19
1 फेर पिलातुस यीसू नै पकड़गे सिपाईया नै कोडा मारण खातर दे दियो।
2 सिपाईया कांटा गो मुकुट बणागे बिंगै सिर पर रखयो अर बैंगणी रंग गा गाबा पिरा दिया।
3 अर बिंगै कनै आ'गे केण लागग्या यहुदियां गै राजा गी जय होवै, फेर बिंगै थपड़ मारण लागग्या।
4 पिलातुस एकर ओर बारै आयो अर बानै केयो, “मैं थारै कनै एकर फेर बिनै बारै ल्याऊं हूं कै थे जाण सको मैं बिमै कोई गुना कोनी देख्यो।”
5 फेर बो कांटा गो मुकुट अर बैंगणी गाबा पेरगे बारै आयो जद पिलातुस बानै केयो, “ईं आदमी नै ध्यान ऊं देखो।”
6 जद मुख्य याजका अर मिन्दर गै पेरेदारा बिनै देख्यो तो रोळो मचाण लागग्या अर केण लागग्या, “इनै करूस पर चढा, करूस पर चढा।” पिलातुस बानै केयो, “थे ई इनै करूस पर चढावो क्यूंकै मनै इमै कोई गुना कोनी मिल्यो।”
7 यहुदियां इनै उतर दियो, “म्हारा बी नेम है अर बि नेम गै अनुसार बिनै मरणो ई हो'सी क्यूंकै बो अपणै आपनै परमेसर गो बेटो बणायो।”
8 जद पिलातुस आ बात सुणगे भोत डर ग्यो।
9 अर किले गै मा जा'गे यीसू नै केयो, “तू कठूं आयो हो,” पण यीसू बिनै उतर कोनी दियो।
10 फेर पिलातुस बिनै केयो, “तू मेरूं बात क्यूं कोनी करै? तनै छोड़ण गो अधिकार मेरै कनै है अर करूस पर चढाण गो बी।”
11 यीसू उतर दियो, “तनै परमेसर कनूं कोई अधिकार कोनी मिलयो है तो मेरै उपर तेरो कोई अधिकार कोनी है झिका आदमी मनै तेरै कनै लेगे आया बे तेरूं मोटा गुनेगार है।”
12 ओ सुणगे पिलातुस बिनै छोडण गो उपाय भालण गी कोसिस करी। पण यहुदी रोळो मचायो जे तू इनै छोड़ै है तो तू सारा ऊं मोटो राजा कैसर गो मित्र कोनी। कोई बी झिको आपणै आपनै राजा होण गो दावो करै है बो कैसर गो दुसमण होवै है।
13 जद पिलातुस आ बात सुणी बो यीसू नै बारै लेगे आयो अर फैसलो करण गै आसण पर बैठयो। बि जिग्या नै पथर गो चबूतरा केवंता हा। इब्रानी भासा में इनै गब्बता केवै है।
14 ओ फसह त्यूंहार गी हफ्ते गी तैयारी गो दिन गो लगभग बारा बजे गो टेम हो। पिलातुस यहुदियां नै केयो, “थारै राजा नै ध्यान ऊं देखो।”
15 बा फेर रोळो मचायो इनै ले जावो इनै करूस पर चढावो पिलातुस बानै केयो कै, “थे चावो हो थारै राजा नै मैं करूस पर चढाऊं।” ईं पर मुख्य याजकां उतर दियो, “कैसर नै छोड़गे म्हारो कोई दूसरो राजा कोनी।”
16 जद पिलातुस बिनै करूस पर चढाण खातर बांगै हात में दे दियो। जद सिपाईया यीसू नै आपगै कब्जे में लियो।
करूस पर चढायो जाणो
17 अर यीसू आपगो करूस चक'गे यरुसलेम सैहर ऊं बारै एक जिग्या में लेग्यो। बि जिग्या गो नाम “खोपडी गी जिग्या” हो अर इब्रानी बोली में इनै गुलगुता केयो जावै है।
18 बठै बा बिनै ओर बिंगै सागै दो ओर आदमिया नै करूस पर चढाया। बे दोनूं आदमी आसै पासै अर बिचाळै यीसू नै।
19 पिलातुस एक दोस पत्र लिखवागै करूस पर लगावा दियो अर इमै लिखेड़ो हो यहुदियां गो राजा।
20 भोत सारा यहुदियां बि दोस पत्र नै पढयो क्यूंकै जठै यीसू नै करूस पर चढायो हो। बा जिग्या नगर गै कनै ही। ओ दोस पत्र यहुदियां गी भासा इब्रानी अर रोमी लोगां गी भासा लतीनी अर युनानी लोगां गी भासा युनानी में लिखेड़ो हो।
21 जद यहुदियां गै मुख्य याजका पिलातुस नै केयो, “यहुदियां गो राजा ना लिखो, पण इंया लिखो,” बण केयो हो कै, “मैं यहुदियां गो राजा हूं।”
22 पिलातुस उतर दियो, “मैं झिको लिख दियो बिनै बदळ कोनी सकूं।”
23 सैनिकां यीसू नै करूस पर चढा दियो। अर पेला उतारगे रखेड़ा बिंगा गाबा लिया अर चारा सिपाईया नै बिंगो एक एक हिसो मिलग्यो। बा बिंगो कुड़तो बी लियो अर बो कुड़तो बिना सिडेड़ो हो अर उपर ऊं लेगे नीचे तांई टांका लगाएड़ा हा।
24 ईंखातर बा आपसरी में केयो, “आपां इनै ना पाड़ा। पण ईं पर परची घाल ल्याओ किंगो होवैगो,” अर बा सिपाईया इंया ई करयो। ओ ईंखातर होयो कै परमेसर गै बचन में लिखेड़ी बात पूरी होवै। ओ बचन ओ है कै,
“बा मेरा गाबा आपसरी में बांट लिया,
मेरै कुड़तै पर पर्ची घाली।”
25 यीसू गै करूस गै कनै बिंगी मा, अर बिंगी मोसी, क्लोपास गी घराळी मरियम अर मरियम मगदलीनी खड़ी ही।
26 अर झिकै चेले नै यीसू भोत प्रेम करतो हो बो बी बठै खड़यो हो। जद यीसू आपगी मां कानी देखगे बिनै केयो, “हे मां, आज ऊं ओ तेरो बेटो है।”
27 जद बठै बि चेले नै केयो आ तेरी मा है। बिंगै बाद बो चेलो बिनै आपगै घरै लेग्यो अर बिंगी देखभाल करण लागग्यो।
यीसू गो मरणो
28 इंगै बाद यीसू ओ जाण गेयो कै अब बिंगो सारो काम पूरो हो'ग्यो है अर परमेसर गै बारै में लिखेड़ी बाता पूरी करण गै खातर बण केयो कै, “मैं तीसो हूं।”
29 बठै सिरकै ऊं भरेड़ो एक बठळ पड़यो हो। बा हिस्सप नाम गै दरखत गी लाठी लेगे बिंगै सिरै पर रूई बांधी, बा'ईं लाठी नै बठळ में डबोगे जद बा रूई भीज गेई तो बिंगै मूं गै कनै लगा दी।
30 फेर यीसू सिरको पी लियो तो बो बोल्यो, “पूरो होयो।” जद बण आपगो सिर झुका दियो अर जान दे दी।
31 ओ फसह त्यूंहार गी तैयारी गो दिन हो। अगले दिन सबत गो होण गै कारण यहुदियां पिलातुस नै केयो कै सबत गै दिन बांगी ल्हास करूस पर ना लटकी रेवै, क्यूंकै बो सबत गो दिन मोटो दिन हो। ईंखातर बा आग्या दी कै बांगी लाता तोड़ दी जावै अर बांगी ल्हास करूस पर ऊं नीचे उतारी जावै।
32 फेर दो सिपाई गेया अर यीसू गै सागै करूस पर लटकाऐड़ा दो लोगा मूं एक गी टांग तोड़ दी। फेर दूसरै गी टांग तोड़ दी।
33 पण यीसू गै कनै आ'गे, पेला ईं मरेड़ो देखगे बिंगी टांगा कोनी तोड़ी।
34 पण सिपाईया मूं एक जणै भालो बिंगी पासली में मारयो। जद बिमुं खून अर पाणी निकलणै लागग्यो।
35 ऐ सारी बात झिकै देखी है बण ई गवाई दी अर बिंगी बताएड़ी बात सच्ची है। बो जाणै है कै बो साची केवै है कै थे लोग बिस्वास करो।
36-37 पवितर सासतर में एक जिग्या इंया लिख्यो कै, बिंगी कोई बी हड़ी तोड़ी कोनी जावैगी अर दूसरी जिग्या में इंया लिख्यो कै झिकै गै बा भालो मारयो है, बि कानी बे देखैगा। पवितर बचन में जिंया लिखेड़ी बात इंया ईं पूरी होई।
38 इंगै बाद अरमतियाह गो युसुफ नाम गो एक आदमी झिको यीसू नै मानतो हो। पण यहुदियां अधिकारिया गै डर ऊं ईं बात नै लकोगे राखतो हो। जद बण पिलातुस कनै आ'गे यीसू गी ल्हास नै ले जाण खातर बिनती करी। पिलातुस बिंगी बात मान ली अर आ'गे बिंगी ल्हास लेग्यो।
39 अर झिको निकुदेमुस एक बारी रात में यीसू गै कनै जा'गे बिऊं मिल्यो हो, बो बी बिंगै सागै हो। बो लगभग बतीस ऊं तैतीस किलो गन्धरस अर एलवा नाम गी सुरम आळी चीज लेगे आयो।
40 अर यहुदियां गै लास नै गाड़णे गी रीति गै अनुसार बिनै सुरम आळी चीज लगागे कफन में पळेट दियो।
41 जठै यीसू नै करूस पर चढायो हो, बठै एक बगीचै हो। अर बी बगीचो में एक नुई कबर ही झिकी में अजे तांई कोई कोनी रखयो।
42 बि दिन यहुदियां गो सबत गी तैयारी गो दिन हो अर बांगो आथण दिन छिपण ऊं बाद सुरू होण ऊं पेला दफन गो काम हो। ईंखातर यीसू गी लास नै बि कबर में राखी क्यूंकै बा कबर, कनै ही।