण आयो।a
14 फेर बतिस्मो देण आळै यूहना गै चेला आ'गे पूछयो, “म्हे अर फरीसी लोग बरत क्यामी राखा? थारै चेला क्यूं कोनी राखै।”
15 यीसू बानै केयो, “जद तांई बीन बरातियां गै सागै है बे दुख कोनी करै। पण बो दिन आवैगो जद बीन बरातियां कनै कोनी हो'सी जद बे बरत करेगा।
16 नुए कपडै गी कारी कोई पुराणै कपडै में कोनी लगावै क्यूंकै बा कारी बि कपडै पर भेळी होगे ओर पाड़ देवै।
17 नुओ दाखरस पुराणै माटला में कोनी घले क्यूंकै बे माटला फूठज्यै अर दाखरस ढुळज्य। ईंखातर नुओ दाखरस नुए माटला में भरिजै जिऊं बे दोनूं बचया रेवै।”
मरेड़ी छोरी अर बीमार लुगाई
18 जद बो बाऊं बात करण लागरयो तो जदी एक सतसंग घर गो मुख्य बि कनै आयो अर झुकगे बिनती करण लागग्यो। मेरी बेटी मरगी। थे चालगे बिंगै सिर पर हात रख दयो तो बा जींवती होज्यी।
19 जद यीसू आपगै चेलां सागै चाल पड्यो।
20 बि भीड़ में एक लुगाई ही बिनै बारा साला ऊं लोई पड़ण गो रोग हो। बा यीसू कनै आयी अर होळे'सी बिंगै चादर गी पलै गै हात लगायो।
21 बा सोचे हे कै जे मैं इंगै पलै गै हात लगा दयूं तो ठीक हो जाऊंगी।
22 यीसू मुडगे देख्यो अर बिनै केयो, “बेटी, हिम्मत राख, तेरै बिस्वास तनै ठीक कर दी,” अर बा बि टेम ई ठीक होगी।
23 फेर बि मुख्य गै घरै पूग्यो तो बण देख्यो कै मरेड़ी छोरी खातर सारा लोग दुख करण लागरया है।
24 जद बण लोगां नै केयो, “सारा बारे जाओ, छोरी मरेड़ी कोनी सूती है।” ओ सुणगे लोग बि पर हांसण लागग्या।
25 फेर बो सारा नै बारै घालगे छोरी गै कमरे में जा'गे बिंगो हात पकड़गे बिनै खड़ी कर दी।
26 ऐ बातां बठै सारै इलाक में फेलगी।
दो आंधा नै आंख देणी
27 यीसू जद बठूं चाल पड़यो तो दो आंधा आदमी लारै जोर जोर गा हेला मारण लागग्या, “हे दाऊद गा बेटा, म्हारै पर दया कर।”
28 यीसू जद घरै आ'ग्यो तो बे दोनूं बि कनै आया। यीसू बानै केयो, “थानै मेरो पर भरोसो है कै, मैं थानै आंख दे सकूं।” बा केयो, “म्हानै भरोसो है।”
29 जद यीसू बांगी आंख्या पर हात राखगे केयो, “थारै खातर बिंया ई होवै जिंया थारो बिस्वास है।”
30 अर बे ठीक हो'ग्या। जद यीसू बानै केयो कै, “ईं बात गो किनी ठा नई लागणो चईयै।”
31 पण बा बठूं जा'गे आ बात सारा नै बता दी।
एक गूंगै नै ठीक करणो
32 जद बे दोनूं बठै जाण लागरया तो केई लोग एक गूंगै आदमी नै यीसू कनै ल्याया, बिमै ओपरी बडे़ड़ी ही।
33 जद यीसू बिमू ओपरी काड़ दी तो बो बोलण लागग्यो। जद लोग हेरान होगे केण लागग्या इसराएल में हिसी बात पेला कदी कोनी होयी।
34 पण फरीसी केण लागग्या, “ओ ओपरी सैतान गी मदद ऊं काडै़।”
35 यीसू सारा गामां अर नगरां में फिरतो रेयो अर बांगै सतसंग घरां में संदेस देवंतो रेयो। सुरग गै राज गो परचार करतो रेयो। अर लोगां गी हर एक दुख बीमारी नै दूर करतो रेयो।
36 जद बण भीड़ नै देखी तो बिनै तरस आयो क्यूंकै बे बा भेड़ां गै समान हा झिकै गो कोई रुखाळौ कोनी हो अर भटकेड़ी ही।
37 जद यीसू मसी आपगै चेला नै केयो, “खेत पकेड़ा तो भोत है। पण मजदूरिया थोड़ा है।”
38 ईंखातर खेत गै मालिक ऊं बिनती करो कै बो आपगो खेत बाड़ण खातर मजदूरिया घालै।