मिन्दर में नास गी बात
13
1 जद यीसू मिन्दर मूं निकळै जद बांगै चेला मूं एक जन केयो गुरू देखो ओ मिन्दर कितो सुणो है, ईं मिन्दर गो मकान कितो सुणो है, इंगा पथर ई किता सुणा अर मोटा मोटा है।
2 यीसू केयो, “थे आ मोटै मकान नै देखो हो पण हिस्यो टेम आवैगो जद दुसमण मिन्दर नै पूरी तरियां फोड़ दयगा, अठै तांई कै एक ही पथर दूसरै पथर गै उपर कोनी रेवेगो।”
संकट अर कलेस
3 फेर जद यीसू मिन्दर गै सामै जेतुन प्हाड़ पर जा'गे बैठ गया पतरस, याकूब, यूहना ओर अन्द्रेयास अलग ऊं यीसू नै पूछयो।
4 म्हानै बताओ कै ओ कद हो'सी ओ होण ऊं पेला के हो'सी जिऊ म्हानै ठा लागै कै दुसमण मिन्दर फोड़न आळो है।
5 यीसू बानै केयो, “धयान ऊं संभळगे रेवो कोई बी थानै धोखो ना देवै।
6 क्यूंकै मेरो नाम लेगे कीं लोग आवैगा ओर केवेगा मैं हूं मसी ओ केगे केईया नै धोखो देवैगा।
7 जद लोग थानै केवै के लडाईया होवै है या केवै लडाईया होण आळी है तो डरियो ना। ऐ बाता तो जरूर होवैगी पण सारा गो अन्त इतो बेगो कोनी होवैगो।
8 इंयु पेला एक देस दूसरै पर अर एक राजा दूसरै राजा ऊं लडाई करेगा। धरती हालैगी, काळ पडेगा। जद दुख आण गी सुरूआत हो'सी।”
9 पण थे सावधान रेईयो क्यूंकै थारै मूं केई लोगा नै पंचायत में सूंप देसी अर केईया पराथना घरा में मार देसी। अर मेरै पर बिस्वास गै कारण हाकिम अर राजावा सामै खड़या करसी। जद बा लोग नै मेरै बारै में बताण गो आच्छो मोको हो'सी।
10 सारा गो अंत होण ऊं पेला सुब समाचार गो परचार सारी जातियां गै लोगा में करणो जरूरी है।
11 जद थानै पकडगे पंचायता में खड़या करै तो, चिंता ना करियो कै पंचायत में के बोलणो है, के केणो है बी टेम परमेसर थानै बोलण खातर केवै बो ई बोलणो है क्यूंकै बोलण आळा थे कोनी होस्यो पण पवितर आत्मा हो'सी।
12 अंत होण गै टेम, भाई भाई नै अर बाप बेटै नै ओर बेटा मा बाप गै खिलाफ होगे मरवा दयगा।
13 मेरै उपर थे लोग बिस्वास करो हो ईंखातर लोग थारूं नफरत करेगा थानै बिलकुल आच्छा कोनी मानसी झिको आखरी टेम तांई मेरै उपर बिस्वास करतो रेवेगो अर दुख सेवतो रेवेगो बो बच जावैगो।
महासंकट काल
14 ईंखातर यीसू गी बात नै पढण आळा ध्यान ऊं समझो। जद बे माड़ी चीजा झिकी ऊं म्हे नफरत करा, मिन्दर में खडी देखो जद झिका यहुदी गामां में है बे पहाड़ा में भाज जाईयो।
15 झिका छत पर होवै, बे कोई सामान लेण खातर नीचे ना उतरै अर ना घर गै मा जावै।
16 झिको खेत में होवै बो आपगा गाबा लेण घरै ना आवै।
17 बि टेम बा लुगाईया खातर माड़ो हो'सी झिकिया गै छोटा टाबर है अर झिकी गर्भवती हो'सी। क्यूंकै बाऊं भाजिजै गो कोनी।
18 थे लोग पराथना करो कै ऐ बाता सरदी में ना होवै।
19 क्यूंकै जद ऐ बाता घटसी आदमिया गो भोत दुखी टेम हो'सी झिका ई दुनिया गै सुरु ऊं लेगे जद परमेसर दुनिया बणाई अब तांई कदी कोनी होई अर आ'गे बी कोनी हो'सी।
20 पण दुख गै दिना नै थोड़ा कर देसी नई तो कोई कोनी बचैगो।
21 बा दिना में जे थानै कोई केवै कै मसी आ गेयो बो अठै है तो बा पर बिस्वास ना करियो।
22 क्यूंकै अपणै आपनै मसी अर परमेसर गो संदेस सुणाण आळा, केण आळा आवैगा झिका साची झूठा हो'सी परमेसर नै मानण आळै लोगा नै बी धोखो देण गी कोसिस कर'गे सबूत गै रूप में अदभुत चमत्कार गा काम करेगा।
23 ईंखातर थे सावधान रेवो क्यूंकै थानै सारो कीं पेला ही बता दियो।
मिनख गै बेटै गो दुसर आणो
24 मुसीबत कलेस दुख गै बा दिना गै बाद सूरज गी रोसनी कोनी होवैगी चांद बी रोसनी कोनी देवैगो।
25 आसमान गा तारा नीचे पड़ ज्यगा
अर झिको कीं आसमान में है हाल ज्यगो।
26 फेर सारा लोग परमेसर गी ओर ऊं मिनख गै बेटै नै बादळा ऊं मोटी ताकत गै सागै भोत आच्छै तरिकै ऊं आवंता देखैगा।
27 बि टेम बो आपगै सुरगदूता नै भेजगे, धरती ऊं लेगे आसमान गै सिरै तांई अर च्यारूं कूंटा मूं आपगै चुणैडा लोगा नै भेळा करेगो।
अंजीर गै दरखत गो मिसाल
28 अंजीर गै दरखत ऊं एक बात सिखो जिंया ई दरखत गी डालिया काची मुलायम होगे बामु पता निकळै है तो थानै ठा लागै है कै गरमी गो मोसम कनै है।
29 इंया ई थे जाण लेवो कै परमेसर गी ओर ऊं मिनख गो बेटो बेगो ही पाछो आण आळो है जद मेरी बताएड़ी सारी बाता सारी घटनावा गी बाता हो'सी
30 मैं थानै बताऊं हूं आ बाता गै हो जाण ऊं पेला ई पीढी गा आदमी कोनी मरसी
31 आसमान अर धरती नास हो सकै पर मेरी बाता झूठी कोनी हो सकै परमेसर गै बिना कोई कोनी जाणै कै बो अंत गो टेम कद हो'सी।
जागता रेवो
32 परमेसर गी ओर ऊं मिनख गै बेटै गै पाछो आण गै दिन या घडी गो किनही ठा कोनी ना तो बो खुद जाणै है ओर ना ही सुरगदूत जाणै बिंगै बारै में सिरफ पिता परमेसर जाणै है कै बो टेम कद आवैगो।
33-34 इनै एक कहाणी, ऊं समझाउं, बोळै दूर गै गाम में जाण आळो एक आदमी आपगै घर गै नोकरां नै सारी जिमेदारी देगे उड़ जावै है हर एक नोकर नै के काम करणो है ओ बी बता देवै है गेट पर पेरो देण आळै नै सावधान रेण खातर केगे जावै है।
35 इयां थे बी सावधान रेवो क्यूंकै थानै ठा कोनी थारो मालिक कद वापस आ जावैगो जा आदी रात नै सूरज उगण ऊं पेला या झाझरकै गै टेम में,
36 जे बो चाणचकै आ जावै तो थे सुतया होया ना दिखियो।
37 बांगै उडीक में चोकस रेवो ऐ बाता झिकी मैं थानै केऊं हूं सारा नै बताओ।