यीसू गै खिलाफ साजिस
22
1 बिना खमीर गी रोटी गो त्यूंहार आण आळो, झिकै नै फसह बी केवै।
2 मुख्य याजकां अर धरम सासतरियां लोग यीसू नै पकड़ागे मराण गी जुगती बणाण में मगन हा पण बे लोगां ऊं डरा।
यहूदा गो बिस्वास घात
3 बारा चेला माऊं एक चेलो यहूदा इस्करियोति हो जद बिमै सैतान बड़ग्यो।
4 बण मुख्य याजक अर मिन्दर गै सिपाईयां गै अधिकारियां गै कनै जा'गे बात करी कै यीसू नै किसै तरिकै ऊं थारै हात पकड़ाऊं।
5 बे सारा सुणगे भोत राजी होया अर बिनै रिपिया देण गो वायदो करयो।
6 फेर यहूदा राजी होगे मोको देखण लागग्यो कै कद ओ एकलो होवै अर मैं कद इनै पकड़ाऊं।
चेला गै सागै फसह गो छेकड़लो भोज
7 जद बिना खमीर गी रोटी गो त्यूंहार आ'ग्यो, झिकै में यहुदी लोगां नै मिन्दर में मेमणियै गी बली चढाणी जरूरी ही।
8 जद यीसू पतरस अर यूहना नै कनै बुला'गे केयो कै, “जा'गे आपणै खाण खातर फसह गो भोजन तैयार करो”
9 चेला बानै पूछयो, “थे कठै चावो कै म्हे जा'गे तैयार करां”
10 बण बानै केयो, “देखो, थानै गाम में बड़तांई एक आदमी मिलैगो झिकै गै सिर पर पाणी गो घड़ो हो'सी, झिकै घर में बो जावै थे बिंगै लारै ई जाईयो।
11 अर जा'गे घर गै धणि नै केईयो, ‘गुरू तेरूं पूछयो है कै बो कमरो किस्यो है झिकै मैं आपगै चेला गै सागै फसह गो भोजन खाऊं?’
12 बो थानै एक सज्यो सजायो मोटो चुबारो दिखासी बिमै जा'गे थे फसह गो भोजन तैयार करियो।”
13 जद बे बठै गेया तो बिंया ई मिल्यो जिंया यीसू बानै केयो अर बां फसह गो भोजन तैयार करयो।
प्रभु भोज
14 जद टेम आयो तो बो आपगै चेला गै सागै भोजन करण बैठयो।
15 जद बण चेला नै केयो, “मेरी भोत मोटी इच्छा ही कै दुख भोगण ऊं पेलां मैं ओ फसह गो भोजन थारै सागै खाऊं।
16 क्यूंकै मैं थानै केऊं कै जद तांई परमेसर गै राज में फसह गो भोजन गो असली मतलब पूरो ना हो'ज्य मैं इनै दुबारै कोनी खाऊंगा।”
17 फेर बण अंगूरां गो कटोरो लेगे परमेसर गो धन्यवाद करयो अर केयो, “इनै लेगे आपसरी में बांटगे पील्यो
18 क्यूंकै मैं थानै केऊं कै जद तांई परमेसर गो राज ना आवै जद तांई मैं दाख गो रस अबूं लेगे कदी कोनी पीऊं”
19 फेर बण रोटी ली अर धन्यवाद कर'गे तोड़ी अर बानै देगे केयो, “ओ मेरो देह है झिकी थारै खातर देऊं हूं, मेरी यादगीरी में इंया ई करै करियो।”
20 ईं रीति ऊं रोटी गै बाद में दूसरो कटोरो लेगे बानै दियो अर केयो, “ओ कटोरो मेरो खून झिको थारै खातर बहाइज्यैगो ओ एक नूंअ वायदे गो निसान है।
21 पण देखो, मनै धोखै ऊं पकड़ाण आळै गो हात ई मेज पर है।
22 क्यूंकै मिनख गै बेटै गै सागै झिको कीं होणो है बो तो होगे रेसी पण थारै उपर भोत बुरो होवैगो बि पर झिको बिनै पकड़ासी।”
23 आ बात सुणगे बे आपसरी में पूछताछ करण लागग्या कै आपणै माऊं हिस्यो कुण है, झिको ओ काम करेगो।
मोटो कुण?
24 फेर चेला में ओ बाद विवाद बी होयो कै म्हारै माऊं कुण मोटो मानिजै।
25 यीसू बानै केयो, “दूसरी जातियां गा राजा झिकां पर राज करै अर बां पर हक राखै बे बांगा रूखाळा कुहावै।
26 पण थे भिस्या ना बणजाइयो, पण झिको थारै में मोटो है बो छोटे गै बरगो बणै अर झिको प्रधान है बो दास गै बरगो बणज्यै।
27 क्यूंकै मोटो कुण है, झिको रोटी खावै बो या झिको खुआवै? मोटो बो कोनी कै झिको खावै। पण मैं थारै बिचाळै दास गै बरगो हूं।
28 थे बे हो झिका मेरै हरेक दुख तकलीफ में सागै रेया।
29 अर जिस्यो मेरै पिता मनै राज दियो है बिस्यो ही मैं बि थानै राज देऊं।
30 मेरै राज में थे मेरी मेज पर खाओगा अर पिओगा अर सिंघासन पर बेठगे इसराएल गै बारा गोतरां गो न्याय करोगा।”
पतरस गै नटणै गी बात
31 फेर यीसू बोल्यो, “समौन, हे समौन। जियां किसान कणक नै साफ करै है इंया ही थे सारा गी परीक्सा लेण गी सैतान आग्या परमेसर ऊं मांगी है।
32 पण मैं तेरै खातर पराथना करी है कै तेरो बिस्वास ना जांतो रेवै अर जद तूं पाछो आवै तो आं भाईयां गो ईं बिस्वास तकड़ो करी।”
33 समौन केयो, “हे प्रभु, मैं थारै सागै जेळ तो के मरण नै बी तैयार हूं।”
34 बण केयो, “हे पतरस, आज कुकड़ गै बांग देण ऊं पेलां तूं मेरो तीन बार ओ केगे इनकार करेगो कै मैं इनै कोनी जाणूं।”
बटुओ झोळी अर तलवार
35 फेर यीसू बानै केयो, “जद मैं थानै बिना बटुआ, झोळी अर बुंटा गै घाल्या तो थानै कोई चीज गी कमी होई ही के?” बां जबाब दियो, “कोई चीज गी कमी कोनी होई”
36 बण बानै केयो, “पण अब झिकै गै कनै बटुओ अर झोळी है बो बानै लेल्यै अर झिकै गै कनै तलवार ना है बो आपगा कपड़ा बेचगे मोल लेल्यै।
37 क्यूंकै मैं थानै केऊं सासतर में ओ लिखेड़ो है कै, ‘बो अपराधियां गै सागै गिणीज्यो,’ आ बात मेरै में होणी जरूरी है क्यूंकै मेरै बारै में लिखेड़ी बातां पूरी होण पर है।”
38 चेला केयो, “हे प्रभु, देख,” म्हारै कनै दो तलवारां है। बण केयो, “रेण दयो बस भोत हो'गी, थारै बात समझ में तो आवै कोनी।”
जेतुन गै प्हाड़ पर यीसू गी बात
39 जद बे बारै निकळगे रोजाना गी तरियां जेतुन प्हाड़ पर गेया अर चेला लारै लारै चाल पड़या।
40 बि जिग्यां पोंचगे बण चेला नै केयो, “पराथना करो जिंऊ ब्यादि में ना पड़ो”
41 अर यीसू बाऊं थोड़ी सी दूर जा'गे अर घुटना टेकगे पराथना करण लागग्या।
42 हे पिता, “जे थे चावो तो ईं कटोरै नै मेरै कनूं हटा सको, तो बी मेरी नई तेरी ही इच्छा पूरी होवै।”
43 जद बानै एक दूत दिख्यो झिकै बानै सामरथ दी।
44 बो घोर संकट में ब्याकुल होगे ओर बी जादा हिरदय ऊं पराथना करण लागग्या अर बांगो पसीनो खून गै टपका गी तरियां जमीन पर गिरण लागरयो।
45 जद बो पराथना कर'गे खड़यो होयो अर चेला गा कनै आ'गे देख्यो तो बे उदासी गै मारेड़ा सूत्या पड़या।
46 अर बानै केयो, “सोवो क्यामी हो? ऊठज्यो अर पराथना करो कै ब्यादि में ना पड़ो।”
यीसू नै धोखै ऊं पकड़णो
47 बो केण लागरयो कै लोगां गी एक भीड़ आई अर सारा ऊं आगै आगै बांगो बारा चेला माऊं एक चेलो यहूदा आण लागरयो बो बानै नै चूमण खातर कनै आयो।
48 जद यीसू बिनै केयो, “हे यहूदा, तूं चूमो लेगे मिनख गै बेटै नै पकड़ासी के?”
49 बिंगै चेला देख्यो कै के होण आळो है जद बां केयो, “हे प्रभु, म्हे तलवार चलावां के?”
50 जद एक चेले यीसू गै बोलण ऊं पेलां ई मुख्य याजक गै दास गो तलवार ऊं सजो कान उड़ा दियो।
51 ईं पर यीसू केयो, “बस भोत हो'गी कोई हद'ई होवै।” अर बिंगो कान हात लगागे पाछो जोड़ दियो।
52 बां मुख्य याजकां अर मिन्दर गै पेरेदारां गै अधिकारियां नै अर पंचायती नेता झिका बिंगै उपर चढण लागरया बानै केयो, “थे मनै डाकू समझगे तलवारां अर लठ लेगे आया हो के?
53 जद मैं रोज मिन्दर में थारै सागै रेंवतो जद तो थे मेरै हात ई कोनी लगायो पण ओ टेम थारो है झिको सैतान गो राज है अर अंधेरे गो बासो है।”
पतरस गो नटणो
54 फेर बे बिनै पकड़गे मुख्य याजक गै घरै लिआया अर पतरस दूर दूर'ईं बांगै लारै-लारै आण लागरयो।
55 जद बे आंगणे में आग जगा गै सारा भेळा बैठया तो पतरस बी बांगै बिचाळै जा बैठयो।
56 जद बठै एक दासी आग गै चानणै में बिनै बैठयो देख्यो अर बिंगै कानी ताकगे केयो, “ओ ई बिंगै सागै हो”
57 पण बो नटग्यो अर बोल्यो, “भेन, मैं तो बिनै कोनी जाणूं”
58 थोड़ी सी देर बाद में बिनै कण'ईं ओर देख्यो अर केयो, “तूं बी तो बामूं'ईं है” पतरस फेर नटग्यो कै “मैं तो बामूं कोनी।”
59 घंटै कै बाद में एक ओर आदमी जोर देगे केण लागग्यो कै “जरूर ओ बी तो बांगै सागै हो, क्यूंकै ओ गलीली है।”
60 फेर बी बो नटग्यो अर केयो, “भाई जी मैं कोनी जाणूं, थे के केण लागरया हो।” बो बोलणई लागरयो इतनै कुकड़ बांग मार दी।
61 जद प्रभु मुड़गे पतरस कानी देख्यो तो बिनै प्रभु गी बात याद आ'गी झिकी बण पेलां केई ही कै, “आज कुकड़ गै बांग मारण ऊं पेलां तूं तीन बारी मनै पिछाणन ऊं नट ज्यगो।”
62 फेर पतरस बारै आ'गे फूट फूट'गे भोत ई रोयो।
यीसू गी बेजती करणी
63 झिका आदमी यीसू नै पकड़ राख्यो बे मजाक उड़ा-उड़ा'गे कुटण लागग्या।
64 अर बांगी आंखां ढकगे पूछयो, “परमेसर गी बात बोल'गे बता कै तेरै कण मारी है?”
65 बां ओर बी निंदा गी घणी बातां बांगै खिलाफ में केई।
मोटी पंचायत गै सांमै यीसू
66 जद दिन उग्यो तो लोगां गा बडेरां अर मुख्य याजकां अर सासतरियां भेळा होया अर बानै आपगी पंचायती नेतावां गी सभा में बुला'गे पूछयो,
67 “जे तूं मसी है तो म्हानै बता दे।” बण बानै केयो, “जे मैं थानै केऊंगा तो थे मानोगा कोनी,
68 अर जे पूछूं तो जबाब कोनी देओगा।
69 पण अबूं मिनख गो बेटो सरवसकतिमान परमेसर गै सजै पासै बैठयो रेवेगो।”
70 ईं बात पर सारा केयो, “तो तूं परमेसर गो बेटो है के?” बण बानै केयो, “थे आप ई तो केवो, क्यूंकै मैं परमेसर गो बेटो हूं।”
71 जद बां केयो, “अब म्हानै गुआई गी के लोड़ है, क्यूंकै म्हे खुद'ई इंगै मू ऊं सुण लियो।”