मत्ती 5

यीसू गो प्हाड़ पर उपदेस

1 यीसू जद मोटी भीड़ नै देखगे प्हाड़ पर चडगे बैठग्यो। अर बिनै मानण आळा सारा बिंगै कनै आया। 2 जद यीसू बानै उपदेस दियो।

धन्य बचन

(लूका 6:20-23)

3 “धन्य है बे झिका मन गा दीन है।

सुरग गो राज बा खातर है।

4 धन्य है बे झिका दुख करै।

परमेसर बानै होसलो देवै।

5 धन्य है बे झिका दीन है

क्यूंकै बे धरती गा अधिकारी होवैगा।

6 धन्य है बे झिका नीती कानी भूखा अर प्यासा है।

परमेसर बानै धपावेगो।

7 धन्य है बे झिका दया करै है

क्यूंकै दया बा खातर सुरग ऊं बरसेगी।

8 धन्य है बे झिका मन में खोट कोनी राखै।

बे लोग परमेसर नै देखैगा।

9 धन्य है बे झिका मेल मिलाप कराण आळा है,

बे परमेसर गा बेटा कुहासी।

10 धन्य है बे लोग झिका आच्छै कामां खातर सताया जावै

क्यूंकै सुरग गो राज बांगो ई है।”

11 “अर धन्य हो थे क्यूंकै मेरै खातर लोग थारो अपमान करै, दुख दय अर थारै पर झूठो दोस लगावै है। 12 सुरग में थारै खातर एक मोटो फळ है। थे बि खातर भोत आनंद मनाइयो अर मन में राजी होईयो। क्यूंकै जिंया अब थानै लोग तंग करै है बिंया ई पेला परमेसर गी बात बताण आळा नै बी तंग करया हा।”

लूण अर चानणो

(मरकुस 9:50; लूका 14:34, 35)

13 “थे सारी मिनख जाती खातर लूण बरगा हो। जे लूण गो स्वाद बिगड़ जावै तो बो कीं काम गो कोनी रेवै अर बिनै बारै फेंकणो पडै अर लोग बिंगै उपर पग मेल गै टिपै। 14 थे संसार गो चानणो हो। एक इसो नगर प्हाड़ गी चोटी पर बसेडो होवै बो लुके कोनी। 15 लोग दियो जगागे बालटी नीचे कोनी मेलै। पण बिनै आळै में राखै झिकै ऊं सारा नै चानणो मिलै। 16 लोगां गै सामै थारो चानणो इंया ई चमकै कै लोग थारै आच्छा कामां नै देखगे थारो पिता परमेसर झिको सुरग में है बिंगी बडाई करै।”

नेम विधान गी सिक्सा

17 “थे ओ ना सोचो कै मैं मूसा गो नेम विधान अर परमेसर गी बात बताण आळा गी लिखेड़ी बाता नै खत्म करण आयो हूं पण मैं तो बांगी बात पूरी करण आयो हूं। 18 मैं थानै साची केऊं जद तांई धरती आसमान खत्म ना हो'ज्य मूसा गै नेम विधान गी एक एक बात पूरी होण तांई बणी रेवेगो। 19 ईंखातर आ आग्या मूं कोई घटागे बधागे सिखावैगो तो बो सुरग में छोटो मानिज्येगो। पण झिको आ पर चाल गै अर दूसरा नै चालण खातर सिखावैगो बो सुरग में सारा ऊं मोटो मानिज्येगो। 20 मैं थानै साची केऊं कै जद तांई फरीसियां अर नेम विधान सिखाण आळा लोगा ऊं धरम गै आ'गे ना निकळया तो सुरग गै राज में कोनी जा सकोगा।”

रीस अर हत्या

21 “थे जाणो है के आपणै बडेरां नै बताएड़ो हो कै थे हत्या ना करियो जे थे करोगा तो थानै कचेडी में जबाब देणो पड़सी। 22 पण मैं थानै केऊं झिको आपगै भाई पर रीस करै तो बिंगो परमेसर न्याय करसी अर झिको आपगी भाई गी बेजती करसी तो बिनै पंचायत में जबाब देणो पड़सी अर कोई दूसरै नै माडो बतासी बिनै नरक में जाणो पड़सी। 23-24 ईंखातर जद तू बेदी पर भेंट चडावंतो होवै तो तनै याद आवै कै तेरै भाई खातर मन में कोई पाप है तो पेला आपगै भाई नै मनाई अर फेर आ'गे भेंट चढाई। 25 जद तेरो दुसमण तनै कचेडी में ले जावंतो होवै तो रा में बिनै बेली बणा लेयी। कठै इंया ना होवै के बो तनै न्याय करण आळै गै सामै ले जा'गे जेळ में बंद करा दय। 26 मैं साची केऊं कै तू जेळ ऊं जद तांई कोनी छूट सकैगो जद तांई बिंगो हिसाब पूरो ना कर दय।”

बेबीचार

27 “थे जाणो है कै थानै केयेड़ो है बेबीचार ना करो। 28 पण मैं थानै केऊं कै जे कोई आदमी पराई लुगाई नै गळत नजर ऊं देख बी लियो तो बण आपगै मन में बेबीचार कर लियो। 29 ईंखातर तेरी आंख जे तेरूं पाप करवावे तो बिनै काड़ गै बारै फेंक दे क्यूंकै तेरी आंख गै कारण सारो सरीर नरक में ना जावै। 30 जे तेरो हात गळत काम करवावे तो बिनै बाडगे फेंक दे क्यूंकै तेरै हात गै कारण सारो सरीर नरक में ना जावै।”

तलाक

(मत्ती 19:9; मरकुस 10:11, 12; लूका 16:18)

31 “नेम विधान में ओ बी केएड़ो है कै जे तू आपगी लुगाई नै तलाक दय तो लिखगै देई। 32 पण मैं थानै केऊं जे कोई आपगी लुगाई नै बेबीचार गै बिना कोई ओर बात गै कारण तलाक देवै तो बो बिऊं बेबीचार करवावे अर जे कोई छोडेडी लुगाई ऊं ब्या करावे तो बो बेबीचारी है।”

सोगन

33 “थे ओ बी सुणयो कै आपणै बडेरां नै केयेड़ो हो, सोगन ना खाई। जे खावै तो बिनै प्रभु खातर पूरी करियो।” 34 पण मैं थानै केऊं, “थे सुरग गी सोगन ना खाईयो क्यूंकै बठै परमेसर गो आसण है। 35 अर धरती गी सोगन ना खाईओ क्यूंकै बिनै परमेसर संभाळै है। अर ना यरुसलेम गी क्यूंकै बि महाराजा गो नगर है। 36 अर ना सिर गी सोगन खाई क्यूंकै थे एक बी बाळ काळो अर धोळो कोनी कर सको। 37 कद बी तू बोलै तो सच्च बात बोली इऊं जादा झिको कीं है बो सैतान गो है।”

बदळो

38 “नेम विधान में केयेड़ो है कै थे जे कोई आदमी दूसरै गी आंख अर दांत खराब कर दियो तो आप आळो देणो पड़सी। 39 पण मैं थानै केऊं कै जे कोई आदमी थारै सागै बुरो काम करै तो बिंगै खिलाफ थे कीं ना करियो। जे थारै एक गाल थपड मारै तो दूसरो बी आगै कर दयो। 40 जे कोई तेरै पर मुकदमो कर'गे कुड़तो लेणो चावै तो बिनै ओडण खातर चादर बी दे दे। 41 जे कोई तनै एक कोस चलावे तो तू बिंगै सागै दो कोस उड़जा। 42 जे तेरूं कोई कीं मांगै तो बिनै दे दे। अर झिको उद्धार लेणो चावै बिनै मना ना कर।”

दुसमणां सागै प्रेम

(लूका 6:27, 28, 32-36)

43 “थे नेम विधान गी आ बात सुण चुक्या हो कै पडोसी ऊं प्रेम अर दुसमणा ऊं बैर राखो। 44 पण मैं थानै केऊं कै थे थारै दुसमणा ऊं प्रेम करो अर झिका थानै दुख दय बा खातर पराथना करो। 45 जिऊं थे थारै पिता परमेसर गी आच्छी उळाद बण सको क्यूंकै बो आच्छै अर माडै़ नै एक बरगो समझै। 46 जे थे आपगै प्रेम करण आळा ऊं प्रेम करो तो थानै के फळ मिलसी इयां तो चुंगी लेण आळा बी करै। 47 जे थे आपगै बेलियां सागै प्रेम करो तो के मोटो काम करो? इंया तो गेर यहुदी लोग बी करै। 48 ईंखातर थे पूरी तरियां आच्छा बणो क्यूंकै थारो पिता परमेसर बी आच्छो है।”