यीसू सच्ची दाखलता
15
1 यीसू केयो, “सच्ची दाखलता मैं हूं। अर मेरो पिता देखभाल करण आळो किसान है।
2 झिकी डाळी मेरै में है अर फळ कोनी लागै बो बिनै बाड़ देवै है अर झिकी डाळी फळ ल्यावै है बिंगी देखभाल करै है कै बा ओर जादा फळ ल्यावै है।
3 झिको उपदेस मैं थानै दियो है बि पर थे बिस्वास करयो है। ईंखातर थे लोग पेला ई सुद्ध हो।
4 थे मेरै में रेवो अर मैं थारै में रेऊंगा। जे डाली दाखलता में बणगे कोनी रेवै तो फळ कोनी ल्या सकै बिंया ई जे थे बी मेरै में ना बणया रेया तो फळ कोनी ल्या सको।
5 मैं दाखलता हूं। थे बिंगी डाळिया हो। झिको मेरै में रेवै है अर झिकै में मैं रेऊं हूं बो भोत फळ ल्यावै है क्यूंकै मेरै बिना थे कीं कोनी कर सको।
6 जे कोई मेरै में ना बण्यो रेवै तो बि डाली गी तरियां फेंक दियो जावै है अर बो सुख जावै है। अर लोग बानै भेळी कर'गे आग लगा देवै है अर बे बळै जावै है।
7 जे थे मेरै में बणया रेवो अर मेरी बाता नै मानो तो झिको थे चावो अर मांगो, बो थानै मिल जावैगो।
8 जद थे भोत सारो फळ ल्यावो तो मेरै पिता नै आदर मिलै है। जद थे दिखा दयो कै सचमुच मेरा चेला हो।
9 जिंया पिता मनै प्रेम करयो है मैं बी थानै बिंया ई प्रेम करयो है। मेरै प्रेम में बण्या रेवो।
10 मैं आपगै पिता गी आग्या नै मानी है। ईंखातर सदा मैं बिंगै प्रेम में बणयो रेऊं हूं, बिंया ई जे थे मेरी आग्या नै मानोगा तो मेरै प्रेम में बणया रेवैगा।
11 मैं ऐ बाता थानै ईंखातर केई है कै मेरो आनंद थारै में रेवै अर थारो आनंद भरपूर हो जावै।
12 आ मेरी आग्या है कै आपसरी में प्रेम करो जिंया मैं थारूं प्रेम करयो है।
13 झिको कोई आपगै मित्र खातर जान देवै है बो ई है सारा ऊं मोटो प्रेम।
14 ईंखातर झिको उपदेस में थानै देऊं हूं अर थे बि पर चालो तो थे मेरा मित्र हो।
15 अब ऊं मैं थानै दास कोनी केऊंगा क्यूंकै कोई दास कोनी जाणै कै बिंगो मालिक के करै है। पण मैं थानै मित्र केयो है क्यूंकै मैं झिकी बाता आपगै पिता कनूं सुणी, बे सारी थानै बता दी।
16 अर थे मनै कोनी चुण्यो पण मैं थानै चुणया है अर जुमेदारी दी है। क्यूंकै थे जा'गे झिका आच्छा काम मैं करया बिंया ईं कर'गे आच्छो फळ ल्यावो अर थारो फल बणयो रेवो। थे मेरै नाम ऊं पिता कनूं झिको मांगोगा बो मिल जावैगो।”
जगत गो बैर
17 मैं थानै ओ उपदेस देऊं कै थे एक दूसरै ऊं प्रेम करो।
18 यीसू फेर चेला नै केयो, “संसार गा लोग थारूं बैर करसी पण थे याद राखियो कै बण थारै ऊं पेला मेरै सागै बी बैर राखयो।
19 अर जे थे बैर राखण आळा बरगा होवंता तो बे थारूं प्रेम करता क्यूंकै थे बी पेला बांगै जिसा काम करता। पण अब थे संसार गा कोनी हो। मैं थानै ईं संसार मूं चुण लिया है। ईंखातर बे थारूं बैर राखै है।
20 मैं थानै केयो है कै कोई दास आपगै मालिक ऊं मोटो कोनी होवै। बि बात नै याद करो, जे बा मनै दुख दियो तो थानै बी दुख देवैगा। बिंया ई जे बा मेरी बात मानी तो थारी बात बी मानैगा।
21 पण बे मेरै कारण थारै सागै ओ सारो कीं करेगा क्यूंकै बे बिनै कोनी जाणै झिकै मनै भेज्यो है।
22 जे मैं ई संसार में ना आवंतो अर बानै परमेसर गी बाता ना सिखावंतो तो बे कीं बात गा दोसी ना होवंता। पण अब आपगै पापां खातर बांगै कनै कोई बचणै गो तरिको कोनी है।
23 झिको मेरूं बैर राखै है बो मेरै पिता ऊं बी बैर राखै है।
24 जे मैं बांगै बिचाळै चमत्कार गा काम ना करतो झिका चमत्कार कदी कणी कोनी करया तो बे पापा गा दोसी ना होवंता। पण अब तो बा मेरै द्वारा करेड़ा चमत्कार देख लिया है फेर बी थारूं अर मेरै पिता दोनां ऊं बैर राखै है।
25 पण ओ ईंखातर होयो है कै नेम विधान में झिको लिखेडो हो बो पूरो होवै। बठै इंया लिखेड़ो हो कै ‘बिना कारण बा मेरूं बैर करयो।’
पवितर आत्मा गा काम