पिलातुस गै सामै यीसू
27
1 जद दिन उग्यो तो सारा मुख्य याजक अर बुडा लोग यीसू नै मारण गी रे कर ली।
2 बा बिनै बांदगे पिलातुस गै हात में दे दियो।
3 जद यहूदा नै पतो लागग्यो कै बिनै दोसी बणा दियो तो बो पछतायो अर बे तीस चांदी गा सिका मुख्य याजकां अर बुडा लोगा कनै पाछा ल्यायो अर केयो,
4 “मैं एक निरदोस नै पकडावागे पाप करयो।” बा केयो, “म्हानै के करणो? तू तेरै काम जाण।”
5 जद बो चांदी गा सिका मिन्दर में फेंक गै उड़ग्यो अर जा'गे अपणै आपनै फांसी लगा ली।
6 मुख्य याजकां केयो, “आ सिका नै गल्ले में राखणो ठीक कोनी। क्यूंकै ओ एक जणै गी मोत गो मोल है।”
7 अर बा सारा रे कर'गे बा सिका ऊं परदेसियां खातर एक मूसाण भूमी गी जिग्या मोल ली। बो खेत एक कुम्हार गो हो।
8 ईंखातर बि खेत गो नाम आज बी खून गो खेत केवै।
9 झिको बचन यिरमयाह परमेसर गी बात बताण आळै गै द्वारा केयो गेयो पूरो होयो। बा बे तीस सिका ऊं ठैरेयेडे़ मोल ऊं बो खेत ले लियो।
10 जिंया मनै प्रभु आग्या दी बिंया मैं बानै कुम्हार गै खेत गो मोल दे दियो।
पिलातुस गा सवाल
11 जद यीसू नै पिलातुस गै सामै खडयो करयो तो बण पूछयो कै, “तू यहुदियों गो राजा है के?” तो बण केयो कै तू आप ई केवै है।
12 जद मुख्य याजकां अर बुडा लोगां बि पर दोस लगाया तो बण कोई उतर कोनी दियो।
13 ईं पर पिलातुस बिनै केयो, “तनै सुणे है के? तेरै बारे में ऐ लोग किती बातां केण लागरया है।”
14 पण यीसू बांगी कोई बात गो जबाब कोनी दियो। ओ देखगे पिलातुस नै भोत अचंभो होयो।
मोत गी सजा गो हुकम
15 पिलातुस कनै अधिकार हो कै बो त्यूंहार में लोगां खातर एक केदी नै छोड़ सकै झिकै नै बे चावै।
16 बि टेम बठै एक मानिजेडो बराबा नाम गो आदमी जेळ में हो।
17 पिलातुस बठै इक्टा होएड़ा नै पूछयो, “अब बताओ, दोना मूं थारै खातर किनै छोडूं?”
18 पिलातुस आ बात जाणै हो कै बा यीसू नै धोखा ऊं पकड़ायो है।
19 पिलातुस गी घराळी बिनै समाचार घाल्यो जद बो न्याय गी कुरसी पर बैठयो अर केयो तू बि धरमी यीसू गै मामले में जादा हात ना देय्यी। क्यूंकै मैं रात सपने में भोत दुखी होयी।
20 मुख्य याजकां अर बुड़ा लोगां इकठ्ठी होएड़ी भीड़ नै सिखा दियो कै आपां बरबा नै छुडा ल्यां अर यीसू नै मरवा दयां।
21 पिलातुस बानै पूछयो, “थारै खातर किनै छोड़ दयूं,” बा केयो, “बरबा नै छोड़दयो।”
22 पिलातुस बानै केयो, “बिंगो के करूं झिको यीसू मसी कुवावे।” सारा केयो, “बिनै करूस पर चड़ा दे।”
23 पिलातुस केयो, “बण हिस्यो के गलत काम कर दियो?” पण बे सारा जोर जोर ऊं रोळा मचाण लागग्या कै, “बिनै करूस पर चढाओ।”
24 जद पिलातुस देख्यो कै कोई समाधान कोनी होवै अर रोळो बोळो होवै। बण पाणी लेगे सारां गै सामै आपगा हात धोया। अर केयो, “मैं इमै कोई पाप कोनी देख्यो। मैं इंगै बारे में निरदोस हूं। आ थारी जिमेदारी है।”
25 सारै लोगां केयो, “इंगी मोत गा जिमेदारी म्हे अर म्हारी उळाद होवै।”
26 बण बरबा नै बांगै केण पर छोड दियो अर यीसू गै कोड़ा मरवागे करूस पर चढाण खातर बांगै हात में दे दियो।
सिपाईयां यीसू गो अपमान करयो
27 जद पिलातुस गै सिपाईयां यीसू नै किले में ले जा'गे सारी भीड़ नै बिंगै च्यारूंमेर भेळी करी।
28 यीसू गा गाबा खुलवागे बिनै चमकीले लाल रंग गो चोळो पिरायो।
29 कांटा गो मुकुट बिंगै सिर पर राखयो अर बिंगै दाए हात में सरकण्डो दियो अर बिंगै आ'गे गोड़ा टेकगे बिंगी मजाक उड़ाण लागग्या अर केयो, “हे यहुदियां गा राजा निमस्कार।”
30 अर बि पर थूक्यो, बो सरकण्डो लेगे बिंगै सिर पर मारण लागग्या।
31 जद बा बिंगी मजाक कर ली तो बो चमकीले लाल रंग गो चोळो खुलवागे बिंगा आपगा गाबा पिरा दिया अर बिनै करूस पर चढाण खातर ले चाल्या।
यीसू गो करूस पर चढायो जाणो
32 बारे निकळतांई बानै एक समौन नाम गो कुरैनी आदमी मिल्यो। बा बिनै केयो, “इंगो करूस चकले चाल।”
33 बे बिनै गुलगुता झिकै गो मतलब है खोपडी गी जिग्या, बिनै बठै ले गया।
34 बिनै दाखरस में खारो रस रळागे दियो, बण चाख'गे कोनी पीओ।
35 फेर बा बिनै करूस पर चढायो अर परची घालगे गाबा बांट लिया।
36 अर बठै बैठगे बिंगी रुखाळी करण लागग्या।
37 अर दोस पत्र लिखगै बिंगै सिर गै उपर करूस पर लगायो। बिंगै उपर इंया लिखेड़ो है कै, “ओ ई यीसू है, यहुदियां गो राजा।”
38 जद बिंगै सागै दो डाकू बी करूस पर चढाया, एक दाए पासै अर एक बाए पासै।
39 आण जाण गा लोग सिर हलागे बिंगी मजाक करां।
40 अर बिनै केवां, ओ मिन्दर में ढाण आळा, अर तीन दिन में बणाण आळा। अपणै आपनै बचा। जे तू परमेसर गो बेटै है तो करूस पर ऊं नीचे उतरईआ।
41 इंया ई सारा मुख्य याजक अर नेम सिखाण आळा अर बुडा लोग मजाक कर'गे केवां।
42 अण ओरा नै तो बचाया अर अपणै आपनै कोनी बचा सकै। ओ तो इसराएल गो राजा है। जे ओ करूस पर ऊं नीचे उतर जावै तो म्हे इंगो बिस्वास करल्या।
43 अण परमेसर पर भरोसो राख्यो है। जे बो चावै तो अब छुड़ाल्यै क्यूंकै अण आप ईं केयो तो मैं परमेसर गो बेटो हूं।
44 इंया ई बिंगै सागै डाकू बी करूस पर चढाएड़ा हा बे बी बिंगा निंदा करां।
यीसू गा प्राण छोडना
45 दोफारे बारे बजे ऊं लेगे तीन बजे तांई सारै देस में अंधेरो छायो रेयो।
46 लगभग तीन बजे यीसू जोर गी आवाज में केयो, “एली एली लमा सबकतानी।” इंगो मतलब, हे मेरै परमेसर थे मनै क्यों छोड दियो?a
47 झिका लोग बठै खडया बा ओ सुणगे केयो, “बो एलियाह नै बुलावै।”
48 बा लोगा मूं एक जणा भाजगे लोगड लाठी गै आगै बांदगे सिरके में डबोगे बिंगै मूं में देगे चुसायो।
49 अर लोग इंया केवा देखा इनै एलियाह बचाण आवै है के?
50 फेर यीसू जोर गी आवाज में रोळो मचागे प्राण त्याग दिया।
51 अर मिन्दर गो पड़दो उपर ऊं लेगे नीचे तांई पाटगे दो भाग हो'ग्या अर धरती हालगी। अर चटान पाटगी।
52 अर कबरा मूं भोत सारा पवितर लोगां गा सव जींवता होया।
53 अर बे जींवता होगे कबरां ऊं बारै निकळगे पवितर नगर में गेया अर भोत सारा लोगां नै देख्या।
54 जद सुबेदार अर बिंगै सागै यीसू गी रुखाळी करण आळा, बुचाळ अर झिको कीं होयो बिनै देखगे डरग्या। अर केयो, “साची है ओ तो परमेसर गो बेटो हो।”
55 बठै भोत सारी लुगाईयां झिकी गलील ऊं यीसू गी सेवा करती बे बिंगै सागै आयी अर दूर खडी देखण लागरी।
56 बामै मरियम मगदलीनी, अर याकूब अर योसे गी मा मरियम अर जबदी गै बेटै गी मां ही।
57 जद आथण होई तो युसुफ नाम गो अरमिथ्या गो एक अमीर आदमी झिको यीसू गो चेलो हो।
58 बो पिलातुस कनै जा'गे यीसू गो सव मांग्यो तो पिलातुस बिनै ले जाण गी आग्या दे दी।
59 युसुफ यीसू गो सव ले लियो अर नुई चादर में लपेट लियो।
60 अर बिनै आपगी एक नुई कबर में राखयो झिकी बण एक चटान में खुदवाई अर कबर गै मू आ'गे एक मोटो पथर लगा दियो।
61 मरियम मगदलीनी अर मरियम दूसरी बठै कबर गै सामै बैठी।
कबर गी रुखाळी
62 दूसरो दिन झिको सबत गो दिन हो, मुख्य याजक अर फरीसी पिलातुस कनै इकट्टा होया अर केयो,
63 हे महाराजा, म्हानै याद है कै बो भटकाण आळो जद जींवतो हो बण केयो मैं तीन दिनां गै बाद जींवतो हो जाऊंगा।
64 थे आग्या दयो कै तीन दिनां तांई कबर पर पेरो लगायो जावै। कठै इंया ना होवै कै बिंगा चेला आ'गे लास गी चोरी कर ल्ये अर लोगां नै केवै बो मरेडा मूं जींवतो हो'ग्यो। म्हे पेला ईं बात गो बंदोवस्त करणो चावां।
65 पिलातुस बानै केयो, “थारै कनै आदमी है। थे जा'गे आपगी समझ ऊं बिंगी रुखाळी करो।”
66 अर बे रुखाळी करण आळा नै आपगै सागै लेग्या अर पथर पर निसानी लगागे कबर गी रुखाळी करी।