यीसू गो दुसर जी उठणो
28
1 सब्त गै बाद जद दीतवार गै दिन दिनगे दिनगे मरियम मगदलीनी अर दूसरी लुगाई मरियम कबर संभालण आई।
2 जद सुरग ऊं प्रभु गो एक सुरगदूत बठै आयो हो। जद बि टेम एक मोटो बुचाळ आयो। सुरगदूत आ'गे बो पथर हटागै बि पर बैठग्यो।
3 बिंगो रूप आकास गी बिजली तरियां चमकै हो। अर बिंगा कपड़ा दूध गी तरियां धोळा हा।
4 ओ देखगे कबर पर पेरो देण आळा सिपाई डरगे कांपण लागग्या। अर इंया हो'ग्या जिंया बे मरेड़ा होवै।
5 जद सुरगदूत बा लुगाईयां नै केयो, “डरो ना। मनै ठा है थे यीसू नै डूंडण लागरी हो। झिकै नै करूस पर चढायो।
6 बो अठै कोनी। जिंया बण केयो, बिनै मरण गै बाद पाछो जी जींवतो हो'ग्यो। आज्यो, बि जिग्या नै देखो, जठै बिनै सुणायेड़ो हो।
7 अर जाओ। बिंगै चेला नै बताओ, बिनै मरेड़ा मूं जीमतो कर दियो। अर अब बो थारूं पेली गलील नै जाण लागरयो है। थे बिनै बठै ई देखोगी। झिको मैं थानै केयो है, बिनै याद राखियो।”
8 बे लुगाईयां जद ई कबर नै छोड़गे खुसी ऊं भरगी। अर आ बात यीसू गै चेला नै सुणाण भाज पड़ी।
9 एकदम यीसू बानै मिल्यो अर बोल्यो, “थानै सांती मिलती रेवै,” अर बां बिंगै पगा पडगे बिंगी आराधना करी।
10 जद यीसू बानै केयो, “डरो ना, मेरै संगीया कनै जाओ अर बानै गलील कानी चालण गो कै दयो। बठै ई मनै बे देखैगा।”
11 अजे बे लुगाईया रा में ही कै, पेरेदारा भाज गै सारी घटना मुखिया याजकां नै जा'गे बताई।
12 जद बुढा यहुदी नेतावां सागै रळगे एक योजना बणाई। बां सिपाईयां नै भोत सारो धन देगे केयो,
13 “कै थे लोगा नै केईयो जद म्हे सूत्या हा तो यीसू गा चेला कबर पर आया अर बिंगी ल्हास नै चोर गै लेग्या।
14 जे थारी ऐ बातां राजा तांई पूगेगी तो म्हे आपी संभाळ लेस्या। थारै पर आंच कोनी आवैगी।
15 जद बा पीसा लेगे बिंया ई करयो, जिंया बा केयो।” अर आ बात अजे तांई यहुदियां में इंया ई फेलैड़ी ही।
यीसू गी आखरी आग्या
16 फेर बे ग्यारा चेला गलील गै बि पहाड़ पर गेया जठै यीसू बानै बुलाया हा।
17 बा यीसू नै देखगे बिंगी आराधना करी। पण केईयां गै मन में अजे तांई बेम हो।
18 फेर यीसू बांगै कनै जा'गे केयो, “धरती अर सुरग गो सारो अधिकार मनै सूंपेड़ो है।
19 ईंखातर जाओ। अर सारै देस गै लोगा नै मेरा चेला बणाओ। ओ काम थे पिता पुत्र अर पवितर आत्मा गै नाम बतिस्मो देगे करियो।
20 झिका आदेस मैं थानै दिया, बां पर लोगा नै चालणो सिखाओ। अर याद राखियो, जगत गै अंत तांई मैं थारै सागै रेऊंगा।”