राजा पिलातुस गी सभा में यीसू नै लिजाणो
23
1 जद सगळी पंचायत बानै राजा पिलातुस कनै लेगी।
2 बे बि पर ओ दोस लगाण लागग्या कै ओ लोगां नै भेकावै हो कै रोम गो महाराजा नै कर कोनी देणो। अर अपणै आपनै परमेसर गो बेटो केवै। अर अपणै आपनै मसी अर यहुदी लोगां गो राजा बतावै।
3 जद राजा पिलातुस बिनै पूछयो, “तूं यहुदी लोगां गो राजा है कै?” बण जबाब दियो, “तूं आप ई तो बताण लागरयो है।”
4 जद राजा पिलातुस मुख्य याजकां नै केयो, मनै ईं आदमी में कोई दोस कोनी लागै।
5 पण बे ओर जोर देगे केण लागग्या कै ओ गलील ऊं लेगे यरुसलेम तांई लोगां नै परबचन कर'गे भड़कावै।
6 ओ सुणगे पिलातुस पूछयो, “ओ गलील गो रेण आळो है।”
7 अर जद बिनै ठा लागग्यो कै बो राजा हेरोदेस गै इलाके गो है तो बण यीसू नै हेरोदेस गै कनै घाल दियो। बि टेम राजा हेरोदेस फसह गै त्यूंहार पर यरुसलेम में आयेड़ो।
राजा हेरोदेस गी सभा में यीसू नै लिजाणो
8 राजा हेरोदेस यीसू नै देखगे भोत खुस होयो क्यूंकै बण यीसू गै बारै भोत कीं सुण्यो। ईंखातर बो यीसू ऊं चमत्कार देखणो चावै हो।
9 राजा बिऊं भोत बातां पूछी। पण बण कीं जबाब कोनी दिओ।
10 मुख्य याजकां अर सासतरियां बि पर बडचड'गे दोस लगाण लागरया।
11 जद राजा हेरोदेस आपगै सिपाईयां गै सागै रळगे बिंगी बेजती करी। अर बे सगळा मजाक उड़ाण लागग्या। अर बानै चिलकणा कपड़ा पिरा'गे पाछो राजा पिलातुस कनै घाल दियो।
12 बि दिन ऊं पिलातुस अर राजा हेरोदेस आपसरी में बेली बणग्या क्यूंकै पेलां बे एक दूसरै गा दुसमण हा।
राजा पिलातुस यीसू नै मोत गी सजा
13 जद पिलातुस मुख्य याजकां, पंचायती नेताओं अर लोगां नै बुला'गे केयो कै,
14 थे ईं आदमी नै झिकै जुल्म ऊं मेरै कनै ल्याया हो कै ओ लोगां नै भड़कावै पण मैं थारै सांमणै इंगी जांच करी है अर थे झिकी बात इंगै बारै में केवो बामूं एक ई बात साची कोनी निकळी।
15 अर ना ईं कोई बात इमै हेरोदेस देखी। झिकी ऊं इनै मोत गी सजा दे सकां। ईंखातर बण पाछो ईं इनै मेरै कनै घाल दिओ।
16 ईंखातर इंगै मैं कोड़ा मरवागे छोड़ दयूं।
17 (पिलातुस नै हर साल फसह गै त्यूंहार पर एक केदी छोड़णो जरूरी होंतो हो)।
18 जद सारा जोर जोर ऊं रोळो मचाण लाग्या कै इंगो काम तमाम करो अर म्हारै खातर इंगी जिग्यां बरअबा केदी नै छोड़दयो।
19 बरअबा सैहर में दंगा अर हत्या गै जुल्म में जेळ में बंद हो।
20 पण पिलातुस यीसू नै छोडण गी इच्छा ऊं लोगां नै ओर समझाया।
21 पण सारा लोग रोळो मचाण लागग्या कै इनै करूस पर चढाओ, करूस पर चढाओ।
22 पिलातुस तीसरी बारी बानै पूछयो, क्यूं अण हिस्यो के माड़ो काम करयो है? झिकै ऊं इनै मोत गी सजा सुणाऊं, क्यूंकै इमै हिस्यी कोई बात दिखै'ई कोनी। ईंखातर इनै मैं कोड़ा लगुवागे छोड़दयू।
23 पण लोगां घर नै ई चक दियो कै इनै करूस पर चढाओ। अर पिलातुस नै बांगी बात मानणी पड़ी।
24 अर आखिर में पिलातुस हुक्म दियो कै लोग केवै बिंया ई करयो जावै।
25 अर दंगा अर हत्या करण आळै बरअबा झिकै गी लोग मांग करां बिनै छोड़ दियो अर यीसू नै बांगै केणे गै अनुसार करण खातर बानै सूंप दिओ।
यीसू नै करूस पर चढाणो
26 जद सिपाई यीसू नै लिजाण लागरया तो बठै समौन नाम गो कुरैन गो रेण आळो आदमी हो झिको गाम कानूं आण लागरयो। बिनै बां यीसू गो करूस चका दियो। अर बिनै यीसू गै लारै लारै ले चाल पड़या।
27 जद लोगां गी भीड़ बांगै लारै चाल पड़ी अर बामै भोत सी लुगाईयां ही झिकी छाती कूट कूट'गे दुख करै ही।
28 यीसू बां कानी मुड़गे देख्यो अर केयो, “हे यरुसलेम में रेण आळी बेटियो, मेरै खातर ना रोवो। पण अपणै आप अर आपगै टाबरां खातर रोवो।
29 क्यूंकै सुणो, कदी बे दिन आसी जद लोग केसी, ‘धन्य है बे लुगाईयां झिकी बांझड़ी है अर बे कोख झिकी टाबर कोनी जन्म्या अर बे मांवां झिकिंया टाबरां नै दूध कोनी पियायो।
30 बि टेम बे लोग प्हाड़ां नै केसी कै म्हारै उपर गिरज्यो अर टिबां नै केसी म्हानै दबाल्यो। क्यूंकै लोग हरय भरय दरखत गै सागै इंया करै तो सूकै दरखतां नै कदी कोनी बकसैगा।’
31 थे सोचो, ‘ऐ लोग मेरै बरगै निरदोस आदमी सागै ई इंया करै तो ऐ दोसी आदमी सागै किंया करसी।’”
32 अर दो आदमी झिका अपराधी हा बानै ई यीसू सागै करूस पर चढाण खातर लिजाण लागरया।
33 अर बे खोपड़ी नाम गी जिग्यां पर आग्या अर बां दोनां आपराधिया गै सागै यीसू नै करूस पर लटका दियो। एक अपराधी बांगै सजै पासै अर दूसरो खबै पासै लटका दियो।
34 जद यीसू बोल्यो, “हे पिता परमेसर, आनै माफ कर क्यूंकै ऐ लोग जाणै कोनी कै परमेसर गै बेटै गै सागै ऐ के करण लागरया है।” अर बां सिपाईयां परची गैरगे बिंगा कपड़ा आपसरी में पांती कर'गे बांट लिया।
35 लोग खड़या खड़या देखा। अर यहुदी नेता बिंगी मजाक उड़ावा कै अण दूसरा नै तो घणाई बचाया पण जे ओ परमेसर गो चुणेड़ो है तो अपणै आपनै बचाल्य।
36 अर सिपाईयां बी बिंगै मूं में सिरको दे देगे बांगो मजाक उड़ावा। अर केण लाग्या।
37 जे तूं यहुदी लोगां गो राजा है तो अपणै आपनै बचा ले।
38 बां सिपाईयां एक तखती पर दोस पथर लिख्यो अर करूस पर टांग दियो कै “ओ यहुदियां गो राजा है।”
मन बदलण आळो अपराधी
39 झिका दो अपराधी बठै लटकाऐड़ा बामूं एक जणो बिंगी बेजती कर'गे केयो, “जे तूं मसी है तो म्हानै अर अपणै आपनै बचा ले।”
40 ओ सुणगे दूसरै अपराधी बिनै ललकारयो कै, “तनै परमेसर ऊं डर कोनी लागै के? तनै'ई तो आ'ई सजा मिलण लागरी है।
41 आपां नै तो आपणै करेडै़ गी सजा मिलण लागरी है, पण अण हिस्यो काम करयो ई कोनी झिकै ऊं आनै आ सजा मिलै।”
42 जद बण केयो, “हे यीसू, जद थारो राज आवै तो मनै याद राखियो।”
43 यीसू बिनै केयो, “मैं तनै साची केऊं, तूं मेरै सागै आज'ई सुरग में जावैगो।”
यीसू गा प्राण छोड़णा
44 जद सारै देस में दोपरै ऊं लेगे तीसरै पेर तांई अंधेरो छायो रेयो
45 अर सूरज दिखणो बंद हो'ग्यो। अर मिन्दर गो पड़दो बिचाळूं पाटग्यो।
46 अर यीसू जोर ऊं बोल्यो, “हे पिता परमेसर, मैं मेरी आत्मा थारै हात में सोपूं।” अर इंया केंतांई प्राण छोड़ दिया।
47 जद एक सुबेदार ओ सारो कीं देखगे परमेसर गी बडाई करी। अर केण लागग्यो कै “ऐ सच्चा धरमी आदमी हा।”
48 अर लोगां गी भीड़ झिकी बठै देखण खातर भेळी हो'री। ईं घटना नै देखगे सारा लोग रोंता अर छाती पिटतां बठूं उड़ग्या।
49 पण यीसू गै जाण पिछाण आळा अर झिकी लुगाईयां बांगै सागै गलील प्रान्त ऊं आई। बे दूर खड़ी सारो कीं देखण लागरी।
यीसू गी लोथ नै नुईं कबर में रखणो
50 जद बठै युसुफ नाम गो एक आदमी आयेड़ो बो यहुदियां गी मोटी पंचायत माऊं ईं हो पण धरमी अर सजन आदमी हो।
51 अर बो यहुदियां परदेस गो अरिमितिया नगर गो रेण आळो हो। अर परमेसर गै राज नै अडिकै हो। पण बो मोटी पंचायत गै फैसले अर काम ऊं नाराज हो।
52 अर बण पिलातुस गै कनै जा'गे यीसू गी ल्हास मांगी।
53 अर पिलातुस लोथ देण ऊं ना कोनी करी बाद में बि लोथ नै उतारगे मलमल गै कपड़ा में पळेट दी। अर एक प्हाड़ में बणायेड़ी नूंई कबर में लिजागे रख दी। पेलां बि कबर में ओर किंगी लोथ कोनी रखी ही।
54 अर बो दिन सब्त गी तैयारी गो दिन हो क्यूंकै सूरज गै डूबतांई सब्त चालू होणाळो हो।
55 बे लुगाईयां झिकी बिंगै सागै गलील परदेस ऊं आई बांगै लारै-लारै देखण गेई कै लोथ नै किसी रीति ऊं रखी है।
56 जद बे पाछी आ'गे बिंगी लोथ पर लेप करण खातर सुरम आळी चिजां अर सेंट तैयार करी। अर सब्त गै दिन रीति गै हिसाब ऊं आ लुगाईयां आराम करयो।