यूहना 18

यीसू गो पकडायो जाणो

(मत्ती 26:47-56; मरकुस 14:43-50; लूका 22:47-53)

1 यीसू बिनती करण गै बाद आपगै चेला गै सागै छोटी नैर किद्रोन गै दूसरै पासै एक बगीचै में उड़ग्यो।

2 धोखै ऊं बिनै पकड़वाण आळो यहुदां बि जिग्यां नै जाणै हो क्यूंकै यीसू आपगै चेलां सागै बठै जाया करतो हो। 3 जद यहूदा रोमी सिपाहियां गी टुकड़ी अर महा याजकां अर फरीसियां गी ओर ऊं भेजेड़ा मिन्दर गै पहरेदारा नै लेगे लालटेण अर संसारी मसाला अर हथियार नै लेगे बठै आयो।

4 यीसू आपगै उपर के होवैगो ओ सारो कीं जाणतां होया बी बानै पूछयो, “थे किनै ढूंढो?”

5 बा बिनै उतर दियो नासरत में रेण आळै यीसू नै। यीसू बानै केयो मैं हूं। बठै धोखै ऊं पकड़वाण आळो यहूदा बी खड़यो हो। 6 जद यीसू केयो कै, “मैं हूं,” तो बे लारै हटया अर धरती पर पड़ गेया। 7 जद बण फेर बानै पूछयो, “थे किनै ढूंढै हो,” बे बोल्या, “नासरत गै रेण आळै यीसू नै।”

8 यीसू उतर दियो, “मैं थानै केयो है बो मैं ई हूं जे थे मनै ढूंढो हो तो आ लोगा नै जाण दयो।” 9 ओ बो ईंखातर केयो कै झिको कीं बण केयो हो बो पूरो होवै मैं बामूं किनै कोनी गमाया झिका नै मनै दिया हा।

10 जद समौन पतरस आपगी तलवार काढी अर महा याजक गै दास गो दायो कान बाढ दियो। बि दास गो नाम मलकुस हो। 11 जद यीसू पतरस नै केयो, “आपगी तलवार म्यान में राख। परमेसर मनै झिको दुख गो कटोरो दियो है बिमुं मनै पीणो ई पड़सी के?”

12 जद सिपाईया अर बांगा सुबेदार यहुदियां गै मिन्दर गै पहरेदारा यीसू नै पकड़गे बिंगा हात बांध लिया। 13 अर पेला बिनै बि साल गै महा याजक कैफा गै सुसरै हना कनै लेगे गेया। 14 ओ बो ई कैफा हो झिकै यहुदियां अधिकारिया नै राय दी आपणै लोग खातर एक आदमी गो मरणो आच्छो है।

पतरस गो इनकार

(मत्ती 26:69, 70; मरकुस 14:66-68; लूका 22:55-57)

15 जद यीसू नै ले जाण लागरया हा जद समौन पतरस ओर यीसू गो एक अर चेलो बी यीसू गै लारै चाल पड़यो क्यूंकै ओ चेलो महा याजक नै जाणतो हो ईंखातर बो यीसू गै सागै महा याजक गै आंगणे में उड़ग्यो। 16 पण पतरस बारै दरवाजै कनै खड़ ग्यो, फेर महा याजक नै जानण आळो चेलो बारै आयो अर चोकिदारणी नै केगे पतरस नै मां ल्यायो।

17 चोकिदारणी पतरस नै केयो, हो सकै है तू बी मसी गो ई चेलो है। पतरस बोल्यो नई मैं कोनी। 18 जद भोत ठंड ही। ईंखातर नोकर अर मिन्दर गा पेरेदार कोयला जगा गै खड़या तपण लागरया हा। जद पतरस बी बांगै सागै खड़यो खड़यो तपण लागरयो हो।

महा याजक गी यीसू कनूं पूछताछ

(मत्ती 26:59-66; मरकुस 14:55-64; लूका 22:66-71)

19 फेर पेला आळो महा याजक हना यीसू ऊं बिंगा चेला गै बारै में अर बिंगै उपदेस गै बारै में पूछताछ करी। 20 यीसू बिनै उतर दियो, “मैं सदा लोगा गै सामणै बाता करी। मैं सतसंग घर अर मिन्दर में जठै यहुदी कठा होवंता बठै उपदेस दियो, मैं लुकगे कीं कोनी करयो। 21 फेर तू मनै क्यूं पूछै है, बानै पूछ झिका मनै सुण्यो है, साची बानै पतो है।”

22 जद बण ओ केयो तो मिन्दर गै एक पहरेदार झिको बठै खड़यो, यीसू नै थपड मारयो अर बिनै केयो तेरी आ हिम्मत कै तूं महा याजक नै इंया केयो? 23 यीसू बिनै उतर दियो, “जे मैं कीं गळत केयो है तो साबित कर अर बता मैं के गळत करयो है, अर जे मैं ठीक केयो तो मेरै थपड क्यूं मारयो?” 24 फेर हना बिनै बांदेडै नै महा याजक कैफा कनै घाल दियो।

पतरस गो फेर इनकार

(मत्ती 26:71-75; मरकुस 14:69-72; लूका 22:58-62)

25 जद समौन पतरस खड़यो होयो जठै तपण लागरयो तो बठै खड़या लोग बिनै केयो, “तू बी बिंगै चेला माऊं एक चेलो है कै जद बण मना कर'गे बोल्यो मैं कोनी।” 26 महा याजक गै एक सेवक झिको बि आदमी गो रिस्तेदार हो झिकेगो कान पतरस बाडयो हो बिनै पूछयो, “बता मैं तनै बिंगै सागै बाग में कोनी देख्यो हो?” 27 पतरस फेर इनकार कर दियो अर बि टेम कुकड़ बांग दे दी।

पिलातुस गै सामै यीसू

(मत्ती 27:1, 2, 11-14; मरकुस 15:1-5; लूका 23:1-5)

28 फेर यीसू नै कायफा कनूं रोमी राजपाल गै किले में दिनगे दिनगे टेम में लेग्या। यहुदी लोग किले गै मां कोनी गेया क्यूंकै बे अपवितर ना होवै अर फसह गी त्यूंहार गै रोटी खा सकै। 29 पिलातुस बारै आ'गे बानै केयो, “ईं आदमी पर थे के गुना लगावो हो?”

30 बा बिंगै उतर दियो ओ गुनेगार है। ईं कारण मैं इनै थारै कनै ले आया हा।

31 पिलातुस बानै केयो इनै थे ले जाओ अर आपगै नेम विधान में जिंया है बिंया फैसलो करो। यहुदी अधिकारियां बिनै केयो म्हारै कनै किनई जान ऊं मारण गो अधिकार कोनी है। 32 यीसू झिकी बात बताई ही बिऊं सिद्ध हो गेयो कै बिनै किंया गी मोत मिलगी। 33 जद पिलातुस किले गै मां गेयो अर यीसू नै पूछयो, “के तू यहुदी गो राजा है?” 34 यीसू उतर दियो कै, “आ बात तू आपगी ओर ऊं केवै या दूसरा झिका मेरै बारै में तनै केयो है।” 35 पिलातुस बिनै उतर दियो, “मैं यहुदी कोनी हूं। तेरी जाती गा लोग अर मुख्य याजका तनै मेरै कनै ल्याया है। अर पूछयो कै थे के करणो है?” 36 यीसू उतर दियो, “मेरो राज ईं संसार गो कोनी है जे मेरो राज ईं संसार गो होवंतो तो मेरी प्रजा मनै यहुदियां नै देण ऊं बचण खातर लडाई झगड़ो करती। पण सच्च मैं मेरो राज अठै गो कोनी।” 37 फेर पिलातुस यीसू नै केयो, “तू तो राजा है के?” यीसू उतर दियो कै, “मनै राजा तू ही केण लागरयो है। मैं ईंखातर दुनिया में आयो कै सच्चाई गै बारै में बोलूं। झिको कोई सच्चाई पर चालै है तो बो मेरी बात सुणै है।”

मरण गी आग्या

(मत्ती 27:15-31; मरकुस 15:6-20; लूका 23:13-25)

38 पिलातुस बिनै पूछयो कै, “सच्चाई के है?” इंया केगे यहुदियां कनै उड़ग्यो अर बानै केयो, “मनै तो इमै कोई गुना कोनी लागग्यो।” 39 अर थारी आ रीति रिवाज है कै फसह गै त्यूंहार पर मैं थारै खातर कोई एक केदी छोड़ देयूं। के थे चावो हो कै मैं थारै खातर यहुदियां गै राजा नै छोड़ देयूं? 40 जद बा'ईं बात पर रोळो मचायो इनै कोनी पण बरअबा नै छोड़ दे। बो एक डाकू हो।