ओपरी भरेड़ै आदमी नै ठीक करणो
5
1 यीसू अर बिंगा चेला गलील झील नै पार कर'गे गरासेनिया नगर में पूग्या।
2 जद बे किस्ती ऊं उतरया तो बां कनै एक आदमी मूसाणा मूं निकळ आयो। बिमै ओपरी बडे़ड़ी।
3 बो मूसाणा गी कबर में ई रेंतो अर बो सांकला में ऊं बांदेड़ो बी किंगैई ताबै कोनी आंतो।
4 क्यूंकै बिनै केई बरीया सांकला ऊं बांदयो पण बो सांकला नै तोड़ गै टोटा टोटा कर देंतो। अर बो किंगैई ताबै कोनी आंतो।
5 बो रात दिन कबरा अर पहाड़ा पर कूकतो। चिलाणतो रेंतो अर अपणै आपनै दगड़ा ऊं घायल कर लेंतो।
6 बण दूर ऊं ई यीसू नै देख्यो अर देखताई भाज्यो अर आ'गे बानै निमस्कार करी।
7 अर जोर ऊं चिलागे बोल्यो, “हे यीसू परम प्रधान परमेसर गा बेटा तेरो मेरो के मेळ है? मैं तनै परमेसर गी सोगन खुआंऊ कै तूं म्हानै दुख ना दे।”
8 यीसू बिनै केयो, “ऐ बुरी आत्मा इमूं निकळज्या।”
9 यीसू बिनै पूछयो, “तेरो के नाम है?” बण आदमी बानै केयो, “मेरो नाम पलटण है क्यूंकै मैं एक कोनी म्हे भोत सारी हा।”
10 अर बो यीसू ऊं बिनती करण लागग्यो कै, “तूं म्हानै ईं देस ऊं बारै ना काड़?”
11 अर बिनती कर'गे केयो, “बठै पहाड़ पर सूरा गो एक मोटो झुण्ड चरण लागरयो, म्हानै बामै भेज दे कै म्हे बामै बड़ ज्यावां।” सूर दो हजार गै सारै सारै हा।
12-13 अर बा बांनै आग्या दी बे सारी ओपरी आत्मा काड़ गै सूरा में बड़गी अर सारा सूर एकदम ई झील में जा पड़या अर डूब गै मरग्या।
14 सूरा गा गुआळिया ओ देख गाम कानी भाज्या अर जा'गे गाम गै लोगा नै सारी होयड़ी बात बताई। जद लोग देखण आया झिको कीं बठै होयो हो।
15 जद लोग बठै आया तो बा झिकै आदमी में ओपरी ही बिनै गाबा पेरेड़ो आराम ऊं यीसू कनै बैठयो देख्यो तो बे डरग्या।
16 गुआळिया बि आदमी अर सूरा गै बारै में सारो कीं लोगा नै बतायो।
17 ओ सुण सारा लोग बांऊ बिनती करण लाग्या कै म्हारै इलाके ऊं उड़ ज्याओ।
18 जद यीसू किसती पर चढण लाग्या तो बो ओपरी बडे़ड़ो आदमी गिड़गिड़ा केण लागग्यो कै मैं थारै सागै चालूंगा।
19 पण यीसू बिनै मना कर दिओ। अर बिनै केयो, “तूं तेरै घरै जा'गे बता कै परमेसर तेरो कितो भलो करयो है।”
20 अर बो आदमी दिकापुलिस प्रांत गै देस गांवा में जा'गे बताण लागग्यो झिको कीं बिंगै सागै होयो अर सारा सुणन आळा सुणगे हेरान होया।
याईर गी मरेड़ी बेटी अर एक बीमार लुगाई
21 जद यीसू झील गै दूसरै किनारै पूग्या तो बांगै चारूंमेर लोगा गी भीड़ भेळी होगी।
22 जद बठै यहुदियां गै पराथना भवन गो सरदार आयो। बिंगो नाम याईर हो। बो यीसू नै देखताई पगा पड़ग्यो।
23 अर रो रो गै बिनती करण लागग्यो कै मेरी छोटी बेटी मरण आळी है थे थारो दया गो हात बि पर रखो जिऊं बा बच ज्य।
24 यीसू बिंगै सागै चाल पड़या। लोगा गी भीड़ बांगै उपर पड़ती जावै ही।
25 बि भीड़ में एक लुगाई झिकी गै बारा साला ऊं खून निकलण गो रोग हो।
26 बा केई डाक्टरां ऊं ईलाज करां करां गै तंग आ'गी पण ठीक कोनी होई। बण आपगो सारो धन ईलाज में लगा दिओ पण बा ठीक होण'गी बजाय ओर जादा बीमार होंती रेई।
27-28 जद बण यीसू गै बारै में सुणयो तो सोच्यो जे मैं यीसू गै पलै गै हात लगा दयूं तो ठीक हो'ज्यूंगी जद बा भीड़ माखर आ'गे यीसू गो लारू कपडै गै पलै गै हात लगायो।
29 अर हात लगाणता ई खून निकलणो ठीक हो'ग्यो। अर बण मेहसूस करयो कै मैं ठीक होगी।
30 यीसू नै जद ईं ठा लागग्यो कै मेरै सरीर मूं सामरथ निकळी है जद बा लारै मूड़ गै भीड़ ऊं पूछयो मेरै हात कण लगायो है।
31 यीसू गै चेला केयो, “थे आप ई देखल्यो भीड़ किंया उपर पड़ती अब किंगो नाम ल्या कै हात कण लगायो है।”
32 यीसू चारूंमेर देखण लागरया कै, “बांगै कण हात लगायो है।”
33 फेर बां लुगाई यीसू गै कनै आ'गे पगा पड़गै निमस्कार करी। क्यूंकै बा जाण गी कै मैं ठीक होई हूं अर डरती डरती झिको कीं बण करयो सारो बता दिओ।
34 यीसू बिनै केयो, “बेटी तेरै बिस्वास ई तनै ठीक करयो है आराम ऊं जा आ बीमारी तनै दूसरै ना होवै।”
35 जद यीसू बिऊं बात करण लागरया तो याईर प्रधान गै घर ऊं केई लोग आया अर केण लाग्या, “तेरी बेटी गुजर गी। अब गुरूजी नै ना फोड़ा घाल।”
36 यीसू बांगी बात नै अणदेखी कर दी अर याईर नै केयो, “डर ना, बिस्वास राख।”
37 अर बो आपगा चेला पतरस, याकूब अर बिंगो भाई यूहना गै सिवा ओर किनैई आपगै सागै कोनी ल्याया।
38 जद बे याईर गै घरै पूग्या तो बठै लोग रोण लागरया केई सोक करण लागरया।
39 यीसू मा जा'गे बानै केयो, “इयां रोण क्यामी लागरया हो, छोरी मरी थोडी़ है? आ तो सोण लागरी है।”
40 ओ सुणगे लोग बि पर हासण लागग्या। पण यीसू सारा नै बारै काड़ दिआ अर छोरी गै मां बाप नै अर तीन चेला नै ले'गे कमरे में गेया।
41 यीसू बिंगो हात पकड गै केयो, “बेटी मैं तनै केऊं खडी हो।”