ब्या गै भोज गी मिसाल
22
1 यीसू फेर बानै एक ओर मिसाल केण लागग्यो।
2 “सुरग गो राज बि राजा बरगो है झिकै आपगै बेटै गो ब्या करयो।
3 राजा आपगै दासा नै भेज्या कै बा लोगा नै बुला ल्यावो झिका नै नूंतो देयड़ो है। पण बा लोगां आणो कोनी चायो।
4 राजा फेर दासा नै केयो बानै जा'गे ल्यावो कै भोजन तैयार है, चालो।
5 नूंतो देऐडियां लोगां बि बात पर ध्यान कोनी दियो। अर कोई खेत में उड़ग्यो अर कोई आपगै काम पर उड़ग्यो।
6 अर झिका बचा रेया, बा दासा नै पकडगे कूट्या अर केईयां नै मार दिया।
7 जद राजा नै रीस आ'गी, बण आपगै सैनिकां नै घाल्या। बा जा'गे सारा नै मार दिया अर बांगै नगर में आग लगा दी।
8 फेर राजा आपगै दासा नै केयो, भोज तैयार है। पण झिका नै न्यूंतो दियो बे लोग काम गा कोनी निकळ्या।
9 ईंखातर गाम में जाओ अर गळियां में अर कूंटा पर झिको बी थानै मिलै बानै बुला ल्यावो।
10 जद बे गेया अर जिता बी आच्छा माड़ा लोग बानै मिल्या बानै ल्याया अर बिंगो घर मेहमाना ऊं भरिजग्यो।
11 पण जद राजा मेहमाना नै देखण आयो तो बण एक हिस्यो आदमी देख्यो झिकै गै गाबा कोनी पैरेडा।
12 राजा बिनै केयो, हे बेली, तू बिना गाबा गै मां किंया आ'ग्यो? पण बो बोल्यो कोनी।
13 जद राजा आपगै दासा नै केयो, इंगै हात पग बांदगे अंधेरे में फेंक दयो जठै लोग रोये अर दांत पीसै।
14 क्यूंकै बुलाएड़ा तो भोत है पण चुणेड़ा थोड़ा है।”
कैसर नै कर देणो
15 फेर फरीसियां जा'गे ईं बात पर बिचार करण लागग्या, यीसू नै किसी बात में फसावां?
16 बा आपगै चेला नै हेरोदेस गै सागै बिंगै कनै भेज्या। बा जा'गे यीसू नै केयो, “गुरूजी म्हे जाणा कै तू साच्चो है अर सच्च में परमेसर गी रा गी सिक्सा देवै। कोई कीं सोचै तू बि बात गी फिकर कोनी करै क्यूंकै तू आदमियां कानूं कोनी करै, तू परमेसर कानूं करै।”
17 फरीसियां पूछयो, “थे बताओ कै महाराज कैसर नै कर देणो ठीक है या कोनी?”
18 यीसू बांगै बुरे इरादे नै जाण गेयो अर केयो, “अरै कपटियों थे मनै क्यूं परखो?
19 मनै एक सिको दिखाओ झिका ऊं थे कर देवो।” जद बा बिनै सिको दियो।
20 बण केयो, “ईं पर किंगी फोटू अर किंगो लेख खुदेड़ो है।”
21 बा केयो, “महाराज कैसर गो।” जद बण केयो, “झिको महाराज कैसर गो है बो कैसर नै दे दयो अर झिको परमेसर गो है बो परमेसर नै दे दयो।”
22 ओ सुणगे बे हेरान हो'ग्या अर बठूं उड़ग्या।
जी उठणो अर ब्या होणो
23 बि दिन'ई केई संदूकी झिका दुसर जी उठण नै कोनी मानै हा बे बि कनै आया अर पूछण लागग्या।
24 “गुरूजी, मूसा गै नेम विधान गै अनुसार जे कोई लुगाई गो आदमी बे उळाद मरजयै तो बि लुगाई नै बिंगो भाई ब्या कर सकै के? कै आपगै भाई खातर उळाद पैदा करै।
25 इंया मानो कै सात भाई है। पेलै गो ब्या होयो अर बे उळाद मर ग्यो। फेर दूसरै भाई बिऊं ब्या कर लियो।
26 जद तांईं सारा मर गया इतै तांई सारा सागै इंया होयो। सारा बे उळाद मरग्या।
27 अर बाद बा लुगाई बी मर गयी।
28 अब थे बताओ दुसर जीण गै बाद बा सातां मूं किंगी लुगाई हो'सी क्यूंकै बण सातां सागै ब्या करयो।”
29 यीसू उतर दियो, “थे गलत सोचण लागरयो क्यूंकै थे सासतर अर परमेसर गी सकती नै कोनी जाणो।
30 थानै ओ समझणो चईयै कै दूसरै जन्म में किंगोई ना तो ब्या होवैगो अर ना ब्या करसी। पण बे सुरगदूतां बरगां होवैगा।
31 पण मरेड़ा गै जींवता होण गै बारे में थे ओ बचन कोनी पड़यो झिको परमेसर थानै दियो।
32 मैं अबरहाम, इसहाक अर याकूब गो परमेसर हूं। मैं मरेड़ा गो कोनी पण जीवता गो परमेसर हूं।”a
33 जद लोग बिंगी बात सुणगे हेरान हो'ग्या।
सारा ऊं मोटो आदेस
34 जद फरीसियां सुण्यो कै यीसू आपगी बात ऊं संदूकियां गै मू गै ताळो जडदियो तो बे सारा भेळा होया।
35 बामूं एक यहुदी नेम सिखाण आळै बिनै फसाण खातर पूछयो।
36 “गुरूजी, नेम विधान में सारा ऊं मोटो आदेस घिस्यो है।”
37-38 यीसू केयो, “तू पूरै मन आत्मा अर बुद्धी ऊं आपणै प्रभु परमेसर ऊं प्रेम करणो चईयै। ओ सारा ऊं पेलो अर मोटो आदेस है।”b
39 अर ईं तरियां गी आ दूसरी आग्या है कै तू आपगै पडोसी ऊं आपगै तरियां ई प्रेम करी।c
40 सारी नेम विधान अर परमेसर गी बात बताण आळा गी किताबा, आ दो आदेसा पर टिकेडी है।
41 जद फरीसी सारा भेळा होया, बि टेम यीसू बानै एक बात पूछी।
42 “मसी गै बारे में थे के सोचो कै बो किंगो बेटो है?” बा केयो, “दाऊद गो।”
43-44 बण पूछयो, “फेर आत्मा ऊं भरगे दाऊद बिनै प्रभु क्यामी केवै?” परमेसर मेरै प्रभु नै केयो, “मेरै दाए पासै बैठगे राज कर। जद तांई मैं तेरै दुसमणां नै तेरै अधीन ना कर दयूं।”d
45 फेर जद दाऊद बिनै प्रभु केयो तो बिंगो बेटो किंया हो सकै।
46 ईं बात गो कणी उतर कोनी दियो। अर बिंगै बाद किनैई कोई बात पूछण गी हिम्मत कोनी पडी।