यीसू गो दूसरै जीणो
16
1 सबत गै दिन बीत जाणै पर मरियम मगदलीनी सलोमी अर याकूब गी मां मरियम नै यीसू गी ल्हास पर लगाण खातर सुगन्ध सामग्री मोल ली।
2 हफ्ते गै पेलै दिन जद सूरज निकळ्यो बे कबर पर गेई।
3 बे आपस में केवै ही, म्हारै खातर कबर गै दीवार पर ऊं पथर नै कुण सरकावै।
4 फेर जद बां आंख उठाई तो देखयो कै भोत मोटो पथर बठूं हटेड़ो हो।
5 फेर जद बे कबर गै मां गेई तो बां देखयो कै सफेद गाबा पेरेड़ो एक जवान बैठयो है। बे डर गी।
6 फेर युवक बानै केयो, “डरो ना, थे झिकै यीसू नासरी नै डूंडो हो, जिनै करूस पर चढ़यो गेयो हो बो जी उठयो है। बो अठै कोनी है, ईं जिगया नै देखो जठै बा बिनै रख्यो हो।
7 अब थे जाओ अर बिंगै चेला अर पतरस नै केवो कै बो थारूं पेलां ई गलील जाण लागरया है जिंया कै बण थानै केयो हो, बो थानै कोनी मिलैगो।”
8 जद भय अर अचरज में डुबेड़ी बे कबर ऊं निकळगे भाज गी। बां किनैई कोनी बतायो क्यूंकै बे भोत घबरायैड़ी ही।
मरियम मगदलीनी नै यीसू गो दिखणो
9 हफ्ते गै पेलो दिन दिनगे जी उठणै गै बाद बो सारा ऊं पेलां मरियम मगनलिनी गै सामणै परकट होयो झिकी मूं बण सात ओपरी ऊं छुटवायो हो।
10 बण यीसू गै साथिया नै झिका दुख में हा अर विलाप करां हा जा'गे बतायो।
11 जद बा सुणयो कै यीसू जींवतो है अर बा देखयो है तो बा बिस्वास कोनी करयो।
दो चेला नै यीसू दिखणो
12 इंगै बाद बो दो जणा नै दूसरै रूप में मिल्यो झिका आपगै गाम जाण लागरया।
13 बा पाछा आ'गे ओरा नै बी ईं बात गी जाणकारी दी पण बा बांगो बिस्वास कोनी करयो।
ग्यारा चेला नै यीसू दिखणो
14 बाद में जद बिंगा ग्यारा चेला भोजन कर रेया हा, बो बांगै सामणै प्रकट होयो अर बां बिंगै अबिस्वास अर मन गी कठोरता गै खातर बानै झिड़क्या क्यूंकै बां बिंगो बिस्वास कोनी करयो हो झिको जींवतो होण गै बाद बिनै दिखयो हो।
15 फेर बण बानै केयो, “जाओ अर सारी दुनिया गै लोगा नै सुब समाचार गो उपदेस देवो।
16 झिको कोई बिस्वास करै है अर बतिस्मो लेवै है बिंगो उद्धार होवैगो अर झिको बिस्वास ना करै है, बो दोसी मानयो जावैगो।
17 झिको मेरो बिस्वास करेगो, बामे ऐ निसानी हो'सी बे मेरै नाम ऊं ओपरियां नै काड़ सकैगा बे नूंई नूंई बोली बोलैगा।
18 बे अपणै हातां ऊं सांप पकड़ लेवेगा अर बे जे जैर बी पी लेवै तो बांगो कीं कोनी होवैगो, बे रोगियां पर आपगो हात रखेगा अर बे ठीक हो जावेगा।”
यीसू गो सुरग में जाणो