पिलातुस गै सामणै यीसू
15
1 जिंया ई दिन उग्यो महायाजका धर्म सासतरियां बुढा यहुदी नेतावा ओर सारी यहुदी महासभा एक योजना बणाई। बे यीसू नै बांदगे लेग्या अर बिनै राज्यपाल पिलातुस नै सूंप दियो।
2 पिलातुस बिनै पूछयो कै, “तू यहुदियां गो राजा है।” यीसू उतर दियो, “इंया ही है। तू खुद केण लागरयो है।”
3 फेर प्रमुख याजका बि पर भोत सारा दोस लगाया।
4 पिलातुस बिनै फेर पूछयो कै, “तूं उतर कोनी देवै है, देख बे किती बाता गो दोस तेरै उपर लागरया है।”
5 पण यीसू अब बी कोई उतर कोनी दियो। ईं पर पिलातुस नै भोत अचंभो होयो।
मोत गी आग्या
6 फसह पर्व गै अवसर पर पिलातुस कोई एक केदी नै, झिकै नै लोग चावै है बांगै खातर छोड़ देवंतो हो।
7 बर अब्बा नाम गो एक केदी लडाई करण आळा गै सागै जेळ में हो झिकै लडाईया में आदमिया नै मारया हा।
8 अर भीड़ उपर जा'गे बिनै केण लागी कै, “जिंया तू म्हारै सागै पेला करतो आयो है बिंया ई कर।”
9 पिलातुस बानै पूछयो, “के थे चावो हो कै मैं थारै खातर यहुदियां गै राजा नै छोड़ दयूं।”
10 पिलातुस ओ इंगै वास्ते केयो क्यूंकै बो जाणै हो कै प्रमुख याजका बिना दोस गै कारण पकडवायो है।
11 पण प्रमुख याजका भीड़ नै उकसाई कै बे बिंगी जिगया बरअबा नै छुड़ा लेवै।
12 पण पिलातुस बाऊं बात चीत कर'गे फेर पूछयो, “झिकै नै थे यहुदियां गो राजा केवो हो बिंगो मैं के करूं, बताओ थे के चावो हो?”
13 उतर में बे चिलाया, “बिनै करूस पर चढा दयो।”
14 जद पिलातुस बानै पूछयो, “क्यूं अण इसो के अपराध करयो है जद ओर जादा रोळो मचायो ओर केयो बिनै करूस पर चढा दयो।”
15 पिलातुस भीड़ नै राजी करणी चावै हो ईंखातर बरअबा नै छोड़ दियो अर यीसू नै कोड़ा लगवा गै करूस पर चढाण खातर दे दियो।
सैनिकां द्वारा यीसू गी बेजती
16 फेर सिपाई बिनै रोम गै राज्यपाल निवास में लेग्या अर बा सिपाईया गी पूरी फोज नै बुला ली।
17 फेर बा यीसू नै बेजणी रंग गा गाबा पिराया ओर कांटा गो एक ताज बणा गै बिंगै सिर पर रख दियो।
18 फेर बिनै सलाम देण लाग्या कै यहुदियां गै राजा गो स्वागत है।
19 बे बिंगै सिर पर सरकणै गी मारता जाण लागरया हां। बे यीसू पर थूकै हा अर गोडा गै बल झुक गै बे बिंगै आ'गे नमन करै हा।
20 ईं तरियां जद बे बिंगी खिल्ली उडावा हां तो बा बिंगा बेजणी गाबा उतारया ओर बिनै बिंगा आपगा गाबा पिरा दिया। ओर फेर बिनै करूस पर चढाण खातर बारै ले गया।
यीसू गो सूली पर चढाणो
21 बिनै कुरैन गो रेण आळो सीमोन नाम गो एक आदमी रा में मिल्यो। बो गाम कानूं आवै हो बो सिकन्दर ओर रुफस गो बाप हो सिपाईया बि पर दबाब बणा गै यीसू गो करूस चका दियो।
22 फेर बे यीसू नै गुलगुता नाम गी जिगया पर ले गया।
23 जद बा बिनै लोहबान रळेड़ो होयो दाखरस पीण नै दियो। पण बण बिनै कोनी पीयो।
24 फेर बिनै करूस पर चढा दियो। जद बा बिंगै गाबा नै परची ऊं लाटरी काड़गे आपस में बांट लिया।
25 दिन गा नौ बजया जद बा बिनै करूस पर चढायो।
26 अर बिंगो दोस पत्र बणागे बिंगै उपर लगा दियो झिकै पर लिखेड़ो हो “यहुदियां गो राजा।”
27-28 बिंगै सागै दो डाकू बी हा एक बिंगै दाहिणै पासै ओर एक बाई पासै।
29 बिंगै कनै ऊं निकलण आळा लोग बिंगो अपमान करै हा आपगो सिर झुकगे बे केवा हा अरै वा, तू बो ई है झिको मिन्दर नै दोड़गे तीन दिन में फेर बणावै हो।
30 अब करूस ऊं नीचे उतर ओर अपणै आपनै बचा ले।
31 ईं तरियां प्रमुख याजक ओर धर्म सासतरियां बी यीसू गी खिल्ली उडाई। बे आपसरी में केण लागग्या ओ ओरा गो उद्धार करै हो, पर अपणै आपनै कोनी बचा सकै।
32 अब ई मसी ओर इसराएल गै राजा नै करूस पर ऊं नीचे तो उतरण दे जिऊं म्हे ओ देख गै बि पर बिस्वास कर सका अर बा दोना ई झिका बिंगै सागै करूस पर चढाया हा बिंगो अपमान करा।
यीसू गो प्राण त्याग
33 फेर सारी धरती पर दोफारे में अन्धेरो हो गयो।
34 दिन गै तीन बजे ऊंची आवाज में यीसू केयो, “एली एली लमा सबकतानी।” हे मेरा परमेसर थे मनै क्यूं भूला दियो।a
35 झिका कनै खडया हा, बामूं बी लोगा ओ सुणयो तो बे बोलया सुनो ओ एलिल्याह नै बुलावै है।
36 जद एक जणो भाजगे आयो अर स्पंज में सिरके डबोगे अर सरकणै पर बांदगे बिनै चुसायो अर केयो, “ठेरो, देख इनै एलियाह नीचे उतारण खातर आवै या कोनी।”
37 फेर यीसू ऊंची आवाज में बोल्यो ओर प्राण छोड़ दिया।
38 जद मिन्दर गो पड़दा उपर ऊं नीचे तांई पाट गै दो टुकडा हो'ग्या।
39 फोज गै एक अधिकारी झिको यीसू गै सामणै खड़यो हो बण इंया सुणयो ओर देखयो कै बण प्राण किंया त्याग्या। बण केयो ओ आदमी वास्तव में परमेसर गो बेटो है।
40 कीं लुगाईया बठूं दूर खडी देखे ही। बामै मरियम मगदलीनी, छोटे याकूब ओर योसेस गी मां मरियम ओर सलोमी ही।
41 जद यीसू गलील में हो तो ऐ लुगाईया बिंगी अनूयायी ही अर बिंगी सेवा करती हो। बठै ओर बी भोत सारी लुगाईया ही झिकी बिंगै सागै यरुसलेम तांई आयी ही।
यीसू नै माटी लागणी
42-43 जद आथण होगी ओर क्यूंकै सब्त गो दिन हो। ईंखातर अरिमतिया गो युसुफ आयो। बो यहुदी महासभा गो मानेड़ो आदमी हो ओर परमेसर गै राज गै आण गी अडीक करतो हो। हिम्मत गै सागै बो पिलातुस गै कनै आयो ओर बण यीसू गी लास मांगी।
44 पिलातुस नै भोत अचरज होयो कै बो इती जल्दी किंया मर ग्यो। बण सेना गै अधिकारी नै बुलायो ओर बिऊं पूछयो कै बिनै मरै काफी देर होगी के?
45 फेर जद बण सेनानायक ऊं हाल सुण लियो तो युसुफ नै लास दे दी।
46 जद बण एक मलमल गी चादर खरीदी। अर ल्हास नै उतारगे बिमै पळेट दी अर जा'गे बि कबर में रख दी। अर कबर नै एक मोटै पथर ऊं बंद कर दी।
47 मरियम मगदलीनी ओर योसेस गी मां मरियम देखण लागरी कै यीसू गी लास कठै रखी है।