यीसू नै फसाण गी चाल
14
1 फसह गै त्यूंहार अर बिना खमीर गी रोटी गो त्यूंहार आण गै दो दिन पेला गी बात है कै प्रमुख याजक ओर यहुदी धर्म सासतरी कोई हिस्यो रा ढूंढण लागरया हा जिऊं चालाकी गै सागै बिनै बन्दी बणायो जावै ओर मार दियो जावै।
2 बे केवा हां कै पण ओ काम आपां नै त्यूंहार गै दिना में कोनी करणो चईयै इऊं तो हो सकै है, लोग कोई ओर फसाद खडयो कर सकै।
3 जद बो बेतनियाह गाम में समौन कोढी गै घरै रोटी जिमै हो तो जद एक लुगाई संगमरमर गै भांडै में बाळा में लगाण आळो तेल लेगे आई अर ल्यागे यीसू गै सिर पर मूंदो मार दियो।
4 इऊ बठै कीं आदमी रीस में आपस में केण लाग्या कै क्यामी मेंगो तेल बरबाद करयो है।
5 ओ तीन सौ दीनारी ऊं बी जादा में बेचो जा सकै। ओर फेर बो धन ऊं कंगाला में बांटयो जा सकै हो, बा बिंगी भोत आलोचना करी।
6 जद यीसू केयो, “बिनै क्यू तंग करो हो, छोड़ो बिनै, बण तो मेरै खातर एक बढिया काम करयो है।
7 क्यूंकै कंगाल तो सदा थारै कनै रेवैगा थे जद चावो बांगी मदद कर सको हो, पण मैं थारै सागै सदा कोनी रेऊंगा
8 अण लुगाई बो करयो है झिको बां कर सकै ही बण टेम ऊं पेला ही गाडै जाणै गै खातर मेरै सरीर पर सुगन्ध छिड़क गै बिनै तैयार करयो है।
9 मैं थानै साची केऊं हूं सारै संसार में जद कठी सुब समाचार गो परचार प्रसार करयो जावैगो, बठी बिंगी याद में झिको कीं बण करयो है, इंगी बात होवैगी।”
यहूदा गो बिस्वास तोड़णो
10 जद यहूदा इस्करियोति झिको बिंगै बारा चेला मूं एक हो। प्रधान याजक गै कनै यीसू नै धोखै ऊं पकडवाण खातर गेयो।
11 बे बिंगी बात सुणगे भोत राजी होया ओर बां बिनै धन देण गो बचन दियो। ईंखातर फेर यहूदा यीसू नै धोखो देगे पकडवाण गी ताक में रेण लागग्यो।
चेला सागै आखरी खाणो
12 बिना खमीर गी रोटी गै त्यूंहार ऊं एक दिन पेला, जद फसह गी बली दी जावती ही बिंगा चेला बिनै पूछयो, “तू के चावै है कै म्हे कठै जा'गे तेरै भोजण गी तैयारी करां।”
13 जद बण आपगै दो चेला नै ओ केगे भेज्यो, “गाम में जाओ, जठै थानै एक आदमी पाणी गो घडो लिये मिलै, बिंगै लारै हो जावो।
14 फेर जठै कठी बी बो मां जावै बी घर गै सवामी ऊं केईयो गुरूजी पूछै है भोजन गो मेरो कमरो किस्यो जठै मैं आपगै चेला गै सागै फसह गो भोजन खा सकू।
15 फेर बो थानै उपर एक मोटो सजयो सजायो कमरो दिखावैगा, बठै मेरै खातर भोज तैयार करियो।”
16 जद बिंगा चेला नगर ऊं जाण लागरया जद बा हर बात बिंया ई पाई, जिंया यीसू केई ही। जद बा फसह भोज तैयार करयो।
17 दिन ढले आपगै बारा चेला गै सागै यीसू बठै पोंच गेया।
18 जद बे बैठगै खाणो खावा हा, जद यीसू केयो, “मैं साची केऊं हूं, थारै मूं एक झिको मेरै सागै भोज करण लागरयो है बो ही मनै धोखो देगे पकडवावगो।”
19 इऊं बे दुखी होगे एक दूसरै नै केण लागग्या साची बो मैं कोनी हूं।
20 जद यीसू बानै केयो, “बो बारा मू एक है झिको मेरै सागै एक थाळी में खावै है।
21 आदमी गै बेटै गै बारे में जाणै ई है, जिंया कै बिंगै बारै में लिखेड़ो है। पर बि आदमी नै धिकार है झिकै द्वारा मिनख गो बेटो पकडाईजगो। बि आदमी गै खातर कितो आच्छो होवै कै बो पैदा ई ना होवंतो।”
प्रभु भोज
22 जद बे खाण पीण लागरया हां यीसू रोटी ली अर धन्यावाद दियो, रोटी तोडी अर चेला नै देवता केयो, ल्यो आ मेरी देह है।
23 फेर बण कटोरो लियो धन्यावाद दियो अर सारा बिमुं पीयो।
24 जद यीसू बोल्यो, “ओ मेरो खून है झिको एक नुए वादै गी सुरूआत है ओ भोता गै खातर बहायो जावैगो।”
25 मैं थानै साची केऊं हूं कै, “अब मैं बि दिन तांई दाखमधु नै कोनी चाखूगा जद तांई परमेसर गै राज में नूंओ दाखमधु ना पीऊं।”
26 जद बे एक गीत गा'गे जेतुन गै पहाड़ पर उड़ग्या।
पतरस गै इनकार गी बात
27 यीसू बानै केयो, “थारो सारा गो बिस्वास गिर जावैगो क्यूंकै लिखयो है कै, मैं गुआळियो नै मारूंगा ओर भेड़ा तितर बितर हो जावैगी।”
28 पण फेर जी उठण गै बाद मैं थारूं पेला ई गलील उड़ जाऊंगा।
29 जद पतरस बोल्यो, “चायै सारा आपगो बिस्वास खो'दय पण मैं कोनी खोऊंगा।”
30 ईं पर यीसू बिऊं केयो, “मैं तनै साची केऊं हूं आज'ई रात नै कुकड़ गै दो बारी बांग देण ऊं पेला तू तीन बारी मेरो इनकार करेगो।”
31 ईं पर पतरस ओर बी जोर देगे केयो, जे मनै तेरै सागै मरणो बी पडै़ तो बी मैं तनै कोनी छोडूंगा जद बाकी सारा चेला बी इयां केयो।
गतसमनै में पराथना
32 फेर बे एक इसी जिगया पर आया जिनै गतसमनै केयो जावै है। बठै यीसू आपगै चेला ऊं केयो जद तांई मैं पराथना करूं हूं थे अठै बैठो।
33 ओर पतरस, याकूब ओर यूहना नै बो आपगै सागै ले गेयो। बो भोत दुखी ओर परेसान रेयो हो।
34 बण बिनै केयो, “मेरो मन दुखी है जिंया मेरा प्राण निकलण लागरया है। थे अठी रूको ओर सावधान रेवो।”
35 फेर थोडो ओर आ'गे जाण गै बाद बो धरती पर झुकगे पराथना करण लागग्यो कै जे हो सकै तो आ घडी मेरै पर ऊं टळ जावै।
36 फेर बण केयो है, “हे पिता,” तेरै खातर सारा कीं सोरो है। ईं कटोरै नै मेरै कनूं दूर करै फेर झिको कीं मैं चाऊं हूं बो कोनी पण झिको कीं थे चावो हो बो पूरो होवै।
37 फेर बो आयो तो बण आपगै चेला नै सोऐड़ा देखगे पतरस ऊं केयो समौन कै तू सोण लागरयो है? कै तू एक घडी बी जाग कोनी सकयो?
38 जागता रेवो ओर पराथना करो ताकि थे कीं प्रकार गी बिपता में ना पडो। आत्मा तो चावै है पण सरीर निरबल है।
39 अर बो फेर उड़ग्यो अर बिंया ई बचन बोलते होया बण पराथना करी।
40 जद बो दुसर आयो तो बण बानै फेर सूत्या देखया, बांगी आखया में नींद भरेड़ी ही बानै समझ कोनी आई कै बिनै के उतर देवा।
41 बो तीसरी बारी फेर आयो अर बण बोल्यो के थे अब बी आराम ऊं सूत्या रेवो? बा घडी आ'गी जद मिनख गो बेटो धोखै ऊं पकडवायो जा'गे पापियां गै हात सोंपयो जावैगो।
42 खड़या होज्यो। मनै पकडाण आळो कनै आ'ग्यो है।
यीसू गो धोखै ऊं पकड़ायो जाणो
43 यीसू बोलै ई हो कै बिंगा बारा चेला मूं एक यहूदा बठै दिखयो बिंगै सागै लाठियां ओर तलवारा लेगे एक भीड़ ही बिनै याजका धर्म सासतरियां अर बुढा यहुदी नेता भेज्यो हो।
44 धोखै ऊं पकडाण आळै आदमी बानै आ निसानी बता राखी ही झिकै गो मैं लाड़ करूं बो ई हो'सी। बिनै थे पकडलेईयो ओर ध्यान ऊं ले जाईयो।
45 अर जिंया ई यहूदा बठै आयो बण यीसू गै कनै जा'गे केयो, “रब्बी” अर बिनै चूमंयो।
46 फेर बिनै बा पकड़ गै हिरासत में ले लियो।
47 बांगै एक चेले झिको बिंगै कनै खड़यो हो आपगी तलवार काड़ ली अर महा याजक गै एक दास पर चला दी जिऊं बिंगो कान बड़ग्यो।
48 फेर यीसू बिनै केयो, “मैं कोई अपराधी हूं झिकै नै थे पकड़ण खातर लाठी तलवार लेगे आया हो।
49 रोज मिन्दर में परबचन देवता होया मैं थारै सागै ही हो पण थे मनै कोनी पकडयो। अब ओ होयो कै सासतर गो बचन पूरो होवै।”
50 ओ देखगे सारा चेला बिनै एकलो छोड़ भाज खड़या होया।
51 आपगै एक नागै सरीर पर चादर लपटेडी एक नोजवान बिंगै लारै चाल पड़यो अर लोगा बिनै पकडणो चायो।
52 पण बो आपगी चादर छोड़गे नागो भाजगयो।
महा पंचायत गै सामणै यीसू
53 बे यीसू नै प्रधान याजक गै कनै ले गया। फेर सगळा प्रमुख याजक बुढा यहुदी नेता ओर धर्म सासतरी कठ्ठा होया।
54 पतरस बिंयू दूर दूर रेवता होया बिंगै लारै लारै महा याजक गै आंगणे तांई उड़ग्यो। ओर बठै पेरेदारा गै सागै बेठगे आग तपण लागग्यो।
55 सारा यहुदी महासभा ओर प्रमुख याजक यीसू नै म्रत्यु दण्ड देण खातर बिंगै बिरोध में कोई प्रमाण ढूंढण गो यत्न करण लागरया हां पर ढुंढ कोनी पाया।
56 भोत सारा लोग बिंगै बिरोध में झूठी गवाइयां दी, पण बे गवाइयां आपस में बिरोधी ही।
57 फेर कीं लोग खडया होया अर बिंगै बिरोध में झूठी गवाई देवता होया केण लागग्या।
58 म्हे इनै ओ केवंता सुणयो है आदमिया गै हात ऊं बणयो मिन्दर नै मैं तोड देऊंगा ओर फेर तीन दिना में दुसर बणा देऊंगा झिको हात ऊं बणेडो कोनी होवैगो।
59 पण इमै बी बांगी गवाइया एकसी कोनी ही।
60 जद बिंगै सामणै महा याजक नै खडयो होगे यीसू कनूं पूछयो, “ऐ लोग तेरै बिरोध में ऐ के गवाइया देण लागरया है तूं कीं उतर कोनी देण लागरयो।”
61 ईं पर यीसू चुप रेयो बण कोई उतर कोनी दियो। महा याजक बिऊं फेर पूछयो, “के तू पवितर परमेसर गो बेटो मसी है?”
62 यीसू बोल्यो, “मैं हूं।” ओर थे मिनख गै बेटै नै बिंगै परम सकतीसाली गी दाई ओर बैठयो ओर सुरग गै बादळा में आवंतो देखोगा।
63 महा याजक आपगा गाबा फाडगे केयो, “म्हानै ओर गवाई गी के जरूरत है?”
64 थे ऐ झूठी बाता अब सुण ई ली। अब थारो के बिचार है? बा बिनै अपराधी मानगे केयो, “इनै दण्ड दयो।”
65 जद केई आदमिया बि पर थूकयो, कणी बिंगो मूं ढकयो अर कणी बिंगै थपड मारया ओर कणी बिंगी मजाक उडाई कै, परमेसर गी बात बोल अर फेर पहरेदारा बिनै पकडगे कुटयो।
पतरस गो ना करणो
66 पतरस अजे तांई नीचे आंगण मैं बैठयो हो कै महा याजक गी एक दासी बोली।
67 जद पतरस नै बठै आग तापता देखयो तो बडे ध्यान ऊं बिनै पिछाणगै बोली तू बी तो यीसू नासरी गै सागै हो।
68 पण पतरस मुकर गेयो ओर केण लागग्यो मैं कोनी जाणूं मेरी समझ में कोनी आयो, कै तू के केवै है ओ केवंता होया बो ढेवडी तांई उड़ग्यो अर कुकड बांग दी।
69 बण दासी जद बिनै दुसर देखयो तो बठै खडयै लोगा नै फेर केण लागी, ओ आदमी बी बामूं एक है।
70 पतरस फेर मुकर गेयो, फेर थोड़ी देर बाद बठै खडयै लोगा पतरस नै केयो साची ही तू बामू एक है क्यूंकै तू बी गलील गो है।
71 जद पतरस अपणै आपनै धिककारण ओर सोगन खाण लागग्यो झिकै गै बारै में थे बात के रेया हो बि आदमी नै मैं कोनी जाणूं।
72 जद, कुकड़ दूसरी बांग दी तो पतरस नै बि टेम बे बात गी याद आई झिकी यीसू बिनै केई ही इंयु पेला कै कुकड़ दो बारी बांग देवै तू मनै तीन बारी इनकार करेगो। जद पतरस ईं बात नै सोचगे जोर जोर गो रोण लागग्यो।