यूहना 16

1 “ऐ बाता मैं थानै ईंखातर केई कै थे आपगै बिस्वास में ठोकर ना खा सको। 2 बे थानै सतसंग घर ऊं काड़ देवैगा। सच्च में बो टेम आण लागरयो है। जद थारै मूं किनैई मारगे हर कोई सोचैगो कै बो परमेसर गी सेवा करै है। 3 इंया बे ईंखातर करेगा कै बे ना पिता नै जाणै है अर ना मनै जाणै है। 4 पण ऐ बाता मैं थानै ईंखातर केई कै ऐ बाता होण गै टेम आवै तो थानै याद आ जावै कै मैं थानै इंगै बारै में पेला ई बता दियो हो। मैं सुरू में थारै सागै हो। ईंखातर मैं थानै ऐ बाता कोनी बताई। 5 अब मैं आपगै भेजण आळै गै कनै जाऊं हूं अर थारै मूं अब मनै कोई कोनी पूछै कै तूं कठै जावै है। 6 पण मैं झिकी बाता थानै केई है ईंखातर थारो मन दुख ऊं भरिजग्या है। 7 पण मैं थानै साची साची केऊं हूं कै मेरो जाणो थारै खातर आच्छो है क्यूंकै जे मैं ना जाऊं तो मदद करण आळो थारै कनै ना आवैगो, पण जे मैं जाऊंगा तो बिनै थारै कनै घाल देऊंगा। 8 बो आवैगो तो दुनिया नै पाप गै बारै में अर धारमिकता गै बारै में अर न्याय गै बारै में गवाई बतावैगो। 9 लोगा मेरै उपर बिस्वास कोनी करयो। ईंखातर पाप गै बारै में बतावै है। 10 अर अब थे मनै ओर जादा कोनी देखोगा। ईंखातर धारमिकता गै बारै में बतावै है। 11 संसार पर राज करण आळै नै दोसी बणा दियो है। ईंखातर न्याय गै बारै में बतावै है।

12 मैं थानै ओर बी भोत सारी बाता केणी है, पण थे बानै अब सैन कोनी कर सको। 13 पण जद सत्य गी आत्मा झिकी परमेसर कनूं आवैगी बा सारो सच्च जानणै गै खातर थारी मदद करेगी। क्यूंकै बा आपगी ओर ऊं कोनी केवेगी, पण झिको सुणैगो बो ई केवेगी। बा थानै आण आळी बाता बतावैगी। 14 बा मेरो आदर करेगी, क्यूंकै मेरी बातां लेगे बे बातां थानै बतावैगी। 15 झिको पिता गो हो बो सारो मेरो है। ईंखातर मैं केयो कै मेरी बात लेगे थानै बतावैगो।”

दुख सुख में बदल जावैगो

16 थोड़ी देर गै बाद थे मनै कोनी देखोगा अर फेर थोड़ी देर में मनै देखोगा।

17 जद बिंगा कीं चेला आपसरी में केयो, “ओ कै है झिको बो आपां नै केवै है, थोड़ी देर में थे मनै ना देखोगा अर फेर थोड़ी देर में मनै देखैगा। अर ओ ईंखातर कै मैं पिता गै कनै जाण लागरयो हूं।” 18 जद बा केयो, “आ थोड़ी देर आळी है, के बात है? आपां कोनी जाणा कै बो के केवै है।”

19 यीसू जाणग्यो कै बे बिनै पूछणो चावै है तो बण बानै केयो कै, “थोड़ी देर गै बाद थे मनै कोनी देखोगा अर फेर थोड़ी देर में मनै देखोगा। इंया कर'गे झिको मैं केयो है बि बात गै बारै में आपसरी में बात करण लागरया हो के? 20 मैं थानै साची साची केऊं हूं, थे विलाप करोगा अर रोओगा पण ओ संसार राजी होवैगो। थे दुख करोगा पण थारो दुख खुसी में बदल ज्यगो। 21 जद लुगाई गो जापै गो टेम आवै है तो बा भोत दुखी होवै है। पण जद टाबर पैदा हो'ज्य तो बा भोत राजी होवै है। फेर बो दुख चिंता बिनै याद कोनी आवै, क्यूंकै संसार में एक टाबर पैदा हो'ग्यो। 22 थे सारा लोग इंया ई दुखी हो, पण मैं थानै फेर मिलूंगा अर थारो मन खुसी ऊं भर ज्यगो। अर बि खुसी नै कोई बदल कोनी सकैगो। 23 बि दिन थे मनै फेर देखोगा तो मेरूं कीं कोनी पूछोगा। मैं थानै साची साची केऊं मेरै नाम ऊं पिता कनूं झिको मांगोगा थानै देवैगो। 24 अब तांई थे मेरै नाम ऊं कीं कोनी मांगयो, मांगो तो मिलैगो कै थारी खुसी पूरी हो जावै।

संसार पर जीत

25 मैं ऐ बाता थानै मिसाल गै रूप में केई है। पण अब बो टेम आ'ग्यो है कै मैं थानै मिसाल देगे कोनी बताऊंगा, पण साफ साफ पिता गै बारै में बताऊंगा। 26-28 मैं पिता ऊं परगट होयो अर ईं संसार में आयो अर अब मैं ईं संसार नै छोड़गे पिता गै कनै जाण लागरयो हूं। पिता आप थानै प्रेम करै है क्यूंकै थे मनै प्रेम करयो हो अर मानयो है कै मैं पिता कनूं आयो हूं। बि दिन मैं थानै ओ कोनी केऊं कै थारी ओर ऊं पिता कनै पराथना करूंगा पण थे मेरै नाम में मांगोगा। बो थानै मिल जावैगो जिंया बण बतायो हो।” 29 बिंगै चेला केयो, “देखो अब थे बिना मिसाल गै साफ साफ बताण लागरया हो। 30 अब म्हे जाणग्या कै थे सारो कीं जाणो हो। अर इंगी जरूरत कोनी क्यूंकै पूछण ऊं पेला ईं जाणै है कै आदमिया गै मन में के सवाल है। अर तू बिंगो जबाब दे सकै है। ईंखातर म्हे बिस्वास करा हा कै थे परमेसर कनूं आया हो।”

31 ओ सुणगे यीसू केयो कै, “थे अब बिस्वास करो हो। 32 देखो, थारै मूं हर एक इनै बिनै होगे आपो आपणै घरै उड़ जावेगा अर मनै छोड़ण गै टेम आ'ग्यो है। पण मेरो पिता मेरै सागै है। ईंखातर मैं एकलो कोनी। 33 मैं ऐ बाता थानै ईंखातर केई कै थानै मेरै द्वारा सांती मिलै। संसार में थानै दुख मिलैगो पण थे होसलो राखो, मैं संसार नै जीत लियो है।”