खाली कबर
20
1 हफ्ते गै पेलो दिन दीतवार दिनगे दिनगे मरियम मगदलीनी कबर पर आई अर बण देख्यो कै कबर पर ऊं पथर हटेड़ो है।
2 जद बा भाजगे समौन पतरस अर बिंगै दूसरै चेले झिकै नै यीसू प्रेम करतो हो बांगै कनै गेई। अर केण लागी, बे प्रभु गी लास नै कबर मूं काड़गे लेग्या है। अर म्हे कोनी जाणा कै बिनै कठै रख दी है।
3 जद पतरस अर बो दूसरो चेलो निकलगे कबर कानी भाज्या।
4 बे दोनूं सागै सागै भाज्या जाण लागरया हा पण दूसरो चेलो पतरस ऊं आ'गे निकलग्यो। अर कबर कनै पेला पूगग्यो।
5 बण नीचे झुक गै देख्यो कै बठै कफन गा गाबा पड़या है। पण मां कोनी गेयो।
6 जद समौन पतरस बिंगै लारै लारै गेयो, अर कबर गै मां गेयो अर गाबो पड़यो देख्यो।
7 अर बो कपड़ो झिको बिंगै सिर पर बांदेड़ै हो, कपड़ा गै सागै कोनी पड़यो हो, पण न्यारी एक जिग्या लपेटेड़ो गै देख्यो।
8 फेर दूसरो चेलो बी झिको पेला कबर पर पोंच्यो हो, मां गेयो अर बण देख गै बिस्वास करयो कै सचमुच यीसू मरगे जी उठयो है।
9 अर पवितर सासतर में झिको कीं लिख्यो हो बिनै बे जद तांई समझ कोनी सकया हा। बो बचन इसो है कै बिनै मरेड़ो मूं जीवित होणो है।
10 फेर बे चेला आपगै घरै उड़ग्या।
मरियम मगदलीनी नै दिखणो
11 पण मगदलीनी मरियम रोवंती होई, कबर गै कनै बारै खड़ी रेई अर रोवंता रोवंता कबर में झुकी।
12 जठै यीसू गी लास रखेड़ी ही बठै धोळा गाबा पेरेड़ा दो सुरगदूत एक सिराणै अर दूसरो पगाणै बैठयो देख्यो।
13 सुरगदूता बिनै पूछयो, “हे बाई, तू क्यूं रोवै है। बण उतर दियो बे मेरै प्रभु नै चक'गे लेग्या है अर मनै ठा कोनी कै बा बिनै कठै रखयो है।”
14 ओ केगे बा लारै मुड़ी अर यीसू नै खडो देख्यो, पण पिछाण्यो कोनी कै यीसू है।
15 यीसू बिनै केयो, “हे बाई, तू क्यूं रोण लागरी है। तू किनै भाळै है।” माली समझगे बिनै केयो, “हे भाई, जे थे बिनै चक लियो हो तो मनै बता। बिनै कठै रखयो है। मैं बिनै ले जाऊंगी।”
16 यीसू बिनै केयो, “हे मरियम, बा लारै मुड़ी अर इब्रानी में केयो रब्बूनी मतलब गुरू।”
17 यीसू बिनै केयो, “मैं अजे तांई मेरै पिता कनै उपर कोनी गेयो। तू मेरै हात ना लगा। आ बात मेरै भाईया नै बता। मैं आपगै पिता अर थारै पिता, अर आपगै परमेसर अर थारै परमेसर गै कनै उपर जाऊं हूं।”
18 मरियम मगदलीनी चेला नै जा'गे बतायो, “मैं प्रभु नै देख्यो अर बां मनै ऐ बाता केई।”
19 बि दिन आथण गै झिको हफ्ते गो पेला दिन हो।
चेला पर प्रकट होणो
यहुदियां गै डर गै कारण बिंगा चेला बारनो बन्द कर'गे मां बैठया हा। जद यीसू बांगै बिचाळै आ'गे खड़यो हो'ग्यो अर बानै केयो, “थानै सांती मिलै।”
20 इतो केण गै बाद यीसू आपगो हात अर पासली दिखाई। चेला जद यीसू नै देख्यो तो बे भोत राजी होया।
21 जद यीसू बानै फेर केयो, “थानै सांती मिलै, जिंया पिता मनै भेज्यो है मैं बी थानै भेजूं।”
22 ओ केगे बण बा पर फूंक मारी अर बानै केयो, “पवितर आत्मा लेल्यो।”
23 कोई बि आदमी गै पापा नै थे माफ करो हो बानै माफी मिलैगी अर झिकै गा पाप थे माफ ना करोगा बिनै माफी कोनी मिलैगी।
थोमा पर प्रकट होणो
24 थोमा झिको बारा मूं एक हो झिको दिदिमोस केवंतो हो जद यीसू आयो हो बांगै सागै कोनी हो।
25 जद दूसरा चेला बिनै केण लागग्या, म्हे प्रभु नै देख्यो है, जद बण केयो जद तांई मैं बिंगै हात में मेखा गा निसान ना देखल्यू अर मेखा गै मोरा में आपगी आंगळी ना घालल्यू अर बिंगी पांसळी में आपगो हात ना घालल्यूं जद तांई मैं बिस्वास कोनी करूंगा।
26 आठ दिन गै बाद बिंगा चेला एकर फेर घर गै मां हा अर थोमा बी बांगै सागै हो। अर बारनै गै ताळो लगाएड़ो हो। जद यीसू आयो अर बांगै बिचाळै खड़यो होगे केयो, “थानै सांती मिलै।”
27 जद बण थोमा नै केयो, “आपगी आंगळी अठै मेरै हात में लगागे देख अर आपगो हात मेरी पांसळी में घालगे अर सक ना कर पण बिस्वास कर।”
28 ओ सुणगे थोमा उतर दियो, “हे मेरा प्रभु, हे मेरा परमेसर।”
29 यीसू बिनै केयो, “तू मनै देखगे बिस्वास करयो है पण धन्य है बे लोग झिका मनै बिना देखे बिस्वास करै है।”
ईं किताब गो सार