यूहना 17

यीसू गी महान पराथना

1 यीसू ऐ बाता केई अर आपगी आंखया ऊं आसमान कानी देखगे केयो, “हे पिता, थारो चुणेड़ो टेम आ'ग्यो है। अब लोगा नै दिखा दे कै झिको तेरो बेटो हूं कितो म्हान हूं। जद मैं बां लोगा नै दिखा दूं कै थे बी किता म्हान हो। 2 क्यूंकै झिकै लोगा नै थे मनै मानण खातर चुण्या है बानै मेरै हात में दिया है। बानै सारा नै अनन्त जीवन देण खातर थे मनै अधिकार दियो है। 3 अनन्त जीवन ओ है कै बे तनै एकलै सच्चै परमेसर अर यीसू मसी नै झिकनै थे भेज्यो है, जाणै। 4 झिको काम थे मनै करण खातर दियो हो, बिनै पूरो कर'गे मैं धरती गै लोगा नै दिखा दियो हो कै थे किता म्हान हो। 5 हे मेरा पिता, संसार गी सरसटी करण ऊं पेला जद मैं थारै सागै हो, जद मनै कितो मोटो समान मिलतो हो। अब जद मैं थारै सागै रेऊंगा बो ई समान मनै फेर ऊं दे।”

आपगै चेला खातर

6 यीसू पराथना में ओ केण लागग्यो, “हे पिता ईं संसार मूं कीं लोगा नै थे मेरै हात में दिया है। अर मैं थारो नाम बा आदमिया पर परगट करयो बे तेरा ई लोग है। थे बानै दिया हो, अर बा तेरै बचन नै मान लियो है। 7-8 मैं बानै बो ई उपदेस दियो है। झिको थे मनै दियो हो। अर बा बिनै मान लियो है। बे जरूर जाणै है कै मैं तेरै कनूं आयो हूं अर बा बिस्वास करयो कै थे मनै घाल्यो है। ईंखातर बे जाणै है कै झिको कोई चमत्कार अर बात सिखाण आळो अधिकार थे मनै दियो हो। 9 अब मैं संसार गै सारै लोगां खातर पराथना कोनी करूं हूं क्यूंकै अब मैं झिका चेला मनै दिया बा खातर पराथना करूं हूं। 10 झिका लोग मनै मानै है बे तेरा है अर झिका तेरा है, बे मेरा है अर बांगै द्वारा मेरो आदर होवै है। 11 मैं अब ओर बोळै टेम तांई ईं संसार में कोनी रेऊंगा, क्यूंकै अब मैं तेरै कनै आण लागरयो हूं। पण ऐ संसार में रेवैगा। ईंखातर हे मेरा पवितर पिता, झिकी सकती थे मनै दी है बि सकती ऊं बांगी रखवाली कर। जियां थे अर मैं एक हा, बे बी एक हो सकै। 12 जद मैं बांगै सागै हो, मैं तेरै बि नाम गी सकती ऊं बांगी रखवाली करी, झिकी थे मनै दी ही। अर बामूं एक बिनास गै बेटै नै छोड़गे कोई बी नास कोनी होयो कै सासतर गो केणो सच्च हो। 13 पण हे पिता अब मैं तेरै कनै आण लागरयो हूं, ईंखातर मैं भोत खुस हूं। अर मैं संसार में रेवंता होया इंया पराथना करण लागरयो हूं कै जिंया मैं खुस हूं बिंया ई मेरा चेला बी खुस होणो चईयै। 14 मैं तेरो संदेस दियो है अर बा बि संदेस नै मान लियो है। ईंखातर संसार गै लोगा बांगै सागै बैर करयो। क्यूंकै जिंया मैं संसार गो कोनी हूं, बिंया ई बे बी ईं संसार गै बुरो लोगा जिसा कोनी है। 15 मैं आ पराथना कोनी करण लागरयो कै तू बानै संसार मूं काड़ दे पण ओ कै तू दुस्ट सैतान ऊं बांगी रखवाली करै। 16 जिंया मैं संसार गो कोनी हूं बिंया ई बे बी संसार गा कोनी है। 17 तेरा बचन साच है। ईंखातर तेरो काम करण गै खातर बी सच्चै बचन गै द्वारा बानै तू तैयार करै। 18 जिंया थे मनै संसार में घाल्यो बिंया ई बानै संसार में घाल्या है। 19 अर बांगै खातर मैं अपणै आपनै तैयार करूं हूं कै बे बी सचमुच तेरै खातर तैयार हो जावै।”

सारै बिस्वासिया खातर

20 यीसू पराथना में फेर केण लागग्यो, “हे पिता मैं एकला आ खातर बिनती कोनी करूं पण बांगै खातर बी झिको आंगै बचन गै द्वारा मेरै पर बिस्वास करेगो। 21 बे सारा एक होवै, जिंया तू मेरै में अर मैं तेरै में हूं बिंया ईं बे बी आपणै में होवै। क्यूंकै संसार गा लोग बिस्वास करै है कै तू ईं मनै घाल्यो है। 22 झिको मोटो समान मनै दियो है बो मैं बानै बी दियो है कै बे बि एक हो सकै जिंया आपां एक हा। 23 मैं बामै अर तू मेरै में कै बे सिद्ध होगे एक हो जावै। संसार जाणै कै थे ईं मनै घाल्यो है अर झिको थे मेरूं प्रेम राखयो बिंया ईं मैं बानै प्रेम राखयो। 24 हे पिता, मैं चावूं कै झिका लोग थे मनै दिया है बे बी मेरै सागै जठै मैं हूं, बठै बे बी मेरै सागै होवै। क्यूंकै संसार गै सुरूं ऊं पेला ई थे मनै प्रेम राखगे मोटो समान दियो है, बिनै बे बी देखे। 25 हे पिता थे झिका धारमिक हो। संसार गै लोगा थानै कोनी पिछाणयो है, पण मैं थानै पिछाणया है। अर मनै मानण आळा नै ठा है कै थे ई मनै घाल्यो है। 26 अर थे कुण हो? ओ मैं बानै बतायो है अर आंगै बी बताऊंगा कै जिंया थे मेरै उपर प्रेम करयो है बिंया ईं बे मेरै पर बी प्रेम करै। अर मैं सदा बामै रेऊं।”